اليبەك 1983 جىلى قىزىلوردا قالاسىندا دۇنيەگە كەلدى. اتا-اناسى دا ەڭبەكقور: اكەسى قازبەك قۇرىلىسشى، اناسى گۇلجان ۇستاز. بەس بالانىڭ ءبىرى بولىپ وسكەن اليبەك بالا كەزىنەن ەڭبەكقورلىققا، جاۋاپكەرشىلىككە باۋلاندى. 2000 جىلى ول قازاق ۇلتتىق مەديتسينا ۋنيۆەرسيتەتىنە ءتۇسىپ، 2006 جىلى ونى ءتامامدادى. ءبىر جىلدان كەيىن نەيروحيرۋرگيا سالاسىندا ورديناتۋرادان ءوتىپ، قازىرگى ۋاقىتقا دەيىن نەيروونكولوگ ماماندىعى بويىنشا 7 قالالىق كلينيكالىق اۋرۋحاناسىندا اعا دارىگەر قىزمەتىن اتقارىپ كەلەدى.

اليبەك جانيسباەۆ بۇگىنگى تاڭدا تاجىريبەلى نەيروحيرۋرگ رەتىندە تانىلدى. ول ءۇشىن نەيروحيرۋرگيا – جاي عانا ماماندىق ەمەس، ءار ناۋقاسقا ءومىر سىيلاۋ، ولاردىڭ تاعدىرىن وزگەرتۋ. 18 جىلدىق ەڭبەك جولىندا ول شامامەن 3000-عا جۋىق وپەراتسيا جاساپ، 10 مىڭنان استام ناۋقاستى قابىلداعان. ارقايسىسى اسا اۋىر جاعدايداعى مي ىسىگىمەن اۋىرعان جاندارعا قاتىستى. ءار ناۋقاس – ءبىر ءومىر، ءار وپەراتسيا – شەكسىز جاۋاپكەرشىلىك. اليبەك ءاربىر وتادا تەك تەحنيكالىق شەبەرلىگىن عانا ەمەس، جان-جۇرەگى مەن مەيىرىمىن دە قوسىپ، ناۋقاستىڭ جانىن سەزىنە وتىرىپ جۇمىس ىستەيدى.

نەيروحيرۋرگ ماماندىعى – ەڭ كۇردەلى، ءارى جاۋاپكەرشىلىگى اسا جوعارى سالا. ءار وپەراتسيا – ۇلكەن شىدامدىلىق پەن تاباندىلىقتى تالاپ ەتەدى. اليبەك وسىنداي قيىندىقتارعا قاراماستان، ءار ناۋقاستى جان-جاقتى قاراستىرىپ، ولاردىڭ ءومىرىن ساقتاپ قالۋ ءۇشىن بارىن سالادى. ءبىر وقيعانى ەسكە الساق: 20 جاسار جاس ناۋقاسقا تۋعاننان مي دامۋىنىڭ بۇزىلىسىمەن كۇرەسۋ قاجەت بولدى. 40 كۇن ىشىندە ءتورت كەزەڭمەن وپەراتسيا جاسالىپ، ءار كەزەڭ الدىندا دارىگەرلەر دە، ناۋقاس تا قاتتى قوبالجىعان. الايدا مامانداردىڭ قاجىرلى ەڭبەگى مەن كاسىبيلىگى ارقاسىندا جاس ناۋقاس تولىقتاي جازىلىپ، قالىپتى ومىرگە ورالدى.

اليبەك جانيسباەۆ ءوزىنىڭ كاسىبىنە تەك ءبىلىم مەن شەبەرلىكتى عانا ەمەس، ادالدىقتى، جاۋاپكەرشىلىكتى، مەيىرىمدىلىكتى قوسىپ وتىرادى. ول ءار ناۋقاسپەن كۇرەستە جانىن، تانىمىن، تاجىريبەسىن تۇگەل جۇمسايدى. پروفەسسور ديۋسەمبەكوۆ ەرمەك قاۆتاەۆيچ ايتقانداي:

«اللا الدىندا، ءوز-ءوزىڭنىڭ الدىندا، ناۋقاستىڭ الدىندا بار كۇش-جىگەرىڭمەن، بار بىلىمىڭمەن، ىنتا-ىقىلاسىڭمەن ەڭبەك ەتسەڭ، ەڭبەگىڭ ناتيجەسىز بولمايدى».

وسى قاعيدا اليبەكتىڭ ءار ىسىندە كورىنىس تابادى. ول ءاربىر جەڭىسىن، ءاربىر ايىققان ناۋقاستىڭ قۋانىشىن ءوز جەتىستىگى دەپ بىلەدى. كۇردەلى، قاتەرلى باس مي ىسىكتەرىمەن كۇرەسۋدە ونىڭ ادالدىعى مەن تاباندىلىعى كوپتەگەن جاس ماماندارعا ۇلگى.

بۇگىندە اليبەك جانيسباەۆ – ناعىز نەيروحيرۋرگيالىق ەرلىك سيمۆولى. ونىڭ 18 جىلدىق قاجىرلى ەڭبەگى، 3000-عا جۋىق ءومىردى قۇتقارعان شەبەرلىگى، 10 مىڭنان استام ادامعا مەديتسينالىق كومەك كورسەتكەنى – كاسىبي باتىرلىقتىڭ ايعاعى. جان-جاقتى قامقورلىعى تەك مەديتسينالىق سالادا عانا ەمەس، قوعامدا دا زور قۇرمەتكە يە. مۇنداي مامانداردىڭ ارقاسىندا ءاربىر ناۋقاستىڭ ءومىرى قاۋىپسىز، ءۇمىت پەن سەنىم مول. اليبەكتىڭ جولى – شىندىقتى، ادالدىقتى، ادام ءومىرىن قادىرلەۋدى ۇستانعان ءاربىر جاس دارىگەرگە ۇلگى.

Abai.kz