بۇل تۋرالى ۇكىمەتتىڭ ءباپساسوز قىزمەتى ءمالىم ەتتى.

پرەزيدەنت قاسىم-جومارت توقاەۆ ۇلىتاۋ ءوڭىرىنىڭ الەۋمەتتىك-ەكونوميكالىق دامۋىنا ەرەكشە ءمان بەرىپ وتىر. وبلىستا ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان جوبالار بەلسەندى تۇردە جۇزەگە اسىرىلىپ جاتىر.

ماسەلەن، مەملەكەت باسشىسىنىڭ تاپسىرماسىمەن دەنساۋلىق ساقتاۋ نىساندارى قۇرىلىسىنا ارناۋلى مەملەكەتتىك قوردان 880 ملن تەڭگە ءبولىندى.

زاڭسىز يەمدەنىلگەن اكتيۆتەردەن تۇسكەن قاراجات "اۋىلدا دەنساۋلىق ساقتاۋدى جاڭعىرتۋ" ۇلتتىق جوباسى اياسىندا ۇلىتاۋ جانە جاڭاارقا اۋداندارىندا العاشقى مەديتسينالىق-سانيتاريالىق كومەك كورسەتەتىن 7 نىساننىڭ قۇرىلىسىنا جۇمسالدى.

اتاپ ايتقاندا، اقتۇبەك جانە كەڭگىر اۋىلدارىندا جاڭا ەكى دارىگەرلىك امبۋلاتوريا ءبوي كوتەردى. سونداي-اق بەتبۇلاق، پيونەر، قورعاسىن، اينابۇلاق جانە ەگىندى اۋىلدارىندا بەس مەديتسينالىق پۋنكت سالىنىپ جاتىر.

نىسانداردى جىل سوڭىنا دەيىن پايدالانۋعا بەرۋ جوسپارلانعان.

اتالعان جوبالاردى جۇزەگە اسىرۋ اۋىل تۇرعىندارىنىڭ مەديتسينالىق كومەككە قولجەتىمدىلىگىن جاقسارتادى جانە ۇلىتاۋ وڭىرىندەگى دەنساۋلىق ساقتاۋ جۇيەسىن نىعايتۋعا ماڭىزدى قادام بولماق.

Abai.kz