قازاقستاندا «ادىلەتتى قازاقستان» اتتى ۇستانىم ايتىلا باستاعاننان بەرى حالىقتىڭ سوت جانە پروكۋراتۋرا، پوليتسيا قىزمەتكەرلەرىنە دەگەن تالابى كۇشەيە ءتۇستى:  حالىق كۇشتىك قۇرىلىمداردان ادىلەتتىلىكتى، ياعني، زاڭدى قاتاڭ ساقتاۋدى تاكلاپ ەتە باستادى. بۇل قىزمەت  پروكۋرور نەمەسە سوتتىڭ ءوز قالاۋىنشا شەشىم قابىلداي سالاتىن ورىن ەمەس ەكەنىن اشىق ەسكەرتە باستادى.  ونداي كورىنىس ماجىلىستە دە قانات جايىپ كەلەدى...

ءماجىلىستىڭ كەزەكتى وتىرىسىندا دەپۋتات ەرمۇرات باپي دابىل قاقتى. ول: «پروكۋراتۋرا نازارباەۆتاردىڭ دەگەنىن ورىنداعان»، ‑ دەپ، وتە اۋىر سوزدەر ايتتى.  ماسەلەنىڭ توركىنى – ەلىمىزدە اۆتوريتارلىق، شىن مانىسىندە، جارتىلاي ديكتاتورلىق جۇيە ورناتقان نازارباەۆتار اۋلەتىنىڭ ەكىنشى بۋىنى وكىلى، بولات نازارباەۆتىڭ ۇلكەن ۇلى نۇربول نازارباەۆقا قاتىستى تۋىنداعان.

وسىنىڭ الدىندا عانا، دەپۋتات رينات زايىتوۆ تا وسى ماسەلەنى كوتەرىپ: «نۇربول بولاتۇلى نازارباەۆتىڭ قازىناعا قايتارعان 57 ملرد تەڭگەسى (نە دەگەن بايلىق دەسەڭشى!) كوزگە كورىنەر شىڭنىڭ باسى عانا، ودان وزگە اكتيۆتەردى قايتارۋعا پروكۋراتۋرا اسىعار ەمەس» دەپ سىناعان بولاتىن. ەندى، وعان ءماجىلىس دەپۋتاتى ەرمۇرات باپي جاڭا دەرەكتەردى قوسىپ، باس پروكۋرور بەرىك اسىلوۆتىڭ اتىنا تاعى ءبىر رەزونانستى دەپۋتاتتىق ساۋال جولدادى.

ول «ادىلەتتى قازاقستان» قۇرۋ جولىندا ادىلەتسىزدىك پەن زاڭسىزدىقتارعا كوز جۇما قاراۋعا بولمايتىنىن ايتتى. ولاي ەتسەك، ول ‑  «ادىلەتتى قازاقستانعا» قارسى قاستىق بولادى» دەپ، ءسوزدىڭ شىنىنا كوشتى.

ودان ءارى، دەپۋتات ناقتى دەرەكتەردى كەلتىرە وتىرىپ، قازىرگى پروكۋراتۋرا جۇيەسىندە ءالى دە «ەسكى قازاقستاننان» قالعان قۇقىق قورعاۋ، ال، ناقتىسىندا «قۇقىق قورعاماۋ» ءۇردىسى ساقتالىپ وتىرعانىنا الاڭداۋشىلىق تانىتتى.  دەپۋتات، كەي جاعدايلاردا پروكۋرورلار نازارباەۆ اۋلەتىنىڭ «زاڭسىز ءوتىنىشىن» مۇلتىكسىز ورىنداپ، سول ءۇشىن جەكەلەگەن ازاماتتاردىڭ «زاڭدى قۇقىن» بۇزىپ وتىرعانىن جەتكىزدى.

ماسەلەن، ونىڭ ايتۋىنشا، نۇربول نازارباەۆ 9 مىڭ گەكتاردان استام جەكەشەلەندىرىلگەن جەر ۇلەسىن زاڭسىز يەمدەنىپ، ياعني، اشىعىن ايتقاندا – تارتىپ العان. پروكۋرورلار ونىڭ الماتى وبلىسى قاراساي اۋدانىنداعى بۇرىنعى كامەنسكوە مال اسىلداندىرۋ زاۋىتىنىڭ جۇمىسشىلارى اتىنان بىرنەشە مارتە دەپۋتاتتىق ساۋال جولداعانىنا قاراماستان، بۇعان نازار اۋدارماي كەلەدى ەكەن.

ودان وزگە، قاراعاندىلىق كاسىپكەر قۋات ەرمەنتاەۆ «PORUS» جشس-دەگى ۇلەسىن رەيدەرلىك جولمەن تارتىپ الىنعانى، كاسىپكەردىڭ بار مۇلكىنەن ايىرىلعانى ەرەكشە اتاپ ءوتىلدى. بۇل دا سول نازارباەۆ اۋلەتىمەن بايلانىستى بولىپ شىققان...

دەپۋتات ءسوزىنىڭ توبىقتاي ءتۇيىنى – «پروكۋرورلار ەندى بۇرىنعى پرەزيدەنتتىڭ ەمەس، ونىڭ ۇرىم‑بۇتاعىنىڭ دا  «وتىنىشتەرىن» زاڭنان جوعارى قويۋدى جالعاستىرىپ كەلە جاتىر» دەگەن ويعا كەلىپ تىرەلدى.

ءيا، مۇنداي جاعدايدا «ادىلەتتى قازاقستاننىڭ» اۋىلى الىستاي تۇسەتىنى انىق. وكىنىشتى‑اق، سەبەبى، تاريحتىڭ بىزگە مۇنداي مۇمكىندىكتى قايتالاپ بەرە بەرمەيتىنىن، بارشامىزدىڭ ۇرپاعىمىز «ادىلەتتى قازاقستاندا»  ءومىر سۇرسە دەگەن ارماننىڭ ءمانىن ۇقپاعان سىڭايلىمىز...

Abai.kz