ءبىر عاسىر بۇرىن ەۋروپا دالاسىن شايقاعان سوعىس پەن بۇگىنگى ۋكراينانىڭ اسپانىندا زۋلاعان درونداردىڭ اراسىندا ۇندەستىك بار. قانشا جەردەن زامان وزگەردى دەگەنمەن، مەملەكەتتەردىڭ كۇيرەۋ سەبەپتەرى سول كۇيى قالدى. رۋح پەن رەسۋرس سارقىلعاندا، قارۋ ءۇنسىز قالادى.

گەرمانيا ءبىرىنشى دۇنيەجۇزىلىك سوعىستا الدىڭعى شەپتى ۇستاپ تۇرىپ، تۇتاس ەكونوميكالىق جۇيەسى كۇيرەگەننەن كەيىن تىزە بۇكتى. ارتيللەرياسى ءپاريجدى اتقىلاپ تۇرعاندا، كوشەلەرىندە تولقۋ باستالعانىن تاريحتان بىلەمىز. سەبەبى سوعىستىڭ سوڭعى شەشۋشى مايدانى سىرتتا ەمەس، ىشتە ءوتتى. سارباز ەمەس، اش-جالاڭاش حالىق گەرمانيانىڭ تاعدىردى شەشتى.

سول سياقتى رەسەي دە سوعىستىڭ ءتورتىنشى جىلىندا ىشكى جاعداي سىر بەرە باستاعانداي... بيۋدجەت بوس، وڭىرلەر جۇتاپ وتىر. ءتىپتى، كەيبىر ايماقتاردا شەنەۋنىكتەر قاراپايىم بيۋدجەت قىزمەتكەرلەرىنە جالاقىنى كەشىكتىرىپ بەرە باستاعان.

قورعانىس ونەركاسىبى كۇشەيگەن سايىن ازىق-تۇلىك باعاسى ءوسىپ، جانارماي تاپشىلىعى كۇشەيە تۇسكەن. سوعىسقا تەك تەحنيكا عانا ەمەس، قىرۋار قارجى دا جۇمسالۋدا. قولداعى باردىڭ ءبارى وق-ءدارى مەن تانك جاساۋعا جۇمسالىپ، قاراپايىم ازاماتتىڭ كۇندەلىكتى تىرشىلىگى قيىنداپ بارادى.

گەرمانيانىڭ سوعىستا جەڭىلۋىنىڭ باستى سەبەبى سوعىسقا جۇمسالعان اقشانىڭ سالدارىنان حالىقتىڭ تۇرمىسى قۇردىمعا كەتتى. سول ءۇردىس ماسكەۋگە دە جەتكەندەي.

سانكتسيا قازىرگى زاماننىڭ تەڭىز بلوكاداسىنا اينالىپ وتىر. رەسەيدىڭ ءىرى كومپانيالارى حالىقارالىق نارىقتان شەتتەتىلدى. جاڭا تەحنولوگيالارعا قولى جەتپەيدى، قارجى ارنالارى شەتىنەن جابىلىپ جاتىر.

بۇگىندە رەسەي اقپاراتتىق مايداندا جەڭىپ جاتقانداي كورىنگەنىمەن، شىندىق باسقاشا. ىشكى الەۋەت سارقىلعان سايىن، پروپاگاندا شىندىقتى بۇركەمەلەۋگە تىرىساتىنى بەلگىلى.

ءبىر عاسىر بۇرىن نەمىستەر دە گازەتتەردەن جەڭىس تۋرالى كوپ وقىپ، كوشەدە اشتىققا تاپ بولدى. اقىرى، ء"بىزدى ساتتى" دەگەن اڭىز تارادى. ول اڭىز كەيىنگى فاشيزمگە جول اشتى. ال قازىرگى رەسەي دە ءدال وسى جولدىڭ شەتىندە تۇر. ميف پەن شىندىقتىڭ ارپالىسى كەزىندە ادىلەت سالتانات قۇرۋى ءتيىس.

تاريحتىڭ سالماعى مەن بولاشاقتىڭ باعىتىن تۇسىنەتىن ۋاقىت جەتتى. اۋىلىنا سۋ اپارا الماعان مەملەكەت، ارمياسىن ساقتاي المايدى. زىمىرانمەن ەمەس، جاۋاپكەرشىلىكپەن ۇتقان جۇرتتار عانا جاڭا داۋىرگە وتەدى.

نۇرلان جۇماقانوۆ

Abai.kz