ءبىز قالاساق تا، قالاماساق تا جاساندى ينتەللەكت ءومىرىمىزدىڭ بارلىق سالالارىنا تەرەڭدەي ەنەتىن بولادى. بۇل عالام دامۋىنا ءتان زاڭدىلىق. دەگەنمەن ءار ەل وسى دامۋ ءۇردىسىن ءوزىنىڭ ۇلتتىق مۇددەسىنە قاراي ىڭعايلاپ جاتىر. ويتكەنى جي دەگەن ءبىر قاراعاندا جانسىز، رۋحسىز، تسيفرلاندىرۋمەن عانا بايلانىستى  دۇنيە سياقتى  كورىنگەنىمەن ونىڭ ۇلتتىڭ ۇلت رەتىندە دامۋىنا دا اسەرى وراسان بولعالى تۇر.

جي قىزمەتى ۇلت زەيىنىمەن بايلانىستى. عىلىم، بىلىمنەن بولەك الەۋمەتتىك ءومىر مەن تۇرمىستىق قولدانۋعا قاتىستى بارلىق سالاعا دەيىن جاساندى ينتەللەكتىگە تاۋەلدى بولادى. ول تۇگىلى ۇلتتىڭ ءتىلى، ادەبيەتى، ونەرى، مۋزىكاسى، بار رۋحانياتى دا جاساندى ينتەللەكتى ارقىلى جاڭا قۇبىلىسقا ەنەدى. سونىڭ تىلىندە سويلەيدى، سونىڭ تىلىندە ءتىلى شىعادى. دامىعان ەلدەردەن جي-گە نەگىزدەلگەن، اعىلشىن، قىتاي، جاپون، تب تىلدەردە «سويلەيتىن» تەحنيكالار مەن تەحنولوگيالار، تسيفرلىق باعدارلامالار، باسقا دا ونىمدەر جاپپاي كەلە باستايدى. وسىنىڭ ءبارىن قازاق تىلىندە سويلەتۋ دە ستراتەگيالىق مىندەتتەردىڭ ءبىرى بولۋى شارت. ءبىر سوزبەن ايتقاندا ەلىمىزدە جاساندى ينتەللەكت ءتىلى قازاق ءتىلى بولۋعا ءتيىس.

جولداۋدا تسيفرلىق كودەكستى تەزىرەك قابىلداۋ قاجەت ەكەنى دە ايتىلدى.
بۇل زاڭدا تسيفرلاندىرۋ ۇدەرىسىنىڭ نەگىزگى باعىتتارى، سونىڭ ىشىندە جاساندى ينتەللەكت، پلاتفورمالىق ەكونوميكا، ۇلكەن دەرەكقورلاردى پايدالانۋ جانە باسقا دا ماسەلەلەر ايقىندالۋعا ءتيىس ەكەنى ايتىلدى. وسى زاڭدا جي-ءدىڭ ءتىلى ماسەلەسى دە كورىنىس تابۋعا ءتيىس.

سونداي-اق، پرەزيدەنت قويعان ستراتەگيالىق مىندەتتەردى جۇزەگە اسىراتىن «جاساندى ينتەللەكت جانە تسيفرلىق دامۋ مينيسترلىگى» قۇرىلاتىنى دا ايتىلدى. مەنىڭشە، وسى مينيسترلىكتىڭ ءبىر دەپارتامەنتى «جي-ءدى ۇلتتىق تىلگە بەيىمدەۋ دەپارتامەنتى» دەپ اتالسا دۇرىس بولار ەدى. قازىردىڭ وزىندە مەملەكەت جي -ءدىڭ قازاق تىلىندە سويلەۋىنە ەرەكشە نازار اۋدارىپ، ۇلكەن جۇمىستار جاسالىپ جاتىر. قازاق ءتىلىنىڭ ۇلتتىق ءتىل مودەلى جاسالدى. ءالى دە قولعا الىنۋعا ءتيىس جۇمىس وراسان.

پرەزيدەنت ايتقان 3 جىلدا تولىق تسيفرلاندىرىلعان مەملەكەت قۇرۋ مەجەسىنە جەتكەندە مەملەكەتتىك ءتىلدىڭ مەرەيى ۇستەم بولىپ تۇرۋعا ءتيىس.

ادىلبەك قابا

Abai.kz