جالپى، ساپار اياسىندا قاسىم-جومارت توقاەۆتىڭ پرەزيدەنتتەرمەن، پرەمەر-مينيسترلەرمەن، مينيسترلەرمەن، حالىقارالىق ۇيىمداردىڭ جانە كومپانيالاردىڭ جەتەكشىلەرىمەن 20-دان استام كەزدەسۋى ءوتتى.

جۇزدەسۋلەردە قاراستىرىلعان ماسەلەلەر اۋىل شارۋاشىلىعى، ءبىلىم بەرۋ، سپورت، ينۆەستيتسيادان باستاپ جاساندى ينتەللەكتىگە دەيىنگى كوپتەگەن باعىتتى قامتىدى.

ەلىمىزگە ميللياردتاعان دوللار ينۆەستيتسيا تارتۋ جونىندە ۋاعدالاستىققا قول جەتكىزىلدى. قازاقستان مەن اقش-تىڭ ءىرى كومپانيالارى اراسىندا 11 كەلىسىم مەن مەموراندۋمعا قول قويىلدى. كولىك-لوگيستيكا، ەنەرگەتيكا جانە اقپاراتتىق تەحنولوگيالار سياقتى ستراتەگيالىق تۇرعىدان ماڭىزدى سالالاردى قامتيتىن قۇجاتتاردا ەل ەكونوميكاسىنا 5,2 ميلليارد دوللار كولەمىندە ينۆەستيتسيا تارتۋ كوزدەلگەن.

پرەزيدەنت امەريكانىڭ ءىرى كومپانيالارىنىڭ باسشىلارىمەن كەلىسسوز جۇرگىزدى.

اتاپ ايتقاندا:

– PepsiCo قورى ديرەكتورلار كەڭەسىنىڭ توراعاسى ستيۆەن كيحومەن كەزدەستى. الەمگە ايگىلى برەند الماتى وبلىسىندا سنەكتەر شىعاراتىن زاۋىت قۇرىلىسىنا كىرىستى. ينۆەستيتسيا كولەمى – 368 ميلليون دوللار;

– Amazon كومپانياسىنىڭ ۆيتسە-پرەزيدەنتى دەۆيد زاپولسكيمەن تسيفرلاندىرۋ، بايلانىس جانە جاساندى ينتەللەكت سالالارىنداعى ىنتىماقتاستىقتىڭ جاي-جاپسارىن تالقىلادى.

Amazon Kuiper كومپانياسى الماتى، اقكول جانە اقتاۋ قالالارىندا ءوزىنىڭ جەردەگى ينفراقۇرىلىمىن جاساقتاۋدى كوزدەيدى. جوباعا 200 ميلليون دوللارعا جۋىق ينۆەستيتسيا سالۋ جوسپارلانعان. ناتيجەسىندە ەلىمىزدىڭ شالعاي وڭىرلەرى جىلدامدىعى جوعارى سپۋتنيكتىك ينتەرنەتكە قول جەتكىزەدى.

– Meta ۆيتسە-پرەزيدەنتى يانن لەكۋنمەن جاساندى ينتەللەكتىنىڭ دامۋى جانە قولدانىلۋى جونىندە پىكىر الماستى;

– Cerberus Capital Management اتقارۋشى ديرەكتورى فرەنكوم برۋنومەن ينۆەستيتسيالىق مۇمكىندىكتەر تالقىلاندى.

– سhevron كورپوراتسياسىنىڭ ديرەكتورلار كەڭەسىنىڭ توراعاسى جانە باس اتقارۋشى ديرەكتورى مايكل ۋيرتپەن كەزدەسۋدە كورپوراتسيانىڭ ەلىمىزدىڭ ەكونوميكالىق دامۋىنا ەلەۋلى ۇلەس قوسقانى اتاپ ءوتىلدى. تاۋەلسىزدىك جىلدارى سhevron قازاقستانعا 55 ميلليارد دوللار ينۆەستيتسيا قۇيدى.

– سونداي-اق ExonMobil كومپانياسىنىڭ باسقارما توراعاسى جانە باس اتقارۋشى ديرەكتورى داررەن ۆۋدسپەن;

– الەمدەگى ەڭ ءىرى Blackstone ينۆەستيتسيالىق كومپانياسىنىڭ باسقارما توراعاسى ستيۆەن شۆارتسمانمەن;

– سitigroup كومپانياسىنىڭ باس اتقارۋشى ديرەكتورى دجەين فرەيزەرمەن;

– Embraer كومپانياسىنىڭ پرەزيدەنتى فرانسيسكو گومەس نەتومەن كەزدەسۋلەر ءوتتى.

قاسىم-جومارت توقاەۆ قازاقستان-اقش بيزنەسىنىڭ ىنتىماقتاستىعىن نىعايتۋ ماقساتىندا دوڭگەلەك ۇستەل وتىرىسىنا قاتىستى. پرەزيدەنت اقش-تىڭ ءىرى كورپوراتسيا باسشىلارىمەن اقپاراتتىق تەحنولوگيا، ەنەرگەتيكا، اۋىل شارۋاشىلىعى، كولىك جانە لوگيستيكا سالالارىنداعى سەرىكتەستىك ماسەلەسىن تالقىلادى.

بۇدان بولەك، مەملەكەت باسشىسى پرەزيدەنت دونالد ترامپپەن قازاقستان مەن اقش اراسىنداعى ىنتىماقتاستىق، ەكونوميكا جانە ساۋدا سالالارىنداعى ىقپالداستىقتى كەڭەيتۋ ماسەلەلەرىن تالقىلاپ، حالىقارالىق احۋال جونىندە پىكىر الماستى.

امەريكا پرەزيدەنتى Truth Social الەۋمەتتىك جەلىسىندەگى پاراقشاسىندا قازاقستان پرەزيدەنتىمەن بولعان اڭگىمەلەسۋدى قورىتىندىلاپ، قول قويىلعان كەلىسىمدەردىڭ ماڭىزىنا توقتالدى. سونىڭ ءبىرى – ەلىمىز ءۇشىن جالپى قۇنى 4 ميلليارد دوللار بولاتىن 300 لوكوموتيۆ ءوندىرىسى.

سودان سوڭ قاسىم-جومارت توقاەۆ بۇۇ باس اسسامبلەياسىنىڭ 80-ءشى سەسسياسى اياسىندا بۇۇ باس حاتشىسى انتونيۋ گۋتەرريشپەن، ۋكراينا پرەزيدەنتى ۆلاديمير زەلەنسكيمەن، چەرنوگوريا پرەزيدەنتى ياكوۆ ميلاتوۆيچپەن كەزدەستى.

سونىمەن قاتار مەملەكەت باسشىسى اقش ۇكىمەتىنىڭ وكىلدەرىمەن، اتاپ ايتقاندا، ساۋدا ءمينيسترى گوۆارد لاتنيكپەن، ساۋدا پالاتاسىنىڭ باس اتقارۋشى ديرەكتورى سيۋزانن كلاركپەن جانە اقش پرەزيدەنتىنىڭ وڭتۇستىك جانە ورتالىق ازياداعى ارناۋلى وكىلى سەردجيو گورمەن ەكى ەل اراسىنداعى بايلانىستاردى پىسىقتادى.

ەڭ سوڭىندا قاسىم-جومارت توقاەۆ حالىقارالىق فۋتبول فەدەراتسياسىنىڭ (فيفا) پرەزيدەنتى دجانني ينفانتينونى قابىلداپ، وتاندىق فۋتبولدىڭ دەڭگەيىن كوتەرۋ ءۇشىن بىرلەسكەن جوبالاردى جۇزەگە اسىرۋ مۇمكىندىكتەرىن تالقىلادى.

اتاپ وتەرلىك جايت، بۇگىن بۇۇ باس اسسامبلەياسىنىڭ 80-ءشى سەسسياسى اياسىنداعى كۇن ءتارتىبى دە بارىنشا مازمۇندى ءارى بەلسەندى بولماق.

Abai.kz