وڭتۇستىك كورەي اسكەري تەحنولوگيادا جاڭا باعىتقا بەت بۇرۋدا. Korean Air كومپانياسى تانىستىرعان KUS-FX اتتى شاعىن راكەتو-درون بولاشاقتا اۋە سوعىستارىنىڭ سيپاتىن تۇبەگەيلى وزگەرتۋى مۇمكىن.

ۇزىندىعى ءتورت مەتر، سالماعى 220 كەلى بولاتىن بۇل شاعىن قاناتتى زىمىران 600 شاقىرىمنان استام قاشىقتىققا ۇشىپ، 20 كەلىگە دەيىن جۇك كوتەرە الادى. ونى اۋەدەن دە، جەردەن دە، ءتىپتى تەڭىز كونتەينەرىنەن دە ۇشىرۋ مۇمكىندىگى بار. كارىستەردىڭ جاڭا قارۋى قارسىلاستىڭ اۋە قورعانىسىن شارشاتىپ، پۆو جۇيەلەرىن جاپپاي سوققىمەن باسىپ تاستاۋعا ارنالعان.

مۇنداي تەحنولوگيالار بۇگىنگى تاڭدا تەك كورەي عانا ەمەس، امەريكالىق الپاۋىتتار دا وسى باعىتتا باسەكەلەسىپ كەلەدى. ايتالىق، Anduril كومپانياسىنىڭ Jackal, L3Harris-ءتىڭ Red Wolf جوبالارى وسىعان دالەل بولادى.

KUS-FX سولاردىڭ ىشىندە قاشىقتىق بويىنشا كوش باستاپ تۇر. مىسالى، Jackal-دىڭ جۇك كوتەرىمدىلىگى بار بولعانى 4, 5 كەلى، Red Wolf – 10 كەلى، Barracuda – 18 كەلى عانا. ال KUS-FX-ءتىڭ 20 كەلىلىك جۇكتەمەسى وعان باسەكەلەستەرىنەن ارتىقشىلىق بەرەدى. بىراق ونىڭ باستى ەرەكشەلىگى – ۇشۋدىڭ ۇزاقتىعى مەن 600 شاقىرىمدىق قاشىقتىعى. بۇل كورسەتكىش دروندى تەك تاكتيكالىق ەمەس، ستراتەگيالىق قارۋعا اينالدىرادى.

ەڭ قىزىعى – بۇل جۇيەنىڭ دايىن بولۋ مەرزىمى. 2029 جىلى العاشقى Block-1 نۇسقاسى عانا پايدا بولادى. ول ءالى سوعىسقا ارنالماعان، تەك بارلاۋ نەمەسە جالعان نىسانا ءرولىن اتقارادى. ال تولىققاندى جاۋىنگەرلىك Block-2 نۇسقاسى 2030-جىلدارى عانا جاسالادى دەپ كۇتىلۋدە. بۇدان زاماناۋي قارۋ-جاراق جاساۋدىڭ قانشالىقتى كۇردەلى ەكەنىن بايقاۋعا بولادى.

Korean Air-ءدىڭ بۇل جوباسى تەك امەريكالىق ۇلگىلەرمەن عانا ەمەس، سونىمەن بىرگە وڭتۇستىك كورەيدىڭ LIG Nex1 كومپانياسى جاساپ جاتقان 150 كەلىگە دەيىنگى سالماقتى قاناتتى زىمىرانمەن دە باسەكەگە تۇسپەك. دەمەك، كورەي ىشكى نارىقتا دا، حالىقارالىق دەڭگەيدە دە ناعىز «درون جارىسىنا» كىرىسكەنىن بايقاۋعا بولادى.

نۇرلان جۇماقانوۆ

Abai.kz