تۇركىستان قالاسىنداعى №33 جالپى ءبىلىم بەرەتىن “كەلەشەك مەكتەبىندە” روبوتوتەحنيكا باعىتى جۇيەلى تۇردە دامىپ كەلەدى. ۇيىرمە جۇمىسىنىڭ ناتيجەسىندە وقۋشىلار حالىقارالىق دەڭگەيدە تابىسقا قول جەتكىزدى.

(سۋرەت :ۇيىمداستىرۋشىلاردان الدىندى )

ءبىلىم ۇياسىنىڭ جاس روبوتوتەحنيكتەرى قىتايدىڭ ماكاو قالاسىندا وتكەن First Lego League Asia Open Championship 2025 حالىقارالىق چەمپيوناتىندا جەڭىمپاز اتانىپ، ەل نامىسىن ابىرويمەن قورعاپ قايتتى.

اتالعان چەمپيونات — روبوتوتەحنيكا، عىلىمي زەرتتەۋ جانە ينجەنەرلىك يننوۆاتسيالار باعىتىنداعى ازيانىڭ ەڭ ءىرى الاڭدارىنىڭ ءبىرى. بيىلعى دودادا الەمنىڭ 30-دان استام ەلىنەن 500-دەن استام كوماندا جانە 12 مىڭنان اسا قاتىسۋشى باق سىنادى.

جارىستىڭ تاقىرىبى — «سۋ استى الەمىن زەرتتەۋ». ءۇش كۇندىك بايقاۋ بارىسىندا تۇركىستاندىق جاسوسپىرىمدەر ينجەنەرلىك ويلاۋ، جوبانى قورعاۋ جانە كوماندالىق جۇمىس بويىنشا جوعارى ناتيجە كورسەتتى.

كوماندانىڭ جەتەكشىلەرى — يسحاكوۆا پەريزات، جانتاەۆ ابدۋجاميل، ءالىمجان الۋا، ال قاتىسۋشىلار قاتارىندا جاس دارىندار يشانحان مارۋان مەن بوحانوۆ سۋينباي بار.

“كەلەشەك مەكتەبىندەگى” روبوتوتەحنيكا ۇيىرمەسى وقۋشىلاردىڭ عىلىمي-تەحنيكالىق ويلاۋ قابىلەتىن دامىتۋدى ماقسات ەتەدى. ساباقتار اپتاسىنا ءۇش رەت وتكىزىلىپ، وندا وقۋشىلار Arduino, DOBOT روبوتتارى، ءتۇرلى سەنسورلار مەن باعدارلامالاۋ پلاتفورمالارىندا جۇمىس ىستەۋدى مەڭگەرەدى.

ۇيىرمەنى تاجىريبەلى پەداگوگ جۇرگىزىپ، ءار وقۋشىنىڭ جەكە قابىلەتىن اشۋعا، توپپەن جۇمىس ىستەۋ مادەنيەتىن قالىپتاستىرۋعا باسا ءمان بەرەدى. تەوريالىق ءبىلىم تاجىريبەمەن ۇشتاسىپ، ناقتى ناتيجەگە باعىتتالعان بۇل ساباقتار وقۋشىلاردى ينجەنەرلىك جانە عىلىمي ىزدەنىستەرگە باۋليدى.

جۇيەلى دايىندىق پەن شىعارماشىلىق ىزدەنىستىڭ ارقاسىندا جاس تۇركىستاندىقتار حالىقارالىق دەڭگەيدە ۇزدىكتەر قاتارىنان كورىنىپ وتىر. بۇل – وڭىردەگى ءبىلىم ساپاسى مەن زاماناۋي ۇيىرمەلەردىڭ تيىمدىلىگىن دالەلدەيتىن ناقتى كورسەتكىش.

Abai.kz