استانادا مەملەكەتتىك كەڭەسشى ەرلان قاريننىڭ توراعالىعىمەن پارلامەنتتىك رەفورما جونىندەگى جۇمىس توبىنىڭ كەزەكتى وتىرىسى ءوتتى، دەپ حابارلايدى اقوردانىڭ ءباسپاسوز قىزمەتى.

جيىندا بولاشاق ءبىر پالاتالى پارلامەنتتى قالىپتاستىرۋعا قاتىستى ماسەلەلەر تالقىلاندى. اتاپ ايتقاندا، جۇمىس توبى مۇشەلەرىنىڭ ۇسىنىستارى، سونداي-اق ازاماتتاردىڭ ە-Otinish جانە E-gov پلاتفورمالارى ارقىلى كەلىپ تۇسكەن باستامالارى قارالدى.

وتىرىستا جاڭا پارلامەنت دەپۋتاتتارىنا قويىلاتىن بىلىكتىلىك تالاپتارى، ولاردى سايلاۋ ءتارتىبى، سانى مەن ساپالىق قۇرامى، وكىلەتتىلىك مەرزىمى جانە كۆوتاعا قاتىستى تاسىلدەر سارالاندى.

پارلامەنتاريزم ينستيتۋتىنىڭ ديرەكتورى ناتاليا پان پارلامەنتتىك رەفورما جونىندە ازاماتتاردان، ساراپشىلاردان جانە قوعام بەلسەندىلەرىنەن كەلىپ تۇسكەن ۇسىنىستار تۋرالى اقپارات بەردى.

پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ جۇمىس توبى مۇشەلەرى مەن ساياسي پارتيالاردان جيناقتالعان ۇسىنىستار نەگىزىندە ازىرلەنگەن جالپى تاسىلدەر تۋرالى ايتتى.

جۇمىس توبىنىڭ مۇشەلەرى مارات شيبۇتوۆ، اندرەي چەبوتارەۆ، اليپاشا كاراەۆ، ماگەررام ماگەرراموۆ، ايدوس سارىم، ەلنۇر بەيسەنباەۆ، ءبورىحان نۇرمۇحامەدوۆ، قارلىعاش جامانقۇلوۆا، نۇرلان بەكنازاروۆ، ينديرا اۋباكىروۆا، اسحات راحىمجانوۆ، مارات ءباشىموۆ، ءۇنزيلا شاپاق، ازات پەرۋاشەۆ، سەرىك ەگىزباەۆ، سەرگەي پونومارەۆ، قابدۋلساميح ايتحوجين، الۋا يبراەۆا، ايداربەك قوجانازاروۆ، سنەجاننا يماشەۆا ءوز ەسكەرتپەلەرى مەن ۇسىنىستارىن ايتتى.

وتىرىستا كوتەرىلگەن باستامالار ەگجەي-تەگجەيلى سارالانىپ، جۇيەلەنەدى. پارلامەنتتىك رەفورمانى وتكىزۋ جونىندەگى نەگىزگى تاسىلدەردى قالىپتاستىرۋ ءىسى جۇمىس توبىنىڭ الداعى وتىرىستارىندا جالعاساتىن بولادى.

Abai.kz