مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋى قارساڭىندا پرەمەر-ءمينيستردىڭ جانە ۇكىمەت مۇشەلەرىنىڭ قاتىسۋىمەن «AMANAT» پارتياسى فراكتسياسىنىڭ كەڭەيتىلگەن وتىرىسى ءوتتى. دەپۋتاتتار پرەزيدەنتتىڭ جولداۋلارى مەن «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» سايلاۋالدى باعدارلاماسىنىڭ جۇزەگە اسىرىلۋ بارىسى تۋرالى اقپاراتتى تىڭدادى.

سۋرەتتى تۇسىرگەن: ءالي عالىم

ءىس-شارانى اشقان ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ ءار جولداۋ – ەل دامۋىنىڭ ستراتەگيالىق باعىتىن ايقىندايتىنىن جانە ازاماتتاردىڭ ەڭ وزەكتى سۇراقتارىنا جۇيەلى جاۋاپ بەرەتىنىن اتاپ ءوتتى.

«مەملەكەت باسشىسىنىڭ جولداۋلارى، پرەزيدەنتتىڭ سايلاۋالدى باعدارلاماسى – ماڭىزدى قۇجاتتار. ال ولاردىڭ ساپالى ورىندالۋى – قوعامنىڭ بيلىككە دەگەن سەنىمىنىڭ كەپىلى. ادامدار ناقتى وزگەرىستەردى ءدال قازىر كورگىسى كەلەدى. سول سەبەپتى ءبىزدىڭ، ياعني زاڭ شىعارۋشىلار مەن ۇكىمەتتىڭ ورتاق مىندەتى – تاپسىرمالاردى ساپالى ءارى دەر كەزىندە ورىنداۋ. سوندىقتان ءار ساياسي ماۋسىم باسىندا ۇكىمەتپەن «ساعات سايكەستەندىرۋ» تاجىريبەسىن ەنگىزۋىمىز كەزدەيسوق ەمەس. بۇگىنگە دەيىن اتقارىلعان جۇمىستى باعامداپ، قاي ماسەلەگە باسا نازار اۋدارۋ كەرەك ەكەنىن ايقىندايمىز»، – دەدى ەرلان قوشانوۆ.

سۋرەتتى تۇسىرگەن: ءالي عالىم

ءوز كەزەگىندە، پرەمەر-مينيستر ولجاس بەكتەنوۆ پرەزيدەنت جولداۋلارى مەن سايلاۋالدى باعدارلاماسىن جۇزەگە اسىرۋ بويىنشا ۇكىمەت تاراپىنان اتقارىلعان جۇمىسقا توقتالدى.

ماسەلەن، بىلتىر شەتەلدىك كاپيتالدىڭ قاتىسۋىمەن 1,3 ملرد. اقش دوللارى سوماسىنا 45 جوبا پايدالانۋعا بەرىلدى. جالپى العاندا، جالپىۇلتتىق پۋلعا قۇنى 144 ملرد. اقش دوللارىن قۇرايتىن 1,1 مىڭنان استام جوبا كىرەدى. جىل باسىنان بەرى ونەركاسىپ ءوندىرىسىنىڭ ءوسىمى بىلتىرعى كورسەتكىشتەن 6,9%-عا اسىپ ءتۇستى. بيىل 20 مىڭنان استام جۇمىس ورنىن اشا وتىرىپ، 1,5 ترلن تەڭگە سوماسىنا 190 جاڭا وڭدەۋشى ونەركاسىپ كاسىپورنىن ىسكە قوسۋ جوسپارلانۋدا.

ۇكىمەت باسشىسى «كەلەشەك مەكتەپتەرى» ۇلتتىق جوباسىنا جەكە توقتالدى. ونىڭ اياسىندا 310 مىڭ ورىندىق 160 مەكتەپ سالىندى. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە وڭىرلەردە 540 مەديتسينالىق نىسان پايدالانۋعا بەرىلدى. ولار شامامەن 1 ملن اۋىل تۇرعىنىن قامتيدى. بۇل – حالىقتىڭ الەۋمەتتىك ءال-اۋقاتىن ارتتىرۋ جونىندەگى پرەزيدەنت ساياساتىنىڭ ايقىن كورسەتكىشتەرى.

«ءتاريفتى ينۆەستيتسياعا ايىرباستاۋ» باعدارلاماسى اياسىندا 2 جىلدا 12 مىڭ شاقىرىمنان استام ينجەنەرلىك جەلىنى جوندەۋگە 600 ملرد تەڭگەدەن استام قاراجات تارتىلىپ، ناتيجەسىندە اتالعان جەلىلەردىڭ توزۋىن 6,2%-عا تومەندەتۋگە مۇمكىندىك بەردى. بيىل كولىك سالاسىندا 13 مىڭ شاقىرىم جول جوندەۋ جانە سالۋ جۇمىسى قولعا الىندى. ال تەمىرجول سالاسىندا «دوستىق-مويىنتى» ۋچاسكەسىنىڭ ەكىنشى جولدارىن سالۋ جۇمىسى اياقتالۋدا. تسيفرلاندىرۋ سالاسىندا IT-قىزمەتتەر ەكسپورتىنىڭ ءوسىمى بايقالدى. ياعني، كورسەتكىش 2021 جىلى 30 ملن دوللاردان 2024 جىلى 700 ملن اقش دوللارىنا دەيىن ارتتى.

ۇكىمەت الەۋمەتتىك-ەكونوميكالىق دامۋ بولجامىن جانە الداعى ءۇش جىلدىق كەزەڭگە ارنالعان رەسپۋبليكالىق بيۋدجەت جوباسىن ماقۇلداپ، پارلامەنتكە ەنگىزدى. وعان سايكەس، الداعى ءۇش جىلدا ەكونوميكانىڭ ناقتى ورتاشا جىلدىق ءوسىمى 5,3%-دى قۇرايدى.

سۋرەتتى تۇسىرگەن: ءالي عالىم

ولجاس بەكتەنوۆ ۇكىمەت پرەزيدەنت باستاماسىمەن قولعا الىنعان «تازا قازاقستان» جوباسى مەن «زاڭ جانە ءتارتىپ» قاعيداتىن جۇزەگە اسىرۋ بويىنشا بەلسەندى جۇمىس ىستەپ جاتقانىن ايتتى.

«مەملەكەت باسشىسى ۇستانعان باعىت ارقىلى ەل ەكونوميكاسى تۇراقتى وسىمگە قول جەتكىزدى. ءبىز ءۇشىن باسىم باعىت سانالاتىن وڭدەۋ ونەركاسىبىندە وڭ ءۇردىس ساقتالدى. تاۋ-كەن ونەركاسىبىندەگى سيرەك جانە جەردە سيرەك كەزدەسەتىن مەتالداردى يگەرۋ ورىندارىنان ءوسىمنىڭ تىڭ مۇمكىندىكتەرىن كورىپ وتىرمىز. پارلامەنتپەن تىعىز جۇمىس ىستەپ، العا قويىلعان بارلىق مىندەتتى ورىنداۋدى جالعاستىرامىز. ءبىزدىڭ ورتاق ماقساتىمىز – الداعى ۋاقىتتاعى تۇراقتى دامۋدى قامتاماسىز ەتۋ»، – دەدى ول.

جيىن بارىسىندا پرەمەر-مينيستر مەن ۇكىمەت مۇشەلەرى فراكتسيا دەپۋتاتتارىنىڭ سۇراقتارىنا جاۋاپ بەردى. بۇل سۇراقتار ەكونوميكانى دامىتۋدى، بيزنەستى، اۋىل شارۋاشىلىعىن، ءوندىرىستى قولداۋدى، ازاماتتاردىڭ تابىسىن ارتتىرۋدى، الەۋمەتتىك ساياساتتى جاقسارتۋدى، وڭىرلەردىڭ ينفراقۇرىلىمدىق دامۋىنىڭ ناقتى ماسەلەلەرىن شەشۋدى جانە وزگە دە تاقىرىپتاردى قامتىدى.

جيىندى قورىتىندىلاي كەلە، ءماجىلىس توراعاسى ەرلان قوشانوۆ مەملەكەت باسشىسىنىڭ جولداۋلارىندا جانە سايلاۋالدى باعدارلاماسىندا قامتىلعان بارلىق تاپسىرما ەلدىڭ تۇراقتى دامۋى مەن حالىقتىڭ تۇرمىسىن جاقسارتۋدى قامتاماسىز ەتە وتىرىپ، جۇيەلى تۇردە جۇزەگە اسىرىلىپ جاتقانىن اتاپ ءوتتى. كۇردەلى گەوساياسي جاعدايعا قاراماستان، ۇكىمەت پەن اكىمدەر ەكونوميكا ءوسىمىن قامتاماسىز ەتتى، مەملەكەتتىڭ بارلىق الەۋمەتتىك مىندەتتەمەلەرى ورىندالۋدا، ينفراقۇرىلىمدىق جوبالار كەشەندى تۇردە قولعا الىنىپ جاتىر.

سونىمەن قاتار ءماجىلىس سپيكەرى ۇكىمەت نازارىن اۋدارۋدى تالاپ ەتەتىن بىرقاتار باعىتتى ايقىنداپ بەردى. ماسەلەن، اۋىل تۇرعىندارىنىڭ تابىسىن ارتتىرۋعا باعىتتالعان «اۋىل اماناتى» پارتيالىق جوباسىن تۇراقتى قارجىلاندىرۋ جانە ەگىنشىلىككە، قۇس شارۋاشىلىعىنا، مال شارۋاشىلىعىنا ۇيرەتەتىن «اگروساۋات» ورتالىقتارىنىڭ اشىلۋىن جەدەلدەتۋ قاجەت. ول مەملەكەت باسشىسى بىلتىرعى جولداۋىندا بۇل جوباعا قولداۋ ءبىلدىرىپ، ونى ەل اۋماعىندا تاراتۋدى تاپسىرعانىن ەسكە سالدى. الايدا وسى ماسەلە ءالى دە كەيىنگە قالدىرىلىپ كەلەدى.

سۋرەتتى تۇسىرگەن: ءالي عالىم

سونداي-اق پارتيا توراعاسى جۇمىسسىزدىق دەڭگەيىن تومەندەتۋ جانە تۇرعىن ءۇي-كوممۋنالدىق شارۋاشىلىق رەفورماسىن اياقتاۋ جۇمىسىن كۇشەيتۋ قاجەت ەكەنىنە نازار اۋداردى. سونىمەن قاتار ول اقمولا وبلىسى تسەلينوگراد اۋدانىندا ءوز ناتيجەسىن كورسەتكەن «Baquatty audan» اۋىلدىق اۋماقتاردى كەشەندى دامىتۋ جونىندەگى پارتيالىق پيلوتتىق جوبا اياسىن كەڭەيتۋدى ۇسىندى.

ەرلان قوشانوۆ مۇنداي كەزدەسۋلەر ناقتى ناتيجە بەرەتىنىن اتاپ ءوتتى. سەبەبى دەپۋتاتتار وڭىرلەرگە ۇنەمى بارادى، ادامداردىڭ وزەكتى ماسەلەلەرىن جاقسى بىلەدى جانە ولاردى ۇكىمەتكە تىكەلەي جەتكىزە الادى. بۇل – «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىنىڭ ناقتى ىسكە اسقانىنىڭ ۇلگىسى. جازعى ساپارلاردا حالىق قالاۋلىلارى 900 ەلدى مەكەنگە بارىپ، 2000-عا جۋىق ازاماتپەن كەزدەسۋ وتكىزدى. تۇرعىندار تاراپىنان كەلىپ تۇسكەن بارلىق ۇسىنىس قازىر جۇيەلەنىپ جاتىر. مەملەكەتتىك ورگاندارمەن بىرلەسىپ، ولاردىڭ شەشىمىن تابۋ جولدارى قاراستىرىلادى.

«ۇكىمەت پەن پارلامەنتتىڭ ءوزارا ۇيلەسىمدى جۇمىس اتقارۋى – ءتيىمدى مەملەكەتتىك ساياساتتىڭ نەگىزى. ويتكەنى ءبارىمىزدىڭ ماقساتىمىز ءبىر. ول – ەلىمىزدىڭ وركەندەۋى، حالىقتىڭ تۇرمىس ساپاسىنىڭ جاقسارۋى. بۇل ءۇشىن پرەزيدەنتتىڭ سايلاۋالدى باعدارلاماسى مەن جولداۋلارىنداعى تاپسىرمالارى دەر كەزىندە ورىندالۋى ءتيىس. ورتاق مۇرات جولىندا جۇمىلا ارەكەت ەتكەندە عانا ءبىز ناقتى ناتيجەلەرگە قول جەتكىزەتىنىمىز انىق»، – دەدى پارتيا توراعاسى.

Abai.kz