استانادا نازارباەۆ اۋلەتىنە قاتىستى تاعى ءبىر ءىس قوزعالدى. باس پروكۋراتۋراعا قاراستى اكتيۆتەردى قايتارۋ كوميتەتى نازارباەۆ ن.ب. ەسىمدى ازاماتتى سوتقا بەرىپ وتىر.

جاۋاپكەردىڭ بولات نازارباەۆتىڭ ۇلى، 41 جاستاعى نۇربول نازارباەۆ بولۋى مۇمكىن دەگەن بولجام ايتىلدى، دەپ حابارلايدى Ertenmedia.

ازىرگە سوت تالقىسىنا تۇسكەن ءىستىڭ ءمان-جايى اشىلعان جوق. سوت تا، كوميتەت تە ءىستىڭ قۇپيالىعىنا سىلتەپ، ناقتى مالىمەت بەرمەگەن. ادەتتە مۇنداي قۇپيالىق اكتيۆتىڭ قۇنى اۋقىمدى بولعاندا عانا قولدانىلادى.

بىزگە جەتكەن مالىمەت بويىنشا، ب.ن-نىڭ مۇراگەرىنە قاتىستى قوزعالعان ءىس جىلجىمايتىن مۇلىك، كاسىپورىندار، اكتسيالار جانە باعالى زاتتاردىڭ توڭىرەگىندە (شامامەن 105 ملن دوللار) ءوربيدى.

ايتا كەتەيىك، 8 قىركۇيەكتەگى جولداۋىندا پرەزيدەنت توقاەۆ اكتيۆتەردى قايتارۋ كوميتەتىنىڭ اتقارعان جۇمىسىنا جاقسى باعا بەرگەن بولاتىن. سونىمەن قاتار بۇل ورگاندى ينۆەستورلار قۇقىعىن قورعاۋ كوميتەتى ەتىپ قايتا قۇرۋدى ۇسىنعان ەدى. ساراپشىلار وسى مالىمدەمەنى بيلىك ەليتا اراسىنداعى «ەسكى» جانە «جاڭا قازاقستاننىڭ» ءوزارا تەكەتىرەسى اياقتالىپ، ەندى كەلىسسوز كەزەڭىنە ءوتۋى مۇمكىن دەپ باعالاعان.

نۇربول نازارباەۆ 2011-2017 جىلدارى الماتى وبلىستىق ىشكى ىستەر دەپارتامەنتىندە، سونىڭ ىشىندە دەپارتامەنت باسشىسىنىڭ ورىنباسارى قىزمەتىن اتقارعان. 2017 جىلدان باستاپ Prime Capital Holding ينۆەستيتسيالىق قورىن قۇرىپ، باقىلاۋ كەڭەسىن باسقارعان.

ەسكە سالساق، بۇعان دەيىن اقمولا وبلىسى جەر رەسۋرستارىن باسقارۋ دەپارتامەنتى بۋراباي كۋرورت ايماعىنداعى ەليتالى جەر تەلىمدەرىن قايتارۋ بويىنشا سوتتاسىپ جاتقان بولاتىن. بۇل اۋماقتار اراسىندا نازارباەۆ اۋلەتىنە تيەسىلى جەرلەر دە بار ەكەنى ايتىلعان ەدى.

Abai.kz