مەملەكەت باسشىسى توقاەۆ اقش-قا بۇۇ باس اسسامبلەياسىنىڭ 80-سەسسياسىنا قاتىسىپ، جالپى دەباتتا ءسوز سويلەگەنىن بىلەمىز.

سول ساپار بارىسىندا پرەزيدەنت توقاەۆ اقش پرەزيدەنتى ترامپپەن دە جەكە جولىققانى ءمالىم بولدى. وسى ورايدا تاعى ءبىر ايتا كەتەر جايت: ورتالىق ازيا باسشىلارىنىڭ نيۋ-يورككە ساپارى كەزىندە ترامپ وزبەكستان باسشىسى شاۆكات ميرزيوەۆپەن دە جۇزدەسىپ، بۇل تۋرالى Threads جەلىسىندە ارنايى پىكىر بىلدىرگەن ەدى. امەريكالىق ساياساتكەر تاشكەنت تاراپى جاساعان ۇسىنىستاردى «اسا ماڭىزدى ءارى ءىرى مامىلە» دەپ باعالاعان ەدى. بىراق قازاقستان باسشىسىمەن كەزدەسۋ ءسال ءدۇدامالداۋ كۇيدە قالعاندىعى جاسىرىن ەمەستىن.

ەندى ءبىز ءسوز ەتكەن اقتاڭدىقتىڭ ورنى تولىپ، بۇۇ-دا بولعان توقاەۆ-ترامپ ديالوگىنىڭ جاريا بولماعان دەتالدارى وتاندىق باق بەتتەرىندە جاريا بولا باستادى. بۇلاي دەيتىنىمىز پرەزيدەنتتىڭ ءباسپاسوز حاتشىسى رۋسلان جەلدىباي قاسىم-جومارت توقاەۆ پەن اقش پرەزيدەنتى دونالد ترامپتىڭ نيۋ-يوركتەگى كەزدەسۋىنەن فوتو جاريالاپ، قازاق جۇرتىنا ءمالىم بولماعان جايتتاردىڭ شەت پۇشپاعىن شىعاردى.

ماسەلەنىڭ مانىسىنە تەرەڭدەي تۇسەتىن بولساق، پرەزيدەنتتىڭ ءباسپاسوز حاتشىسى رۋسلان جەلدىباي سۋرەتتى ءوزىنىڭ Telegram-ارناسىنا جۇكتەپ، استىنا «نيۋ-يورك، اقش، 2025 جىل» دەپ جازعان ەدى. وسى جاريالاعان سۋرەتتەردە قاسىم-جومارت توقاەۆپەن بىرگە دونالد جانە مەلانيا ترامپ تا بار.

بۇعان دەيىن بىزگە بەلگىلىسى ەكى پرەزيدەنتتىڭ اڭگىمەلەسكەنى تۋرالى اقوردا قىسقا حابارلاما تاراتقان ەدى. ال، وندا ورىن الدى دەيتىن كەزدەسۋدىڭ فورماتى بەتپە-بەت پە، الدە تەلەفون ارقىلى ما، ناقتى ايتىلماعاندىقتان وتاندىق كەيبىر ساراپشىلار تولىققاندى كەزدەسۋ بولماعان دەپ بولجام جاساعانى دا جاسىرىن ەمەس.

ەڭ باستىسى ءدال قازىر قولدا بار كەيبىر دەرەككوزدەردىڭ مالىمەتىنشە كەزدەسۋ بارىسىندا ترامپ ۋكراينا ماسەلەسىن كوتەرگەن. ترامپتىڭ وزىنە ارتقان ءۇمىتىن پرەزيدەنت توقاەۆ اقش-تان ورالعان سوڭ بىردەن رەسەي پرەزيدەنتى ۆلاديمير پۋتينمەن كەلىسسوز جۇرگىزىپ، وعان اقش-تىڭ ءۇشبۋ سالەمىن جەتكىزگەن بولۋى مۇمكىن.

Abai.kz