بۇگىن مەملەكەت باسشىسى دوستىق – مويىنتى تەمىرجولىنىڭ ەكىنشى جەلىسىن ىسكە قوسۋعا باستاۋ بەردى. بۇل ستراتەگيالىق جوبا ەلىمىزدىڭ شىعىس باعىتىنداعى وتكىزۋ قابىلەتىن ايتارلىقتاي ارتتىرىپ، قازاقستاندىق ەكسپورت پەن ترانزيت ءۇشىن جاڭا مۇمكىندىكتەر اشادى. وسىعان وراي BAQ.KZ تىلشىسىنە «قتج» ۇك» اق «ينتەگراتسيالانعان جوسپارلاۋ ديرەكتسياسى» فيليالىنىڭ ديرەكتورى ۆاديم كوپىلوۆ جوبانىڭ ماڭىزى مەن جۇك تاسىمالىنىڭ بولاشاعى تۋرالى ايتتى.

«دوستىق» – «درۋجبادان» ستراتەگيالىق دالىزگە دەيىن

كوپىلوۆتىڭ ايتۋىنشا، دوستىق ستانساسى جاي عانا شەكارالىق ءتۇيىسۋ بەكەتى ەمەس. ول 1990 جىلدان باستاپ قازاقستاندى قىتايمەن جالعاپ كەلەدى. العاشقى جىلدارى بۇل وتكەلدەن كۇنىنە نەبارى 10 ۆاگون وتسە، بۇگىندە كورسەتكىش 800 ۆاگونعا جەتكەن.

35 جىل ىشىندە وسى باعىتپەن 400 ميلليون توننادان استام جۇك تاسىمالداندى. 1990 جىلى نەبارى 10 ۆاگون بولسا، قازىر كۇنىنە 800-دەن اسادى. بۇل باعىتتىڭ الەۋەتى ءبىز ءۇشىن ارقاشان كۇن تارتىبىندە بولدى، – دەدى ول.

2015 جىلدان بەرى تاسىمال كولەمى 4,5 ەسەگە ءوسىپ، 7,5 ملن توننادان 32 ملن تونناعا جەتتى.

شەكتەۋلەرگە قاراماستان ءوسۋ

كەيبىر كەزەڭدەردە جوندەۋ جۇمىستارىنا بايلانىستى وتكىزۋ قابىلەتى تومەندەسە دە، جاڭا لوگيستيكالىق شەشىمدەردىڭ ارقاسىندا جۇك كولەمى ارتا ءتۇستى. مىسالى، كونتەينەرلەردى تىكەلەي جارتىلاي ۆاگوندارعا تيەۋ تاجىريبەسى ەنگىزىلدى. بۇل بوس پويىزداردىڭ سانىن ازايتىپ، ايىنا 100–120 پويىزعا دەيىن ۇنەمدەۋگە مۇمكىندىك بەردى.

ءبىز جىلىنا 12 ملن توننا جۇك جونەلتەمىز، 8 ملن توننا قابىلدايمىز. نەگىزىنەن قىتايعا شيكىزات جونەلتىلەدى. ال كەرى باعىتتا كونتەينەرلىك پويىزدار كەلەدى. بۇرىن بوس پويىزداردى قايتارۋعا تۋرا كەلەتىن. ال وتكەن جىلدان باستاپ ءبىز قىتايدان كەلگەن كونتەينەرلەردى بوس جارتىلاي ۆاگوندارعا تيەپ، وسىلايشا قوسىمشا شىعىنداردى قىسقارتتىق، – دەپ ءتۇسىندىردى كوپىلوۆ.

وتكىزۋ قابىلەتىنىڭ ارتۋى

ۇزىندىعى 836 شاقىرىمدى قۇرايتىن دوستىق – مويىنتى جەلىسى كەزەڭ-كەزەڭىمەن سالىندى. الدىمەن مويىنتى – بالقاش بولىگى پايدالانۋعا بەرىلىپ، بالقاش تورابى جەڭىلدەدى. كەيىن بەسكول – دوستىق جانە اقتوعاي – بەسكول ۋچاسكەلەرى ىسكە قوسىلدى. سوڭعى بولىپ بالقاش – ساياق جانە ساياق – اقتوعاي ارالىعى اياقتالدى.

ەگەر بۇرىن ءبىر جولاقتى باعىتپەن تاۋلىگىنە 12 جۇپ پويىز جۇرسە، ەندى ەكىنشى جەلىنىڭ ارقاسىندا بۇل كورسەتكىش 60 جۇپ پويىزعا جەتەدى.

بۇل – تاسىمال كولەمىن بەس ەسە ارتتىرۋ دەگەن ءسوز. وسىلايشا قازاقستاننىڭ ەكسپورتتىق جانە ترانزيتتىك الەۋەتىن تولىق اشۋعا مۇمكىندىك بەرەدى، – دەدى ساراپشى.

كەشەندى ينفراقۇرىلىمدىق دامۋ

دوستىق – مويىنتى جوباسى كولىك دالىزدەرىن نىعايتۋعا باعىتتالعان كەڭ اۋقىمدى باعدارلامانىڭ ءبىر بولىگى. قازىر التىنكول – جەتىگەن جەلىسى جاڭارتىلىپ جاتىر، ناتيجەسىندە وتكىزۋ قابىلەتى ەكى ەسە ءوسىپ، تاۋلىگىنە 30 جۇپ پويىزعا جەتپەك. سونىمەن قاتار، 2028 جىلعا قاراي قىزىلجار – جەزقازعان ۋچاسكەسىن جانە باقتى – اياگوز ءۇشىنشى شەكارالىق وتكەلىن سالۋ جوسپارلانعان.

جاڭا تەحنولوگيالار دا ەنگىزىلۋدە: پويىز قوزعالىسىن اۆتوماتتى بلوكتاۋ جۇيەسى وتكىزۋ مۇمكىندىگىن 2–2,5 ەسەگە دەيىن ارتتىرۋعا مۇمكىندىك بەرەدى.

ەكسپورتتاعى سەرپىن

قىتاي قازاقستاندىق جۇكتىڭ نەگىزگى تۇتىنۋشىسى بولىپ قالا بەرەدى. وعان رۋدا، استىق جانە مال ازىعى جەتكىزىلەدى. ماسەلەن، سوڭعى 8 ايدا قىتايعا مال ازىعى ەكسپورتى 5 ەسەگە وسكەن. 2024 جىلى قازاقستان كورشى ەلگە 3 ملن توننادان استام استىق جونەلتتى.

كوپىلوۆتىڭ ايتۋىنشا، ينفراقۇرىلىمدىق جوبالار تاسىمال كولەمىنىڭ وسۋىنە تىكەلەي ىقپال ەتۋدە. 2023 جىلى جالپى جۇك تاسىمالى 298 ملن توننانى قۇراسا، 2024 جىلى 303 ملن تونناعا جەتتى. بيىل كورسەتكىش تاعى 8 ملن تونناعا وسەدى دەپ كۇتىلۋدە.

جاھاندىق ترانزيتتىك ءدالىز

جاڭا تەمىرجول جوبالارى قازاقستانعا قىتاي مەن ەۋروپا اراسىنداعى جۇك جەتكىزۋ ۋاقىتىن ەكى ەسەگە قىسقارتۋعا جول اشتى. مىسالى، سيان – بۋداپەشت باعىتى تەڭىز ارقىلى 40–50 كۇن جۇرسە، ەندى تەمىرجولمەن 23–25 كۇندە جەتەدى.

ءبىزدىڭ ماقسات – نارىققا سەنىمدى قىزمەت قانا ەمەس، ءتيىمدى ۋاقىت ۇسىنىپ، قازاقستاندى جاھاندىق لوگيستيكانىڭ نەگىزگى بۋىنىنا اينالدىرۋ، – دەپ تۇيىندەدى ۆاديم كوپىلوۆ.

Abai.kz