اقمولا وبلىسى بيىلعى وراق ناۋقانىندا سوڭعى جىلدارداعى ەڭ جوعارى ناتيجەگە قول جەتكىزىپ، استىقتىڭ جالپى جينالىمى بويىنشا ەلدەگى كوشباسشىلاردىڭ بىرىنە اينالدى.

اۋىل شارۋاشىلىعى مينيسترلىگىنىڭ مالىمەتىنشە، وڭىردە ورتاشا ونىمدىلىك 16,3 تس/گا بولىپ، 7,6 ملن توننادان استام استىق باستىرىلدى. جينالعان ءونىمنىڭ 70%-دان استامى ءۇشىنشى سانات تالاپتارىنا سايكەس كەلەدى. بۇل وبلىستىڭ ءداستۇرلى جانە جاڭا ەكسپورتتىق نارىقتارداعى باسەكەلەستىگىن ارتتىرا تۇسەدى.

قازاقستاندا شىعارىلعان «اقمولا-2»، «استانا-2» جانە «اينا» تۇقىمدارىن قولدانعان شارۋاشىلىقتار گەكتارىنان 30 تسەنتنەردەن جوعارى ءونىم الدى. «ماكسيموۆسكوە» جشس-دە ەڭ جوعارى كورسەتكىش تىركەلدى – 41,2 تس/گا. مۇنداي ناتيجەلەر مينەرالدى تىڭايتقىشتاردى، ەليتالىق تۇقىمدار مەن وسىمدىكتەردى قورعاۋ قۇرالدارىن ءتيىمدى قولدانۋدىڭ ارقاسىندا مۇمكىن بولدى.

بيىل وبلىستا ەگىس القاپتارىن ءارتاراپتاندىرۋ دا سەرپىن الدى: مايلى داقىلدار كولەمى العاش رەت 500 مىڭ گەكتارعا جەتتى، بۇل وتكەن جىلمەن سالىستىرعاندا 2,5 ەسە كوپ.

جىل باسىنان بەرى وڭىردە 1 ترلن تەڭگەنىڭ اۋىل شارۋاشىلىعى ءونىمى ءوندىرىلدى. جىل سوڭىنا دەيىن بۇل كورسەتكىش 1,2 ترلن تەڭگەگە جەتۋى مۇمكىن.

وڭىردە حالىقارالىق كومپانيالاردىڭ قاتىسۋىمەن اۋىل شارۋاشىلىعى ونىمدەرىن تەرەڭ وڭدەۋ باعىتىندا ءىرى جوبالار ىسكە اسىرىلىپ جاتىر. سولاردىڭ ءبىرى – Dalian Hesheng Holdings كومپانياسى جۇزەگە اسىرىپ جاتقان جىلىنا 3 ملن تونناعا دەيىن استىق وڭدەيتىن زاۋىت قۇرىلىسى. ينۆەستيتسيا كولەمى – $1,8 ملرد، جوبانى 2028 جىلى ىسكە قوسۋ جوسپارلانعان.

سونىمەن قاتار قازان ايىندا شورتاندى اۋدانىندا Hopefull Grain كومپانياسىنىڭ $1,5 ملرد تۇراتىن تاعى ءبىر تەرەڭ وڭدەۋ كەشەنىن سالۋ تۋرالى كەلىسىم جاسالدى. ەسىل اۋدانىندا بيدايدى وڭدەۋ، جەم ءوندىرۋ زاۋىتتارى مەن ەلەۆاتور قۇرىلىسى جوسپارلانۋدا.

Abai.kz