قۇقىقتىق جۇيەنىڭ ماڭىزدى سالالارىنىڭ ءبىرى-ازاماتتىق ءىس جۇرگىزۋ. بۇل سالا قوعامداعى داۋلاردى ءادىل شەشۋدى، جەكە جانە زاڭدى تۇلعالاردىڭ قۇقىقتارىن قورعاۋدى، سوت ادىلدىگىن قامتاماسىز ەتۋدى كوزدەيتىن كۇردەلى ءارى جاۋاپتى باعىت بولىپ تابىلادى.

وسى سالادا جوعارى بىلىكتى زاڭ ماماندارىن دايارلاۋ ىسىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتى ەلىمىزدەگى الدىڭعى قاتارلى وقۋ ورىندارىنىڭ ءبىرى سانالادى. بيىل فاكۋلتەت ءوزىنىڭ 70 جىلدىق مەرەيتويىن اتاپ وتۋدە. بۇل – جەتپىس جىلدىق قاجىرلى ەڭبەكتىڭ، ساپالى ءبىلىم مەن عىلىمنىڭ، قۇقىقتىق مادەنيەتتىڭ قالىپتاسۋى مەن دامۋىنىڭ ايعاعى. جارتى عاسىردان استام ۋاقىت ىشىندە فاكۋلتەت مىڭداعان كاسىبي زاڭگەرلەردى تاربيەلەپ شىعاردى. تۇلەكتەرى بۇگىندە ەلىمىزدىڭ سوت، پروكۋراتۋرا، قۇقىق قورعاۋ جانە مەملەكەتتىك باسقارۋ ورگاندارىندا، سونداي-اق جەكە زاڭگەرلىك جانە عىلىمي-زەرتتەۋ سالالارىندا ابىرويمەن قىزمەت اتقارىپ ءجۇر. ولاردىڭ قاتارىندا بەدەلدى سۋديالار، پروكۋرورلار، ادۆوكاتتار، زاڭ عىلىمدارىنىڭ دوكتورلارى مەن پروفەسسورلار بار.فاكۋلتەتتىڭ قالىپتاسۋىندا ازاماتتىق قۇقىق جانە ازاماتتىق ءىس جۇرگىزۋ، ەڭبەك قۇقىعى كافەدراسىنىڭ پروفەسسور-وقىتۋشىلار قۇرامى ايرىقشا ەڭبەك ءسىڭىردى. كافەدرا وقىتۋشىلارى ستۋدەنتتەرگە تەرەڭ تەوريالىق ءبىلىم بەرۋمەن قاتار، سوت تاجىريبەسىنە جاقىن پراكتيكالىق ساباقتار مەن مودەلدىك سوت پروتسەستەرىن جۇيەلى تۇردە ۇيىمداستىرىپ كەلەدى.

زاڭ فاكۋلتەتىنىڭ باستى ۇستانىمى-ساپالى ءبىلىم مەن تاجىريبەنىڭ بىرلىگىن قامتاماسىز ەتۋ. ۋنيۆەرسيتەت ستۋدەنتتەرى ءتۇرلى رەسپۋبليكالىق جانە حالىقارالىق قۇقىقتىق وليمپيادالارعا، سوت پروتسەستەرىن مودەلدەۋ جارىستارىنا قاتىسىپ، جوعارى ناتيجەلەر كورسەتىپ ءجۇر. بۇل-ولاردىڭ كاسىبي دايارلىعىنىڭ جوعارى دەڭگەيىن دالەلدەيدى.قازىرگى تاڭدا فاكۋلتەت باكالاۆريات، ماگيستراتۋرا جانە دوكتورانتۋرا باعدارلامالارى بويىنشا كادرلار دايارلاپ، قۇقىق سالاسىنىڭ بارلىق باعىتتارىن قامتيدى. وقۋ ۇدەرىسىندە يننوۆاتسيالىق تەحنولوگيالار ەنگىزىلىپ، ستۋدەنتتەرگە زاماناۋي تسيفرلىق ءبىلىم بەرۋ قۇرالدارى قولجەتىمدى ەتىلگەن. پروفەسسور-وقىتۋشىلار قۇرامى زاڭنامانى جەتىلدىرۋ، قۇقىقتىق رەفورمالاردى جۇزەگە اسىرۋ جانە قۇقىقتىق مادەنيەتتى دامىتۋ باعىتىندا ماڭىزدى عىلىمي ەڭبەكتەر جازىپ، ەلىمىزدىڭ زاڭ شىعارۋ پروتسەسىنە بەلسەندى تۇردە قاتىسۋدا.

70 جىلدىق تاريح-بۇل جاي عانا جىلدار تىزبەگى ەمەس، بۇل بىرنەشە بۋىن زاڭگەرلەردىڭ ەڭبەگى، تاباندىلىعى مەن بىلىمگە دەگەن ۇمتىلىسىنىڭ ناتيجەسى. فاكۋلتەت العاشقى كۇننەن باستاپ قازاقستاننىڭ قۇقىقتىق سالاسىنا جوعارى بىلىكتى، ادامگەرشىلىگى جوعارى، ادىلدىك پەن ادالدىق قاعيداتتارىن ۇستاناتىن ماماندار دايارلاۋدى ماقسات ەتتى. بۇگىندە قازۇۋ زاڭ فاكۋلتەتى ءداستۇر مەن جاڭاشىلدىقتى ۇشتاستىرىپ، قۇقىقتىق ءبىلىم بەرۋدىڭ جاڭا دەڭگەيىنە كوتەرىلدى. فاكۋلتەتتىڭ 70 جىلدىق مەرەيتويى – وتكەنگە قۇرمەت، بولاشاققا سەنىم. الداعى ۋاقىتتا دا ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتى ەلىمىزدىڭ قۇقىقتىق جۇيەسىنىڭ دامۋىنا، ادىلەتتى قوعام قۇرۋ ىسىنە جانە جاڭا بۋىن زاڭگەرلەرىن تاربيەلەۋگە ءوز ۇلەسىن قوسا بەرەتىنى ءسوزسىز. 70 جىل-بۇل ساپالى ءبىلىم مەن كاسىبي شەبەرلىكتىڭ، ادىلەت پەن جاۋاپكەرشىلىكتىڭ مەرەيلى تاريحى. قازۇۋ زاڭ فاكۋلتەتى-ەلىمىزدىڭ  قۇقىقتىق مادەنيەتىنىڭ التىن دىڭگەگى.

سۋلەيمەنوۆا س.ج.

ءال-فارابي اتىنداعى قازۇۋ-دىڭ زاڭ فاكۋلتەتى ازاماتتىق قۇقىق، ازاماتتىق ءىس جۇرگىزۋ جانە ەڭبەك قۇقىعى كافەدراسىنىڭ وقىتۋشىسى، زاڭ عىلىمدارىنىڭ دوكتورى، پروفەسسور

Abai.kz