ءماجىلىس دەپۋتاتتارى ەرلان سايروۆ پەن مارحابات جايىمبەتوۆ اۋدان اكىمدەرىنىڭ سايلاۋىن ۋاقىتشا توقتاتا تۇرۋدى ۇسىندى.

بۇل تۋرالى دەپۋتاتتار بۇگىنگى ءماجىلىستىڭ وتىرىسىندا ءسوز قوزعادى. اتاپ ايتقاندا، ەرلان سايروۆ دەپۋتاتتىق ساۋالىندا ەلىمىز سوڭعى 5 جىلدا ايتارلىقتاي ءىرى قادامدار جاساپ، بۇگىندە ءاربىر جەكسەنبى سايىن اۋىل، اۋدان، قالا اكىمدەرىنىڭ سايلاۋى ءوتىپ جاتقانىن ايتتى. الايدا ماسەلەنىڭ پىسىقتايتىن تۇستارى دا بار.

«ءالى دە سايلانىپ جاتقان اۋىل اكىمدەرىنىڭ قۇزىرەتىن، ولاردىڭ الەۋمەتتىك-ەكونوميكالىق مۇمكىندىگىن رەتتەۋ قاجەت ەكەنىنە كوزىمىز جەتىپ وتىر. زاڭ اياسىندا اۋىل اكىمدەرىنىڭ قۇزىرەتىن ءالى دە كەڭەيتۋىمىز قاجەت. ءتورتىنشى بيۋدجەتتى قالىپتاستىرۋ تەتىكتەرىن زاڭمەن پىسىقتاۋىمىز ءتيىس»، – دەدى دەپۋتات.

ەرلان سايروۆتىڭ ايتۋىنشا، ەلىمىز بۇگىندە اۋدان، قالا اكىمدەرىن پيلوتتىق فورماتتا سايلاۋعا كىرىسىپ، 52 اكىم سايلانعان ەكەن. بىراق بۇل ءتاسىلدىڭ تيىمدىلىگى ءالى دە سارالانباسا كەرەك. ول جەتىلدىرۋدى تالاپ ەتەدى. ءتىپتى، سايلانعان اۋدان اكىمدەرىنىڭ اراسىندا ءبىر جىلعا جەتپەي جۇمىسىنان كەتكەندەر دە بار دەپ ءسوزىن جالعادى دەپۋتات.

ارىپتەسىنىڭ ءسوزىن قولداعان مارحابات جايىمبەتوۆ ءوزى بۇرىن قالا مەن اۋدان اكىم بولعاندىقتان بۇل ماسەلەمەن جاقسى تانىس ەكەنىن ايتتى. دەپۋتاتتىڭ ايتۋىنشا ول جاقىندا عانا بىرقاتار اۋدان ارالاپ، ەلدىڭ تىنىس-تىرشىلىگىمەن تانىسقان. ساپار بارىسىندا دەپۋتات اۋدان اكىمدەرىن تىكەلەي سايلاۋ جۇيەسىنىڭ ءالى دە پىسىقتاۋدى قاجەت ەكەنىنە كوز جەتكىزگەن ەكەن.

«اۋدانعا بولىنەتىن قارجى ماسەلەسىن رەتتەۋگە ءتيىسپىز. ال اۋدان اكىمدەرىنىڭ قۇزىرەتى بويىنشا بىرنەشە ماڭىزدى زاڭعا وزگەرىس ەنگىزۋ قاجەت. مىسالى، ءبىلىم بەرۋ سالاسىنىڭ شىعىستارى وبلىستىق بيۋدجەتتە قالىپ، كىرىستەرى اۋدان بيۋدجەتىندە. قازىر اۋدان اكىمدەرىندە قۇزىرەت از، جاۋاپكەرشىلىك كوپ. ءبىلىم، دەنساۋلىق ۆەتەريناريا سالاسى، جۇمىسپەن قامتۋ ورتالىقتارى ءتىپتى باعىنبايدى اۋدان اكىمىنە. ەڭ باستىسى، اۋىل اكىمدەرىنىڭ سايلاۋىنىڭ ءبىر 5 جىلدىق كەزەڭىن كۇتىپ، اۋىلدىق سايلانعان اكىمدەردىڭ تاجىريبەلى كورپۋسىن دايارلاۋ ماڭىزدى. سوندا عانا ساياسي، ەڭ باستىسى كاسىبي كادرلار رەزەرۆى قالىپتاسادى. سوندىقتان وعان ازىرشە ۋاقىتشا توقتاۋ قويىپ، جان-جاقتى پىسىقتاعانىمىز ءجون»، – دەدى ول.

بۇعان قوسا، ەرلان سايروۆ اۋدان اكىمدەرىنىڭ سايلاۋىنا قىرۋار قاراجات كەتەتىنىن العا تارتتى.

«تەك بيىلدىڭ وزىندە 6 اۋدان اكىمى مەن 1 وبلىستىق ماڭىزى بار قالا اكىمىنىڭ سايلاۋى ءوتتى. وسىنىڭ وزىنە مەملەكەتتىك بيۋدجەتتەن 1 ميلليارد تەڭگەگە جۋىق قاراجات جۇمسالدى»، – دەدى دەپۋتات.

ءوز سوزىندە ول اۋىلدىق وكرۋگ اكىمدەرىنىڭ سايلاۋ جۇيەسىن ەنگىزۋ بەس جىل بويى كەزەڭ-كەزەڭىمەن جۇرگىزىلىپ كەلە جاتقانىن ايتىپ، اۋدان اكىمدەرىن سايلاۋ ماسەلەسىندە جۇيەلى ءارى جان-جاقتى زەردەلەنگەن ءتاسىل قاجەت ەكەنىنە توقتالدى.

بۇل رەتتە ەرلان سايروۆ الەمدىك تاجىريبەگە ارقا سۇيەگەن ساياسي ساراپشىلار مەن مەملەكەتتىك باسقارۋدا تاجىريبەسى بار ازاماتتاردىڭ «اۋدان اكىمدەرىن ءماسليحات دەپۋتاتتارى دا سايلاي الادى» دەگەن پىكىرىن ورتاعا سالدى.

سونداي-اق، دەپۋتاتتار وسىناۋ ماڭىزدى ماسەلەدە اسىعىستىق تانىتۋعا بولمايتىنىنا نازار اۋدارىپ، ۇسىنىستىڭ سايلاۋ پروتسەسىن شەكتەۋگە ەمەس، كەرىسىنشە حالىقتىڭ سايلاۋعا دەگەن سەنىمىن ارتتىرۋعا باعىتتالعانىن ەسكە سالدى.

ءسوز سوڭىندا قوس دەپۋتات جەرگىلىكتى ءوزىن-ءوزى باسقارۋ، مەملەكەتتىك قىزمەت، سايلاۋ، وڭىرلەردى دامىتۋ تۋرالى كوپتەگەن زاڭدارعا قاجەتتى نورمالاردى ەنگىزگەنشە، اۋدان دەڭگەيىندەگى اكىمدەردىڭ تىكەلەي سايلاۋىنا توقتاتا تۇرۋدى ۇسىندى.

Abai.kz