قازاقستان رەسپۋبليكاسىنىڭ قۇرىلىس كودەكسى جوباسى جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋلەت، قالا قۇرىلىسى جانە قۇرىلىس  ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ  زاڭىنىڭ جوباسىنىڭ ءبىرىنشى وقىلىمى ءوتتى.

وندا ءماجىلىس دەپۋتاتى، ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى مۇرات ابەنوۆتىڭ قوسىمشا بايانداما جاسادى.

***

مۇرات ابەنوۆ:

قازاقستان رەسپۋبليكاسىنىڭ ۇكىمەتى (ونەركاسىپ جانە قۇرىلىس مينيسترلىگى) «قۇرىلىس كودەكسى» جانە وعان ىلەسپە زاڭ جوبالارىن ازىرلەپ، پارلامەنتتىڭ قاراۋىنا ۇسىندى.

اتالعان زاڭ جوبالارى مەملەكەت باسشىسىنىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىن ىسكە اسىرۋ ماقساتىندا دايىندالعان.

جاڭا قۇرىلىس كودەكسىنىڭ نەگىزگى ماقساتتارى:

- ادام ءومىرى مەن قىزمەتى ءۇشىن قولايلى جانە قاۋىپسىز ورتانى قالىپتاستىرۋ، سونىڭ ىشىندە حالىقتىڭ ءجۇرىپ-تۇرۋى شەكتەۋلى توپتارى ءۇشىن كەدەرگىسىز قولجەتىمدىلىكتى قامتاماسىز ەتۋ;

- قوعامنىڭ ارحيتەكتۋرالىق، قالا قۇرىلىسى جانە قۇرىلىس قىزمەتى جونىندەگى شەشىمدەردى تالقىلاۋعا قاتىسۋىنا، سونداي-اق قوعامدىق نەمەسە جەكە مۇددەلەرگە اسەر ەتەتىن شەشىمدەر بويىنشا ۇسىنىستار ەنگىزۋىنە مۇمكىندىك بەرۋ;

- ارحيتەكتۋرالىق، قالا قۇرىلىسى جانە قۇرىلىس سالاسىنداعى قۇقىق بۇزۋشىلىقتارعا ۋاقتىلى دەن قويۋ ءۇشىن جەدەل ىقپال ەتۋ شارالارىن ەنگىزۋ;

- جوبالاۋ جانە قۇرىلىس-مونتاجداۋ سالاسىنداعى ۇيىم ماماندارىن سەرتيفيكاتتاۋ ارقىلى ولاردىڭ بىلىكتىلىگىن ارتتىرۋ;

- ارحيتەكتۋرالىق، قالا قۇرىلىسى جانە قۇرىلىس قىزمەتى جۇيەلەرىن اقپاراتتىق سۇيەمەلدەۋ;

- قۇرىلىس نىساندارىنىڭ ومىرلىك تسيكلى كەزەڭدەرىندە اقپاراتتىق ۇلگىلەۋ جۇيەسىن (تيمسو) ەنگىزۋ;

- مەملەكەتتىك ارحيتەكتۋرالىق-قۇرىلىس باقىلاۋى ورگاندارىنىڭ قۇرىلىس نىساندارىنا بارۋ كەستەسىن تاپسىرىس بەرۋشىنىڭ ەرىكتى تۇردە ۇسىنۋى ارقىلى مەملەكەتتىك باقىلاۋدى كۇشەيتۋ;

- سەيسميكالىق قاۋىپتى ايماقتاردا جوبالاۋ جانە قۇرىلىس جۇرگىزۋدىڭ ەرەكشەلىكتەرىن ەسكەرۋ ارقىلى ىقتيمال جەر سىلكىنىسى كەزىندەگى سەيسميكالىق تاۋەكەلدى انىقتاۋ;

- مەملەكەتتىك ورگانداردىڭ قۇرىلىس نىساندارىن پايدالانۋعا قابىلداۋ كەزىندە مەملەكەتتىك نورماتيۆتىك قۇجاتتارعا سايكەستىگىن تەكسەرۋگە قاتىسۋى.

سونىمەن قاتار، قۇرىلىس كودەكسىنىڭ جوباسى قۇرىلىس نىساندارىنىڭ پايدالانۋ جانە كەيىنگى جويۋ كەزەڭدەرىن دە قامتيدى.

اتاپ وتكىم كەلەتىنى، دەپۋتاتتاردىڭ شەشىمىمەن تۇرعىن ءۇي قۇرىلىسىنا ۇلەستىك قاتىسۋ تۋرالى ءبولىم كودەكستەن الىنىپ تاستالدى. بۇل نورمالار بولەك زاڭ جوباسى ارقىلى ىسكە اسىرىلىپ، كۇشىنە ەندى.

ەرسايىن قايىرعازىۇلى ءوز بايانداماسىندا قۇرىلىس كودەكسى مەن وعان ىلەسپە زاڭ جوباسىندا كوزدەلگەن نەگىزگى باعىتتاردى جان-جاقتى اشىپ كورسەتتى.

قۇرىلىس كودەكسىنىڭ جانە وعان ىلەسپە زاڭ جوبالارى 55 جۇمىس توبىنىڭ وتىرىسىندا جانە كوميتەتتىڭ كەڭەيتىلگەن وتىرىسىندا جان-جاقتى تالقىلاندى.

بۇگىنگى تاڭدا قۇرىلىس كودەكسىنىڭ جوباسى بويىنشا دەپۋتاتتاردان 1 725 ۇسىنىس، ال ىلەسپە زاڭ جوباسى بويىنشا 72 ۇسىنىس كەلىپ ءتۇستى. جۇمىس توبى ۇسىنىستاردى بەلسەندى تۇردە تالقىلاپ جاتىر.

ءماجىلىستىڭ بارلىق كوميتەتتەرى زاڭ جوباسى بويىنشا ءوز قورىتىندىلارىن بەردى.

قۇرمەتتى دەپۋتاتتار!

وسىعان بايلانىستى قۇرىلىس كودەكسى مەن وعان ىلەسپە زاڭ جوباسىن ءبىرىنشى وقىلىمدا قولداۋلارىڭىزدى سۇرايمىز. 

جۇمىس توبى زاڭ جوباسىن ەكىنشى وقىلىمعا دايىنداۋ اياسىندا ءوز جۇمىسىن جالعاستىراتىن بولادى.

Abai.kz