ءماجىلىس دەپۋتاتى، «اق جول» پارتياسىنىڭ توراعاسى ازات پەرۋاشەۆ «ەندى نە ىستەيمىز» ارناسىنا بەرگەن سۇحباتىندا قازاقستانداعى ساياسي جۇيەنىڭ بولاشاعى مەن الداعى رەفورمالارعا قاتىستى پىكىر ءبىلدىردى. ول 2027 جىلعى رەفەرەندۋمنان كەيىن ءبىرپالاتالى پارلامەنتكە كوشۋدىڭ تاريحي قادام ەكەنىن اتاپ ءوتتى.

«الەم تاريحىندا بيلىكتە ماڭگى وتىرعان پارتيا بولماعان، بولمايدى دا. سوندىقتان كەز كەلگەن ءىرى پارتيا ۇلكەن جاۋاپكەرشىلىكتى سەزىنۋى ءتيىس»، – دەدى ول. پەرۋاشەۆتىڭ پايىمىنشا، بۇگىنگى پارلامەنتتەگى دومينانتتى پارتيا ەرتە مە، كەش پە ءوزىنىڭ ورنىن بوساتادى، بۇل – ساياساتتاعى تابيعي پروتسەسس.

ساياساتكەر كوپپارتيالىق جۇيەگە بىردەن جەتۋ قيىن ەكەنىن مويىندايدى. دەگەنمەن، ونىڭ سوزىنشە، دەموكراتياعا قادام باسۋدىڭ ءوزى ۋاقىت تالابى. «ءبىزدىڭ ماقساتىمىز ءبىرىنشى نەمەسە ەكىنشى ورىن ءۇشىن تالاسۋ ەمەس. ءبىز حالىقتىڭ سەنىمىنە يە بولىپ، مەملەكەت باسقارۋعا ناقتى ۇلەس قوسۋىمىز كەرەك»، – دەدى ول.

پەرۋاشەۆ كواليتسيالىق ۇكىمەتتەردىڭ ارتىقشىلىقتارى مەن ءالسىز جاقتارىنا دا توقتالدى. ەۋروپا ەلدەرىنىڭ تاجىريبەسىن مىسالعا كەلتىرىپ، مۇنداي فورمات دەموكراتياعا جول اشقانىمەن، كەيدە ۇزاق كەلىسسوزدەرگە بايلانىستى مەملەكەتتىك شەشىمدەر كەشەۋىلدەپ قالاتىنىن ايتتى. «گوللانديا مەن يسپانيا سياقتى ەلدەردە بيۋدجەت ءبىر جىلدان اسا ۋاقىت تالقىلانىپ، توقتاپ قالعانىن بىلەمىز. سوندىقتان كواليتسيالىق مودەلدىڭ وزىنە ءتان قاۋىپتەرى دە بار»، – دەدى ول.

دەگەنمەن، پەرۋاشەۆتىڭ پىكىرىنشە، باستى ماسەلە – بيلىك ءۇشىن كۇرەس ەمەس، حالىقتىڭ سەنىمىن اقتاۋ. ساياساتكەر قازاقستاندا كاسىبي پارلامەنت قالىپتاسۋى ءتيىس ەكەنىن ايتىپ، تاجىريبەلى زاڭ شىعارۋشىلارمەن قاتار جاستارعا دا مۇمكىندىك بەرۋ قاجەتتىگىن ەسكە سالدى.

ونىڭ ايتۋىنشا، كەز كەلگەن ساياسي رەفورما حالىقتىڭ قاتىسۋىنسىز جۇزەگە اسپايدى. «پارلامەنتتىڭ بولاشاعى پارتيالاردىڭ ەمەس، حالىقتىڭ قولىندا. سوڭعى ءسوزدى ارقاشان حالىق ايتادى»، – دەپ تۇيىندەدى ول.

Abai.kz