قازاقستاننىڭ كولىك-لوگيستيكا سالاسىندا تاريحي قادام جاسالىپ، مەملەكەت باسشىسى قاسىم-جومارت توقاەۆ «دوستىق – مويىنتى» تەمىرجولىنىڭ ەكىنشى جەلىسىن ىسكە قوستى. وسى جەلى قىتايدان ەۋروپاعا تەمىرجولمەن تاۋار تاسۋدى 5 ەسە ارتتىرا الادى. قازاقستاننىڭ ترانزيتتىك تابىسى دا بەس ەسە وسەدى دەگەن ءسوز. جانە ەڭ باستى فاكتور بار. جۇكتى جەتكىزۋ ۋاقىتى بىرنەشە تاۋلىككە قىسقارادى.

دوستىقتان شىققان ەكىنشى جەلىنى مويىنتىعا دەيىن اپاردىق. ەندى الدىمىزدا ودان كەم ەمەس اۋقىمدى مىندەت تۇر. ءبىز وسى تەمىر داڭعىلدى مويىنتىدان قىزىلجار بەكەتىنە دەيىن سوزۋ كەرەكپىز. سوندا ۇرىمشىدەن شىققان ۆاگوندار اقتاۋعا تىكەلەي تارتۋعا مۇمكىندىك الادى. جاڭا باعىتپەن پويىزدار اينالىپ بارىپ جارىق ستانتسياسىنا سوقپاي، مويىنتىدان قىزىلجارعا تىكە شىقپاق. بۇدان ءبىر تاۋلىك قىسقارتامىز.

قازاقستان "دوستىق-قىزىلجار" تج ماگيسترالىن سالىپ بىتكەننەن كەيىن قىتاي ءوزىنىڭ نەگىزگى قۇرلىق ەكسپورتى جولىن ورتا دالىزگە بۇرۋعا نيەتتى. پولشا، ەستونيا شەكارالارىندا پروبلەما بولىپ جاتىر. ءدال وسى كەزدە ەلىمىز ترانسكاسپي ارقىلى ەڭ لايىقتى جول ۇسىنا قويماقشى.

قازاق ەلى تەز ارادا 5 مىڭ شاقىرىم جاڭا تەمىرجول سالىپ، 10 مىڭ شاقىرىمنان استامىن جاڭعىرتپاق. ىشكى جانە سىرتقى ينۆەستماسەلەنى شەشىپ تاستادى. جۋىردا عانا اقش-تىڭ Wabtec كومپانياسىمەن 4,2 ميلليارد دوللارلىق كەلىسىم جاسالدى. ەندى جاڭا بۋىندى 300 لوكوموتيۆ قازاقستاندا قۇراستىرىلىپ، سەرۆيس تە وسىندا كورسەتىلەدى. بىزگە ۆاگونداردى سۇيرەيتىن لوكوموتيۆتەر كوپ كەرەك بولىپ تۇر ەدى. ولار بولماسا تەمىرجولدان ەش پايدا جوق.

پرەزيدەنتتىڭ لوگيستيكاعا جاساندى ينتەللەكت پەن تسيفرلىق تەحنولوگيانى ەنگىزۋ تۋرالى ايتقانى كەزدەيسوق ەمەس. سەبەبى ءححى عاسىردا جۇك تاسىمالى تەك رەلستە عانا ەمەس، الگوريتمدەر مەن دەرەكتەر اعىنىندا شەشىلەدى. قازاقستان ءدال وسى كەزەڭدە تاريحتىڭ جاڭا ەسىگىن اشتى.

ەندى مويىنتىدان باستالعان جول ءبىزدى قايدا اپارادى؟ جاھاندىق ءترانزيتتىڭ جۇرەگىنە مە، الدە جاڭا گەوساياسي تەكەتىرەستەردىڭ قاق ورتاسىنا ما؟ سەبەبى ءبىز گەوساياسي سالماعى تىم اۋىر مەملەكەتكە اينالىپ بارامىز.

ايبار ولجاەۆ

Abai.kz