بۇل تۋرالى رەسەيلىك «رۋسسكايا وبششينا» سكينحەدتەر ۇيىمىنىڭ پودكاستىندا تولىق اشىق ايتىلىپ وتىر.

پودكاستتا «رۋسسكايا وبششينا» ۇيىمىنىڭ ليدەرلەرىنىڭ ءبىرى رومان 7.62 «الەۋمەتتىك جەلىدە «سەۆەرنىي كازاح» دەگەن لاقاپ اتپەن تانىلعان بلوگەر اسلان تولەگەنوۆتى وزدەرىنىڭ جيىندارىنا شاقىرعاندارىن جانە اسلانعا ۋمار نازارۇلى كرەملەۆ ەمدەلۋگە دەپ مول اقشا بەرگەندىگىن» جاسىرماي ايتادى. سۇحباتتىڭ 20-شى مينۋتىن قاراڭىزدار:

بيىل تامىز ايىندا ۋمار كرەملەۆ قولداپ جۇرگەن اسلان تولەگەنوۆ قىلمىستىق كودەكسىنىڭ 174-بابى – «ۇلتتىق، الەۋمەتتىك، رۋلىق، ناسىلدىك نەمەسە ءدىني ارازدىقتى قوزدىرۋ» بابى بويىنشا ۇستالعان بولاتىن. ال ارتىنان وعان بولەك ءىس قوزعالىپ، اسلان تولەگەنوۆتىڭ ءىسى ۇلتتىق قاۋىپسىزدىك قىزمەتىنىڭ تەرگەۋىنە وتكەن. دەمەك، «سەۆەرنىي قازاعىمىز» تەك ۇلت ارازدىعىن قوزدىرىپ قانا قويماي، سەپاراتيستىك، وپاسىزدىق سىندى ۇلتتىق قاۋىپسىزدىككە سىنا قاعاتىن اسا قاۋىپتى قىلمىستار بويىنشا كۇدىكتى اتانىپ وتىر. ال ونىڭ جازاسى تىم اۋىر.

ۋمار كرەملەۆتىڭ قازاقستاندىق سەپاراتيستەرگە دەم بەرىپ جۇرگەنى الاڭداۋشىلىق تۋعىزادى. سەبەبى كرەملەۆ ءدال قازىر بىزدە ەنگىزىلىپ جاتقان «بۋكمەكەرلەردىڭ بىرىڭعاي ەسەپ جۇيەسىنە» (ببەج) ءوزىنىڭ رەسەيدە جۇمىس ىستەپ تۇرعان ەتسۋپيس باعدارلاماسىن ورناتپاقشى. ۋماردىڭ ءوزى رەسەيدەگى ءۇش ءىرى بۋكمەكەر كومپانياسىنىڭ («فونبەت»، «پاري»، «ليگا ستاۆوك») ورتاق يەسى. اتالعان ءۇش كومپانيا رەسەي نارىعىندا كوشباسشى بولىپ تابىلادى.

ببەج تەحنيكالىق مودەرنيزاتسيا رەتىندە كورسەتىلگەنىمەن شىن مانىندە فينتەحتى باقىلاۋ جۇيەسى ەكەنى انىق. بارلىق اقپارات، ونىڭ ىشىندە باستەر، كليەنتتەر، ترانزاكتسيالار، قارجى اعىندارى ءبىر پلاتفورماعا جينالماق. وسىنى جۇزەگە اسىرسا رەسەيلىكتەر كەز كەلگەن وتاندىق بۋكمەكەردى تولەم جۇيەلەرىنەن اجىراتا الادى جانە كليەنتتەردى وزدەرىمەن سىبايلاس كومپانيالارعا باعىتتاي الادى.

ونىمەن بىرگە، ميلليونداعان قازاقستاندىقتىڭ دەرەكتەرىنە قول جەتكىزۋ مۇمكىندىگى اشىلادى. جىلىنا 0,6–1,4 تريلليون تەڭگە اينالىمى بار سالانى باقىلاۋ ارقىلى رەسەيلىكتەر قازاقستاننان وراسان زور كاپيتال شىعارا الادى. ال قاۋىپسىزدىك پروتوكولدارى مەن تاۋەلسىز باقىلاۋ بولماعان جاعدايدا بۇل كيبەرشابۋىلدار، دەرەكتەردىڭ تارالۋى مەن ازاماتتارعا ساياسي قىسىم جاساۋعا جول اشادى.

ەڭ قورقىنىشتىسى، جاڭا زاڭ كۇشىنە ەنگەن سوڭ، ببەج ارقىلى قاجەت دەرەكتەر شەتەلدىك ارنايى قىزمەتتەردىڭ قولىنا تۇسسە، ولار قازاقستاندىقتاردى بوپسالاپ، ءوز شىنجىرىنا بايلاپ الامىز دەپ الاقاندارىن ىسقىلاپ وتىر. «سەن كەزىندە ءباس تىككەنسىڭ» دەپ، كەز-كەلگەن شەنەۋىكتى بوپسالاپ ۇركىتۋگە، قازاق مۇددەسىنە قارسى جۇمىس ىستەتۋگە بولادى. ۋمار كرەملەۆتىڭ ىشتەن شىققان سەپاراتيست اسلان تولەگەنوۆتى قولداپ جۇرگەنى انىقتالعاندىقتان، پازل كارتيناسى ەندى تولىق اشىلدى. كرەملەۆتىڭ ارتىندا تۇرعان سولتۇستىك كورشىمىزدىڭ ارنايى بارلاۋ قىزمەتى وسى مەحانيزم ارقىلى قازاقستانداعى ءاربىر ادامدى تولىق ءوز باقىلاۋىنا الايىن دەپ تۇر.

Abai.kz