ءماجىلىس – ەلىمىزدىڭ ەڭ باستى زاڭ شىعارۋشى ورگانى. مۇندا ايتىلاتىن ءاربىر ءسوز، كوتەرىلەتىن ءار ماسەلە حالىقتىڭ مۇددەسىنە ساي بولۋى ءتيىس. ەندى بولاشاقتا ەلىمىز ءبىر پالاتالى پارلامەنتكە وتۋىمەن ‑ ونىڭ سالماعى ءتىپتى ارتپاق. ال قازىرگى ماجىلىستە كاسىبىي، ءبىلىمى مەن بىلىگى تۇرعىسىنان دەپۋتاتتار قاتارىندا ءارتۇرلى ادامدار ءجۇر.

سول سەبەپتى دە ءبىز ارنايى ساۋالناما جۇرگىزدىك. ماجىلىستەگى زاڭ شىعارۋشىلاردىڭ جۇمىسىنا قازاقستان قوعامى قانداي باعا بەرەتىنىن بىلۋگە تىرىستىق. ناتيجەسىن قاراڭىز:

ساۋالناما ناتيجەسىنە شولۋ

Abai.kz اقپاراتتىق پورتالى جۇرگىزگەن «2025 جىلى حالىقتىڭ نازارىندا بولعان دەپۋتاتتار كىمدەر؟» اتتى ساۋالنامانىڭ قارالىمى 10,9 مىڭ ادامدى قامتىدى.

ساۋالناما Usbanov ARNASY تەلەگرام ارناسىندا جۇرگىزىلدى. ساۋالنامانىڭ سايتتاعى قارالىمى – 3,4 مىڭ ادامدى قۇراسا، تەلەگرام پلاتفورماسىنداعى قارالىمى 7,5 مىڭ ادامدى قۇرادى. ساۋالناما: «PARANOIA.KZ»، «Ongar_online»، «Qaz365.kz»، «Ertenmedia» تەلەگرام ارنالارىندا رەپوستالدى.

ۇزىن-ىرعاسى 200-گە جۋىق پىكىر جازىلدى. بۇل پىكىرلەردىڭ ىشىندە حالىقتىڭ نازارىندا بولعان دەپۋتاتتار، حالىقتىڭ قاتال سىنىنا ۇشىراعان دەپۋتاتتار مەن پارلامەنتكە قاراتا ايتىلعان سىندار بولدى.

جەكەلەگەن دەپۋتاتتار بويىنشا باعا:

سۋرەت: parlam.kz سايتىنان الىندى.

ءبىرىنشى ورىن: حالىقتىڭ كوڭىلىنەن كوبىرەك شىققان دەپۋتات – باقىتجان بازاربەك. رەسپوندەنتتەر باقىتجان بازاربەككە (37 پىكىر) وڭ باعاسىن بەرگەن. دەيتۇرا، باقىتجان بازاربەككە قاتىستى دا جۇرت پىكىرى ەكىۇشتى.

رەسپوندەنتتەردىڭ ءبىر توبى – «ب.بازاربەكتىڭ زاڭسىز الىنعان جەرلەر مەن مۇلىكتەردى مەملەكەت مەنشىگىنە قايتارۋ، كوررۋپتسيانى اشەكەرەلەۋ، ونىڭ الدىن الۋ تۋرالى قىزمەتى جوعارى دەڭگەيدە»، - دەپ باعالاسا، تاعى ءبىر توبى – «باقىتجان بازاربەك تە جولداۋدان سوڭ وزگەرىپ كەتتى. ءبىر پالاتالى پارلامەنتكە تەك پارتيالىق تىزىممەن بارادى دەگەن پىكىردى قولداپ وتىر. دەموكراتيا ءبىر قادام ارتقا كەتتى»، - دەگەن پىكىردە.

باقىتجان بازاربەك – ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى. جاسى – 44-تە. ءبىر مانداتتى سايلاۋ وكرۋگى بويىنشا سايلانعان. ماماندىعى – زاڭگەر، قۇقىق قورعاۋشى.

سۋرەت: parlam.kz سايتىنان الىندى.

ەكىنشى ورىن: رەسپوندەنتتەردىڭ كوپ داۋىس بەرگەن دەپۋتاتى – قازىبەك يسا. رەسپوندەنتتەردىڭ دەنى دەپۋتات قازىبەك يسانىڭ (16 پىكىر) جۇمىسىنا وڭ باعا بەرىپ، حالىق كوزىنە ءجيى كورىنىپ جۇرگەن دەپۋتاتتاردىڭ قاتارىنا قوسادى.

ساۋالناماعا قاتىسۋشىلاردىڭ ورتاق پىكىرى – «قازىبەك يسا ۇلتتىق مۇددە دەگەندە بىرازعا بارادى. ول ناعىز ۇلتشىل ادام»، دەگەنگە سايادى. رەسپوندەنتتەر قازىبەك يسانىڭ «ءتىل ءۇشىن كۇرەسىن» وڭ باعالاعان.

قازىبەك يسا – ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى. جاسى – 63-تە. «اق جول» دەموكراتيالىق پارتياسىنىڭ مۇشەسى. ءماجىلىستىڭ 7-ءشى جانە 8-ءشى شاقىرىلىمدارىنا پارتيا تىزىمىمەن بارعان.

سۋرەتتەر: parlam.kz سايتىنان الىندى.

ءۇشىنشى ورىن ەكەۋ:

1. ساۋالناما قاتىسۋشىلارىنىڭ وڭ باعاسىن كوبىرەك العان دەپۋتاتتاردىڭ ءبىرى – ەدىل جاڭبىرشين.

رەسپوندەنتتەردىڭ كوبى دەپۋتات ەدىل ءجاڭبىرشيننىڭ جۇمىسى حالىق كوزىنە كورىنىپ ءجۇر دەپ ەسەپتەيدى (15 پىكىر). دەسە دە، «سوڭعى كەزدەرى ەدىل ءجاڭبىرشيننىڭ ءۇنى باسەڭدەپ قالعان»، دەگەن پىكىرلەر دە جوق ەمەس. ءتىپتى، رەسپوندەنتتەردىڭ كەيبىرى – «ەدىل جاڭبىرشين قايدا كورىنبەي كەتتى؟» دەپ سۇراۋ سالۋدا.

ەدىل جاڭبىرشين – ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى. جاسى – 59-دا. «Amanat» پارتياسىنىڭ مۇشەسى. ماجىلىسكە پارتيالىق تىزىممەن وتكەن.

2. ءماجىلىس دەپۋتاتتارىنىڭ ىشىندە حالىق اتىن اتاپ، ءتۇسىن تۇستەگەن، جۇمىسى كورىنىپ ءجۇر دەگەن دەپۋتاتتاردىڭ ءبىرى – رينات زايىت.

رەسپوندەنتتەر رينات زايىتتىڭ اتىن ەدىل جاڭبىرشينمەن تەڭ اتايدى (15 پىكىر). الايدا، جاڭبىرشيننەن زايىتتىڭ ايىرماشىلىعى – رەسپوندەنتتەر رينات زايىتتى قۇر ءسوزدىڭ ادامى دەگەندى كوبىرەك ايتادى. ساۋالناما قاتىسۋشىلارىنىڭ رينات زايىتقا قاتىستى پىكىرى ەكىۇشتى. ءبىر ءتوبى – «رينات زايىتتىڭ كوشى ىلگەرى. ايتۋىنداي-اق ايتىپ ءجۇر»، - دەسە، تاعى ءبىر ءتوبى – «رينات ايتادى، بىراق، ايتقاندارىنىڭ ءبىرى دە ورىندالىپ جاتقان جوق. ول سىلدىر ءسوزدىڭ ادامى، ءىستىڭ ادامى ەمەس. ءىس ىستەيتىن ادام كوپىرمە سوزگە، ماقتانعا جول بەرمەيدى»، - دەيدى.

رينات زايىت – ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى. جاسى – 41-دە. «Amanat» پارتياسىنىڭ مۇشەسى. ءماجىلىستىڭ 8-ءشى شاقىرىلىمدارىنا پارتيالىق تىزىممەن وتكەن.

سۋرەتتەر: parlam.kz سايتىنان الىندى.

ءتورتىنشى ورىن: رەسپوندەنتتەر اتىن ءجيى اتاعان دەپۋتاتتاردىڭ ىشىندە ءتورتىنشى ورىن قوس بىردەي دەپۋتاتقا تەڭ ءتيىپ تۇر. ولار – ەرمۇرات باپي مەن اسحات ايماعامبەتوۆتەر.

رەسپوندەنتتەر باپي مەن ايماعامبەتوۆكە قاتىستى 12 پىكىردەن جازعان.

اسحات ايماعامبەتوۆكە قاتىستى ساۋالناما قاتىسۋشىلارى: «اسحات ايماعامبەتوۆتەن وزگەسى لايىقسىز. اسحات كاسىبي دەپۋتات»، - دەيدى. ال ەرمۇرات باپيگە قاتىستى جۇرت: «ماجىلىستە ناعىز ۇلتشىل، قازاقتى ويلايتىن ادام تىم از. سولاردىڭ ءبىرى – ەرمۇرات باپي»، - دەيدى.

اسحات ايماعامبەتوۆ – ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى. جاسى – 43-تە. 2023 جىلعى قاڭتارعا دەيىن - قازاقستان رەسپۋبليكاسىنىڭ وقۋ-اعارتۋ ءمينيسترى بولعان. «Amanat» پارتياسىنىڭ مۇشەسى. ءماجىلىستىڭ 8-ءشى شاقىرىلىمىنا پارتيالىق تىزىممەن وتكەن.

ەرمۇرات باپي – ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى. جاسى – 66-دا. ءبىر مانداتتى سايلاۋ وكرۋگى بويىنشا سايلانعان. ماماندىعى – جۋرناليست، باسپاگەر.

سۋرەت: parlam.kz سايتىنان الىندى.

بەسىنشى ورىن: رەسپوندەنتتەر جۇمىسىن وڭ باعالاعان دەپۋتاتتاردىڭ ءبىرى – ابزال قۇسپان. ساۋالناما قاتىسۋشىلارى دەپۋتات ا.قۇسپاننىڭ جۇمىسىنا قاتىستى 11 پىكىر جازعان.

ساۋالناما قاتىسۋشىلارىنىڭ ءبىر توبى: «وزگەلەرگە قاراعاندا ابزال قۇسپاننىڭ جۇمىسى جۇرتقا كوبىرەك كورىنەدى. ءماجىلىس مىنبەرىندە دە، الەۋمەتتىك جەلىدە دە بەلسەندى. پىكىرىن اشىق ايتىپ جۇرەدى»، - دەيدى. ال تاعى ءبىر توپ رەسپوندەنت: «ابزال دا جەكە پيارى ءۇشىن جانتالاسىپ جۇرگەندەردىڭ ءبىرى»، - دەپ پىكىر بىلدىرەدى.

ابزال قۇسپان – ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى. جاسى – 47-دە. ماماندىعى – زاڭگەر. ءماجىلىستىڭ 8-ءشى شاقىرىلىمىنا ءبىر مانداتتى سايلاۋ وكرۋگى بويىنشا سايلانعان.

بۇلار ماجىلىستەگى جۇمىسى حالىق كوزىنە كورىنىپ جۇرگەن. ماقتاۋى دا، سىنى دا قاتار ايتىلاتىن ۇزدىك بەستىكتىڭ ءتىزىمى.

رەسپوندەنتتەردىڭ تاعى ءبىر بولىگى: «ەشبىر دەپۋتاتتىڭ اتى جەكەلەپ اتاۋعا لايىقسىز»، - دەپ ەسەپتەيدى (10 پىكىر).

ساۋالناما قاتىسۋشىلارى: «ەشقايسىسى لايىق ەمەس. ايتار سوزدەرىن الدىن-الا كەلىسىپ، رۇقساتپەن ايتادى. دەپۋتاتتاردا بيلىك جوق. ەشتەڭە شەشپەيدى، شەشە المايدى. ادىلەتتى سايلاۋسىز بارعان دەپۋتاتتاردىڭ ەشبىرى حالىق باعاسىنا لايىق ەمەس»، - دەيدى.

پارتيالار بويىنشا جالپى باعا:

سۋرەتتەر: amanatpartiasy.kz, akzhol.kz سايتتارىنان الىندى.

بۇلاردان بولەك، «جاساعان جۇمىستارى حالىق كوزىنە كورىنىپ ءجۇر» دەپ، اتتارىن اتاعان ءبىرسىپىرا دەپۋتات بار. ساۋالناما قاتىسۋشىلارى ولار تۋرالى 5 پەن 10-نىڭ ارالىعىندا پىكىر جازدى. ولار:

«Amanat» پارتياسىنان: ەلنۇر بەيسەنباەۆ، نارتاي سارسەنعاليەۆ، جارقىنبەك امانتاي، مۇرات ابەنوۆ، ەرلان سايىروۆ، ماقسات تولىقباي، ءۇنزيلا شاپاق. جيىنتىعى – 20 پىكىر.

باعا: بۇل پارتيا پارلامەنتتەگى دومينانت باسىمدىققا يە پارتيا بولعاندىقتان، ونىڭ مۇشەلەرىنىڭ كوپتەپ اتالۋى زاڭدىلىق. اتالعان پارتيانىڭ قۇرامىندا كاسىبي، بىلىكتى ماماندار از ەمەس. ولاردىڭ پارلامەنتتەگى جۇمىسى دا كوزگە كورىنبەيدى دەۋگە بولمايدى. پارتيا دەپۋتاتتارىنىڭ اتى ءجيى ايتىلۋى – پارلامەنتتەگى ۇلەسىنە قاراي، پروپورتسيونالدى.

اتالعان پارتيا دومينانتتى داۋىسقا يە بولعاندىقتان، ۇكىمەت قۇرامىن جاساقتاۋدا جانە زاڭدار قابىلداۋدا ايقىن باسىمدىققا يە. سايكەسىنشە، ۇكىمەت پەن پارلامەنت جۇمىسىنداعى ساتسىزدىك ءۇشىن دە جاۋاپكەرشىلىك ەڭ اۋەلى – وسى پارتياعا تيەسىلى. دەمەك، سۇراۋ دا ەڭ اۋەلى وسى پارتيادان بولماق!

«اق جول» دەموكراتيالىق پارتياسىنان: ازات پەرۋاشەۆ، دانيا ەسپاەۆا. بارلىعى – 14 پىكىر.

باعا: «اق جول» پارلامەنتتەگى تاجىربيەلى پارتيالاردىڭ ءبىرى. ءبىزدىڭ ساۋالنامامىزدا اتالعان پارتيانىڭ ءۇش بىردەي دەپۋتاتىنىڭ اتى اتالادى. ال ماجىلىستە اتالعان پارتيادان بار بولعانى 6 دەپۋتات. سول سەبەپتى دە، رەسپوندەنتتەردىڭ اتالعان پارتيا دەپۋتاتتارىن اتاۋى – ونىڭ جۇمىسىنا بەرىلگەن باعا بولىپ ەسەپتەلەدى.

سۋرەتتەر: auyl.kz, qhp.kz, informburo.kz سايتتارىنان الىندى.

ماجىلىستە بارلىعى 6 ساياسي پارتيا بار ەكەنىن ەسكەرسەك، ساۋالناما قاتىسۋشىلارى 3 ساياسي پارتيانىڭ دەپۋتاتتارىن عانا اتاپ كورسەتەدى. ال اتتارى ءھام دەپۋتاتتارى مۇلدە اتالماعان پارتيالار – «اۋىل» حدپپ - 8 دەپۋتات;  قحپ - 5 دەپۋتات;   جسدپ - 4 دەپۋتات.

رەسوندەنتتەردىڭ ىشىندە جالعىز پىكىرشى ايداربەك قوجانازاروۆتىڭ اتىن اتادى دەمەسەڭىز، «Respublica» پارتياسىنىڭ دەپۋتاتتارى دا جۇرت نازارىنان تىس قالعان دەۋگە ابدەن بولادى. ال اتالعان پارتيا ماجىلىسكە 6 دەپۋتات كىرگىزگەن.

باعا: ءبىزدىڭ الەۋمەتتىك ساۋالنامامىز ءماجىلىستىڭ جالپى جۇمىسىنا بەرىلگەن اقىرعى باعا ەمەس. دەسە دە، بۇل ساياسي پارتيالاردىڭ بىردە-ءبىر دەپۋتاتىنىڭ اتتارى اتالماۋى – اتالعان پارتيالاردىڭ بەلسەندىلىگىنە قاتىستى ۇلكەن كۇمان تۋدىرادى.

تاعى ءبىر ەسكەرەتىن ماسەلە:

جوعارىدا كورسەتىلگەندەي، العاشقى اتالعان بەلسەندى دەپۋتاتتاردىڭ  ۇشەۋى ءبىر مانداتتى سايلاۋ وكرۋگى بويىنشا سايلانعان بولىپ شىقتى. ال، ولاردىڭ ماجىلىستەگى سانى بار‑جوعى 7 دەپۋتات. سوعان قاراماستان، ولار 62 دەپۋتاتى بار «امانات» پارتياسىمەن ءبىر قاتاردا تۇر (3 دەپۋتات). باسقا پارتيالار «پارتياسىزدارعا» جەتە الماي قالدى.

سوندىقتان، بولاشاقتا «ءبىر مانداتتى سايلاۋ وكرۋگىن الىپ تاستاۋ» تۋرالى ماسەلە  قوعامدا قىزۋ پىكىرتالاس تۋدىرادى دەپ بولجاۋعا بولادى. ويتكەنى، ساۋالناما كورسەتكەندەي، «پارتيالىق ءتىزىم ‑ پارلامەنت بەدەلىن ارتتىرادى» دەگەن ەرەجە ازىرگە شىندىققا جاناسپاي تۇر.

رەسپوندەنتتەر قاتال سىناعان دەپۋتاتتار:

سۋرەتتەر: parlam.kz سايتىنان الىندى.

ءبىزدىڭ بۇل ساۋالنامامىزعا قاتىسۋشىلاردىڭ ىشىندە اتى ءجيى اتالعان ءبىر دەپۋتات – ارداق نازاروۆ بولدى (بارلىعى 8 پىكىر).

رەسپوندەنتتەردىڭ ىشىندە بىرەن-سارانى – «ارداق نازاروۆ رۋحى مىقتى ازامات. ەل ءۇشىن رياسىز جۇمىس جاسايتىندار قاتارىنا قوسامىز»، - دەسە، ساۋالناما قاتىسۋشىلارىنىڭ دەنى دەپۋتات ا.نازاروۆقا قاتىستى نەگاتيۆتى پىكىر بىلدىرگەن.

پىكىرشىلەردىڭ باسىم كوپشىلىگى: «نازاروۆقا قالاي كوڭىلىڭ تولادى، ءماجىلىستى ساحناعا اينالدىرىپ جىبەردى عوي. ەندى «توست» ايتۋلارى قالدى. مۇلدەم پايداسىز، پوپۋليست دەپۋتاتتىڭ ءبىرى – نازاروۆ. وندايلاردى ماجىلىسكە جولاتپاۋ كەرەك»، - دەيدى.

ارداق نازاروۆ – ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى. جاسى – 45-تە. ءماجىلىستىڭ 8-ءشى شاقىرىلىمىنا ءبىر مانداتتى سايلاۋ وكرۋگى بويىنشا سايلانعان.

ساۋالناما قاتىسۋشىلارىنىڭ نەگاتيۆتى پىكىرى كوپ ايتىلعان دەپۋتاتتاردىڭ ءبىرى – داۋلەت مۇقاەۆ (5 پىكىر).

رەسپوندەنتتەر دەپۋتات داۋلەت مۇقاەۆقا قاتىستى ءپوزيتيۆتى پىكىر بىلدىرگەن جوق. ال پىكىرشىلەردىڭ دەنى: «داۋلەت مۇقاەۆ مانداتىن تاپسىرۋى كەرەك. مۇقاەۆ باياعىشا جۇرە بەرگەنى دۇرىس ەدى. دەپۋتاتتىڭ ايلىعىن Instagram-نان-اق تابار ەدى. كىم-كىمدى دە اتاققۇمارلىق قۇرتىپ تۇر عوي»، - دەيدى.

داۋلەت مۇقاەۆ – ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى. جاسى – 33-تە. ءماجىلىستىڭ 8-ءشى شاقىرىلىمىنا ءبىر مانداتتى سايلاۋ وكرۋگى بويىنشا سايلانعان.

ماجىلىسكە ايتىلعان جالپى سىن:

پارلامەنتكە (ماجىلىسكە) ايتىلعان سىني پىكىرلەر از بولعان جوق. سونداي پىكىرلەردىڭ ءبىرسىپىراسى: «ايتقىش دەپۋتاتتار كوپ بولعانىمەن، ناقتى جۇمىس اتقارعان، زاڭ جوباسىن جاساعان دەپۋدات كورمەدىم. بارلىعى كوزبوياۋشىلىق»، - دەيدى.

رەسپوندەنتتەردىڭ تاعى ءبىر قاۋىمى: «ءار ءماجىلىس سايىن كەلىپ، ەشتەڭە بىتىرمەيتىن، ورىندىق توزدىرىپ جۇرگەندەردى وتستاۆكاعا جىبەرۋ كەرەك. دەپۋتاتتاردىڭ نەمەن اينالىسىپ جۇرگەنى بەلگىسىز. حالىق قالاۋلىلارى دەگەن اتتارى بار، بىراق حالىقتى قولدايتىن جۇمىستارى كورىنبەيدى. دەپۋتتاتتاردىڭ مەملەكەتتىڭ اقشاسىن بوسقا قۇرتقاننان باسقا تيگىزىپ وتىرعان پايدالارى شامالى. ايلىقتارى ميلليون، ال ناعىز جۇمىسشى حالىقتىڭ ايلىعى 85 مىڭ. شىعارىپ، قابىلداپ وتىرعان زاڭدارى مۇلدەم ميعا قونىمسىز»، - دەيدى.

ءماجىلىستىڭ جۇمىسىنا وڭ باعا بەرگەن رەسپوندەنتتەر دە جوق ەمەس. ولار: «سوڭعى سايلانىمداعى جىگىتتەر مىقتى. وليگارحتاردىڭ الماتىداعى قورشاپ ساعان ءزاۋلىم ۇيلەرىن، جەمقورلىقتى، زاڭسىزدىقتاردى اشىق ايتىپ، سىناپ، ولارمەن كۇرەسىپ جۇرگەن دەپۋتاتتار دا جەتەرلىك. دۇرىس باعىتتاعى دەپۋتاتتار از ەمەس»، - دەيدى.

ءتۇيىن: 2027 جىلى ۇلكەن ەلەكتورالدى ناۋقان كەلە جاتىر. ال ەلىمىزدىڭ ەڭ باستى زاڭ شىعارۋشى ورگانى سانالاتىن – ءماجىلىستىڭ ءباسى ارتپاق. ولاي دەيتىنىمىز – قازاقستان ءبىر پالاتالى پارلامەنتكە اۋىسقان جاعدايدا، ءماجىلىس ەلدەگى بىردەن-ءبىر زاڭ شىعارۋشى ورگان بولادى. ونداي جاعدايدا، ماجىلىسكە ناعىز كاسىبي دەپۋتاتتار كەرەك بولادى. ويتكەنى، بۇل وزگەرىس ەلدەگى زاڭ شىعارۋ ءىسىن جىلدامداتىپ قانا قويمايدى، وعان جاۋاپكەرشىلىك تە ەكى ەسە ارتادى. دەمەك، قاتەلەسۋگە ورىن جوق!

ەندەشە، ءبىزدىڭ رەسپوندەنتتەرىمىز ءادىل باعاسىن بەرگەن ساياسي پارتيالار مەن سول رەسپوندەنتتەر «قالىڭ ۇيقىدا» دەپ باعالاعان ساياسي پارتيالاردىڭ ءوز جۇمىسىن كورسەتەتىن كەزەڭى – ءدال قازىرگى ۋاقىت دەر ەدىك.

ساۋالنامانى جاساعان: نۇرگەلدى ابدىعانيۇلى

Abai.kz