بيىل 80 جىلدىق مەرەيتويىن اتاپ وتكەلى جاتقان عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا 30 قاراشا جانە 2 جەلتوقسان كۇندەرى ايگىلى دراماتۋرگ نيكولاي گوگولدىڭ ەڭ تانىمال تۋىندىسى «رەۆيزور» العاش رەت ساحنالانباق.

قويىلىم ۇلكەن ساحنادا، ساۋندراما جانرىندا ۇسىنىلماق. بۇل جانردا مۋزىكا مەن دىبىس تەك سۇيەمەلدەۋ ەمەس، ساحنالىق ارەكەتتىڭ وزەگىنە اينالىپ، كورەرمەننىڭ كوز الدىندا تۋىندايدى.

سپەكتاكلدىڭ رەجيسسەرى ءارى تەاتردىڭ كوركەمدىك جەتەكشىسى فارحاد مولداعالي بۇل جانرعا بۇرىن دا جۇگىنگەن. ونىڭ سپەكتاكلدەرىندە ساۋندراما جاي كوركەمدىك ءتاسىل ەمەس، تۇتاس ويلاۋ جۇيەسىنە اينالادى: دراماتۋرگيا، مۋزىكالىق يمپروۆيزاتسيا جانە اكتەرلىك پلاستيكا ءبىر ىرعاقتا توعىسادى.

قويىلىمدى دايىنداۋعا قاتىسقاندار: كومپوزيتور – سەرىكجان ايتقالي، ستسەنوگراف – اينۇر ەسبولاتوۆا، حورەوگراف – سالتانات بەيميشەۆا، حورمەيستەر – عالىمجان بەرەكەشەۆ، رەجيسسەردىڭ اسسيستەنتى – اينۇرجان ورىنباساروۆا.

سونىمەن قاتار تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ مۋزىكانت-ستۋدەنتتەرىنەن قۇرالعان انسامبل سپەكتاكلدى جاندى مۋزىكامەن قامتاماسىز ەتەدى.

قويىلىمدا تەاتر ارتيستەرى: ەرلان كارىباەۆ، دارحان سۇلەيمەنوۆ, سونداي-اق قازاقستاننىڭ ەڭبەك سىڭىرگەن قايراتكەرلەرى رايحان قاليولدينا، قادىرعازى قۋاندىقوۆ، سافۋان رىسبايۇلى جانە ليزا سەرىكوۆا ونەر كورسەتەدى.

تەاتردىڭ 80-ماۋسىمى ەرەكشە قارقىنمەن باستالدى. قىركۇيەكتەن بەرى ترۋپپا قازاقستان اتىنان بىرنەشە ەلدە ونەر كورسەتىپ ۇلگەردى: سپەكتاكلدەر وڭتۇستىك كورەيا، بەلارۋس، رەسەي، قىرعىزستان ەلدەرىندە وتكەن فەستيۆالدەردە كورسەتىلدى، سەمەي قالاسىنا گاسترولدىك ساپار جاسالدى. ماۋسىمنىڭ ماڭىزدى وقيعالارىنىڭ ءبىرى – سانكت-پەتەربۋرگتەگى «بالتيسكي دوم» حالىقارالىق تەاتر فەستيۆالىنە «ۇلپان» سپەكتاكلىمەن (رەج. گۇلناز بالپەيسوۆا) قاتىسۋ بولدى. قازاقستاننان العاش رەت قاتىسقان تەاتر لەونيد پوپوۆ اتىنداعى باق سىيلىعىنا يە بولدى. قىرعىزستانداعى فەستيۆالدە دە «ۇلپان» گران-پري جانە ءۇش جەكە نوميناتسيانى جەڭىپ، تەاتردىڭ كوركەمدىك دەڭگەيىن ايقىن كورسەتتى.

بۇعان قوسا رەپەرتۋار بىردەن ءۇش جاڭا قويىلىممەن تولىقتى:
– «شيە باعى» (رەج. راچا ماحاتاەۆ)
– «ءبارى جاقسى» (رەج. زاڭعار احمەت-قازى)
– «كۇل بيكەش» (رەج. انتون زايتسەۆ)

ەندى تەاتر ماۋسىمنىڭ جاڭا بەلەسىن – «رەۆيزور» سپەكتاكلىمەن اشپاق. بۇل قويىلىم جىل سوڭىنداعى ەڭ ماڭىزدى پرەمەرالاردىڭ ءبىرى بولۋعا نيەتتى. جاڭا ينتەرپرەتاتسيا كلاسسيكالىق تۋىندىنى قايتا بايانداۋعا ەمەس، گوگول ءماتىنىن مۋزىكالىق ورگانيزم رەتىندە سەزىنۋگە شاقىرادى. ءار ءسوز، ءار ءۇزىلىس، ءار قيمىل دىبىسپەن ۇندەسىپ، مازمۇن مەن ماعىنا تەرەڭدەتە اشىلادى. مۋزىكالىق سۇيەمەلدەۋ، اكتەرلەر، حور سپەكتاكلگە ەرەكشەلىك بەرەدى.

بۇل نۇسقادا رەۆيزور – ناقتى كەيىپكەر ەمەس، ۇرەيدىڭ ىرعاعىن تۋعىزاتىن سيمۆول. قالا شەنەۋنىكتەرىنىڭ ابدىراپ قالۋى، سىبىس، كۇدىك پەن ەكىجۇزدىلىك – ءبارى دىبىستىق بەينە تابادى. يرونيا مەن ريتم ارقىلى قويىلىم بيلىك پەن جاۋاپكەرشىلىك، قورقىنىشتىڭ الەۋمەتتىك تابيعاتى تۋرالى وي قوزعايدى.

پرەمەرا قوناقتارى: ءاسانالى ءاشىموۆ، تۇڭعىشباي جامانقۇلوۆ، ازامات ساتىبالدى، اسان ءماجىت، ەركەبۇلان دايىروۆ، ازات سەيتمەتوۆ، داناگۇل تەمىرسۇلتانوۆا، روزا رىمباەۆا، عازيزحان شەكەربەكوۆ جانە ت.ب.

«رەۆيزور» سپەكتاكلىنىڭ پرەمەراسى 30 قاراشا جانە 2 جەلتوقساندا وتەدى. قويىلىم عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ۇلكەن ساحناسىندا كورسەتىلەدى. تەاتر جاڭا فورمالاردى باعالايتىن كورەرمەندەردى، كلاسسيكانى جاڭاشا سەزىنگىسى كەلەتىندەردى جانە تىڭ اسەر ىزدەيتىندەردى پرەمەراعا شاقىرادى. بۇل «رەۆيزور» بۇرىنعىدان وزگەشە، قايتالانباس قويىلىم بولماق.

Abai.kz