سامار اۋدانىندا «ناعىز پاتريوت» اتتى ەكولوگيالىق اكتسيا ءوتتى. جاستار رەسۋرستىق ورتالىعىنىڭ ماماندارى لايلى سۋ قويماسى ماڭىنداعى تاستاردىڭ بەتىنەن ۆاندالدار قالدىرعان 35 جازۋدىڭ بەسەۋىن ءوشىرىپ، تابيعي كەلبەتىن قالپىنا كەلتىردى.

بۇل يگى باستاما وسكەمەن قالاسىنىڭ تۇرعىنى ۆياچەسلاۆ ورلوۆتىڭ ەڭبەگىن جالعاستىردى. ول بۇعان دەيىن وتباسى مۇشەلەرىمەن بىرگە تاستاردىڭ ءبىر بولىگىن ءوز كۇشىمەن تازالاپ، ۇلگى كورسەتكەن بولاتىن.

اكتسيانىڭ ماقساتى – اۋداننىڭ تابيعي ءارى مادەني مۇراسىن قورعاۋ، سونداي-اق جاستار مەن تۇرعىنداردى تابيعاتقا قۇرمەتپەن قاراۋعا تاربيەلەۋ.

— تابيعي بايلىقتارىمىزدى كوزدىڭ قاراشىعىنداي ساقتاۋ – ءبارىمىزدىڭ مىندەتىمىز. ارتىمىزدا تەك تازالىق پەن جاعىمدى اسەر قالدىرۋىمىز قاجەت، — دەدى شاراعا قاتىسۋشىلار.

الداعى ۋاقىتتا ۆاندالدىق جازۋلاردى تولىقتاي جويۋ ءۇشىن تازالاۋ جۇمىستارى جالعاسىن تابادى. ايتا كەتەرلىگى، بۇل باستاما رەسپۋبليكالىق «تازا قازاقستان» باعدارلاماسى اياسىندا چەللەندج تۇرىندە جالعاسىن تاپتى.

Abai.kz