جەتىسۋ وبلىسىندا ورتا جانە مەكتەپكە دەيىنگى ءبىلىم بەرۋ مەكەمەلەرىندە  بالالاردى تاماقتاندىرۋ ساپاسى مەن ولاردىڭ قاۋىپسىزدىگىن قامتاماسىز ەتۋدى باقىلايتىن قوعامدىق شتاب جۇمىس ىستەيدى.

وسى جىلدىڭ قازان ايىندا قۇرىلعان شتابتىڭ قۇرامىنداعى جەرگىلىكتى ءماسليحات دەپۋتاتتارى، ۇكىمەتتىك ەمەس ۇيىمدار وكىلدەرى، «اتامەكەن» كاسىپكەرلەر پالاتاسىنىڭ ايماقتىق فيليالىنىڭ، بارلىق دەڭگەيدەگى قوعامدىق كەڭەستەر مەن «AMANAT» پارتياسى وبلىستىق فيليالىنىڭ مۇشەلەرى جانە بەلسەندى ازاماتتار ەكى اي ىشىندە وڭىردەگى 416 ءبىلىم مەكەمەسىنە، سونىڭ ىشىندە جەكەمەنشىكتەگى مەكەمەلەرگە دە  مونيتورينگ جۇرگىزدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

«قوعامدىق باقىلاۋ تۋرالى» زاڭنىڭ اياسىندا جۇرگىزىلگەن مونيتورينگ بارىسىندا قوعامدىق شتاب وكىلدەرى تاماقتانۋ ساپاسى مەن قاۋىپسىزدىكتى قامتاماسىز ەتۋگە قاتىستى نەگىزگى ماسەلەلەردەن بولەك، سانيتارلىق-گيگيەنالىق نورمالار مەن تالاپتاردىڭ ساقتالۋىنا، تەمپەراتۋرالىق رەجيمگە، ءىس جۇرگىزۋگە، وقۋشىلاردى اۆتوبۋسپەن تاسىمالداۋعا ەرەكشە نازار اۋداردى. سونداي-اق ولار ءبىلىم بەرۋ نىساندارىندا جۇرگىزىلىپ جاتقان كۇردەلى جوندەۋ جۇمىستارىنا قاتىستى ماسەلەلەردى دە قاراستىردى.

بالالاردىڭ قاۋىپسىزدىگى ماسەلەسىنە قاتىستى وبلىستىق ءبىلىم باسقارماسىنىڭ باسشىسى داۋرەن ءجۇنىسوۆ:

 - وڭىردەگى 422 ءبىلىم بەرۋ ۇيىمىنىڭ بارلىعى بەينەباقىلاۋ كامەرالارىمەن تولىق قامتاماسىز ەتىلىپ، پوليتسيا دەپارتامەنتىنىڭ جەدەل باسقارۋ ورتالىعىنا قوسىلعان. سول سياقتى بارلىق ءبىلىم بەرۋ ۇيىمدارىندا «دابىل تۇيمەلەرى» قويىلىپ، جەرگىلىكتى پوليتسيا باسقارمالارىنىڭ كەزەكشى بولىمىنە قوسىلدى. بۇگىنگى كۇنى 296 ءبىلىم بەرۋ ۇيىمىندا 518 دانا تۋرنيكەت ورناتىلدى. وبلىس بويىنشا 210 ءبىلىم بەرۋ ۇيىمى 253 شتاتتىق بىرلىكتە ارنايى مامانداندىرىلعان كۇزەتپەن قامتاماسىز ەتىلگەن. بۇل باعىتتاعى جۇمىس جالعاسۋدا، - دەدى ءوز سوزىندە.

قوعامدىق شتاب وكىلدەرىنىڭ ايتۋىنشا، مونيتورينگ قورىتىندىلارى ءبىلىم بەرۋ ساپاسىن ودان ءارى جۇيەلى تۇردە جاقسارتۋدىڭ نەگىزىنە اينالادى.

- بالالاردىڭ قاۋىپسىزدىگى مەن ءال-اۋقاتىن قامتاماسىز ەتۋ ماسەلەلەرىن قوعامدىق باقىلاۋ – اتالعان ماسەلەرگە قاتىستى مالىمەتتەردى جيناقتاۋ، تالداۋ جانە باعالاۋ ءىسىن قامتيتىن كەشەندى جۇمىس. ءبىزدىڭ ماقساتىمىز – تۋىنداعان ماسەلەلەردى انىقتاپ، ولاردى شەشۋ بويىنشا ۇسىنىمدار ازىرلەۋ. ال بۇل ۇسىنىستاردى ىسكە اسىرۋ وڭىردە زاماناۋي ءارى قاۋىپسىز ءبىلىم بەرۋ ورتاسىن قالىپتاستىرۋعا مۇمكىندىك بەرەدى. مۇنداي مونيتورينگ شارالارىن وبلىس كولەمىندە ءار توقسان سايىن جۇرگىزىپ تۇرامىز، - دەدى «AMANAT» پارتياسى جەتىسۋ وبلىستىق فيليالىنىڭ توراعاسى ارىستانعالي ارىن.

جالپى، بيىل وڭىردە 3 مەكتەپتىڭ قۇرىلىسى اياقتالدى. اتاپ ايتقاندا، «كەلەشەك مەكتەبى» ۇلتتىق جوباسى اياسىندا الاكول اۋدانىنىڭ دوستىق اۋىلىندا 600 ورىندىق، اقسۋ اۋدانىنىڭ كولتابان اۋىلىندا 120 ورىندىق، پانفيلوۆ اۋدانىنىڭ تالدى اۋىلىندا 300 ورىندىق مەكتەپتەر پايدالانۋعا بەرىلدى. تاعى 4 مەكتەپتىڭ قۇرىلىسى جالعاسۋدا، ياعني كەربۇلاق اۋدانىنىڭ كوكساي اۋىلىندا، پانفيلوۆ اۋدانىنىڭ سۋپتاي اۋىلىندا، تەكەلى قالاسىندا جانە تالدىقورعان قالاسىندا جالپى 680 ورىنعا ارنالعان ءبىلىم نىساندارى سالىنىپ جاتىر، كەلەسى جىلى پايدالانۋعا بەرىلەدى. سول سياقتى 7 مەكتەپكە كۇردەلى جوندەۋ جۇرگىزىلىپ، سونىڭ 5-ەۋىندە جوندەۋ جۇمىستارى اياقتالدى، ال قالعان 2 مەكتەپتە قۇرىلىس جۇمىستارى جىل سوڭىنا دەيىن تولىق بىتەدى. بۇدان بولەك، بيىل 14 مەكتەپتە، 5 بالاباقشادا جانە 1 لاگەردە – جالپى سانى 30 ءبىلىم بەرۋ نىسانىندا اعىمداعى جوندەۋ جۇمىستارى جۇرگىزىلدى. ال كەلەسى جىلى 25 مەكتەپ، 2027 جىلى تاعى 25 مەكتەپ جوندەۋدەن وتەدى.

Abai.kz