افون قالاسىندا تۇركياداعى قازاق ستۋدەنتتەرىنىڭ قاتىسۋىمەن فۋتبول جارىسى ءوتتى.

شارا قازاقستان رەسپۋبليكاسىنىڭ تۇركياداعى ەلشىلىگىنىڭ قولداۋىمەن، بىرلىك قازاق جاستارى ۇيىمى تاراپىنان ۇيىمداستىرىلىپ، تۇركيادا ءبىلىم الىپ جۇرگەن قازاق ستۋدەنتتەرىن ءبىر الاڭعا جينادى.

تۋرنيرگە بىرنەشە قالا مەن ۋنيۆەرسيتەتتەن كوماندالار قاتىسىپ، ويىن جوعارى دەڭگەيدە ءوتتى. ويىن بارىسىندا جانكۇيەرلەر دە ءوز كوماندالارىن بەلسەندى تۇردە قولداپ، ەرەكشە اتموسفەرا قالىپتاستىردى.

– جارىستىڭ باستى ماقساتى – ستۋدەنتتەر اراسىنداعى دوستىقتى نىعايتۋ، سپورتقا دەگەن قىزىعۋشىلىقتى ارتتىرۋ جانە قازاقستاننىڭ شەتەلدەگى جاستارىن بىرىكتىرۋ, – دەدى ىستانبۇل قالاسىنداعى باس كونسۋل امانقۇل نۇريددين.

جارىc سوڭىندا ۇزدىك ويىن كورسەتكەن كوماندالار مەن ويىنشىلارعا ارنايى ماراپاتتار تابىستالدى. Birlik Arbella Super Cup ءداستۇرلى فۋتبول ءتۋرنيرىنىڭ 2025 جىلعى چەمپيونى – ساكاريا قالاسىنىڭ ستۋدەنتتەرى. انكارا ستۋدەنتتەرى قارقىندى ويىن كورسەتىپ 2-ورىندى, ال ستامبۋل (حاليچ ۋنيۆەرسيتەتى) جانە ەسكيشەحير قالاسىنىڭ كوماندالارى 3-ورىندى يەلەندى.

افون قالاسىنداعى بىرلىك جاستار ۇيىمىنىڭ قوناقجايلىعى ەرەكشە اتاپ وتەرلىك بولدى. ۇيىم مۇشەلەرى جارىسقا كەلگەن ستۋدەنتتەردى قۇرمەتپەن قارسى الىپ، بارلىق كوماندالارعا جايلى جاعداي جاسادى. قاتىسۋشىلاردى كولىكپەن قارسى الۋ، الاڭدى دايىنداۋ، تىنىعۋ ايماقتارىن ۇيىمداستىرۋ جانە جالپى اتموسفەرانى كوتەرۋ – بارلىعى جوعارى دەڭگەيدە ءوتتى.

ستۋدەنتتەر افون جاستارىنىڭ شىنايى ىقىلاسى مەن بىرلىككە دەگەن نيەتىن سەزىنىپ، وزدەرىن ۇيدەگىدەي جايلى سەزىندى. شارانىڭ ءساتتى وتۋىنە ءدال وسى ۇيىمشىلدىق پەن قوناقجايلىلىق ۇلكەن ۇلەس قوستى.

بۇل تۋرنير تەك سپورتتىق جارىس قانا ەمەس، تۇركياداعى قازاق جاستارىنىڭ بىرلىگىن كورسەتكەن ماڭىزدى وقيعا بولدى. جاستار ءبىر-بىرىمەن جاقىنىراق تانىسىپ، جاڭا دوستىقتار ورناتىپ، شەتەلدەگى ستۋدەنتتىك ءومىردى ودان ءارى جانداندىرا ءتۇستى.

قاراقات بەردالىقىزى،

تۇركيا، افون-كاراحيسار قالاسى

Abai.kz