الماتىدا 18-19 تامىز كۇندەرى تۇركى مەملەكەتتەرى ۇيىمىنىڭ (تمۇ) IV حالىقارالىق جاستار فەستيۆالى ءوتىپ جاتىر.

ءىس-شاراعا تۇركى مەملەكەتتەرى ۇيىمىنا مۇشە ەلدەر – قازاقستان، ازەربايجان، قىرعىزستان، تۇركيا جانە وزبەكستاننان دەلەگاتتار قاتىسۋدا. فەستيۆال اياسىندا جاستار ساياساتى، كاسىپكەرلىك، ازاماتتىق بەلسەندىلىك جانە الەۋمەتتىك باستامالاردى دامىتۋ باعىتتارىندا سەمينالار ۇيىمداستىرىلىپ، جاس كوشباسشىلار مەن كاسىپكەرلەر باس قوسادى.

جيىننىڭ رەسمي اشىلۋى بارىسىندا الماتى قالاسىنا «2025 جىلعى تۇركى الەمىنىڭ جاستار استاناسى» مارتەبەسى بەرىلدى. سالتاناتتى شاراعا مەملەكەت باسشىسى قاسىم-جومارت توقاەۆ ارنايى قۇتتىقتاۋ حاتىن جولدادى. ونى قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا وقىپ بەردى.

«الماتى – ازاتتىعىمىزدىڭ التىن بەسىگى، جاسامپاز جاستاردىڭ قۇتتى مەكەنى. وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كوپتەگەن ۇلى تۇلعالارىمىز وسى قالادا ءوسىپ-ونگەن. شىن مانىندە، ءتول مادەنيەتىمىزدىڭ تەمىرقازىعىنا اينالعان شەجىرەلى شاھار قازاق ەلىنىڭ عانا ەمەس، تۇركى مەملەكەتتەرىنىڭ دە رۋحاني ورداسى سانالادى.

بۇگىن اسقارالى الاتاۋدىڭ باۋرايىندا ءتۇبى ءبىر تۇركى جۇرتىنىڭ ءبىلىمپاز، دارىندى ءارى بەلسەندى جاستارى باس قوسىپ وتىر. ىرگەلى ءىس-شارا اياسىندا جاڭا دوستار تاۋىپ، تىڭ يدەيالار مەن جوبالاردى جۇزەگە اسىراسىزدار دەپ سەنەمىن. ورەندەرىمىزدىڭ بىرلىگى بەكەم بولسا، تۇركى الەمىنىڭ تۇعىرى مىعىم، بولاشاعى جارقىن بولارى ءسوزسىز»، – دەلىنگەن مەملەكەت باسشىسىنىڭ قۇتتىقتاۋىندا.

سونداي-اق 2024 جىلعى جاستار استاناسى - لەنكوران قالاسى، ازەربايجان ەلىنىڭ وكىلدەرى جاستار استاناسى كىلتىن الماتى جاستارىنا تابىستاپ، باۋىرلاستىق ەستافەتاسىن جالعادى.

Abai.kz