جەتىسۋدا بالالاردىڭ قاۋىپسىزدىگىن قامتاماسىز ەتۋ باعىتىندا جاڭا جوبا قولعا الىندى. ءتارتىپ ساقشىلارىنىڭ بۇل باستاماسىن وبلىستىق ءبىلىم باسقارماسى مەن اتا-انالار بىرلەسىپ قولداپ وتىر.

بۇل رەتتە پيلوتتىق جوبا رەتىندە تەكەلى قالاسىندا ەكىنشى اۋىسىمدا وقيتىن 1-11 سىنىپ وقۋشىلارى، ياعني 2,5 مىڭ وقۋشى جارىق شىعىلىستىرعىش كۇرتەشەمەن قامتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىستىق پوليتسيا دەپارتامەنتىنىڭ مالىمەتىنە قاراعاندا، كورىنۋ ەلەمەنتتەرى بار جارىق شىعىلىستىرعىش كۇرتەشەلەر مەن كيىمدەر كولىك جۇرگىزۋشىلەردىڭ اسىرەسە كورۋ مۇمكىندىگى ناشار جاۋىندى، تۇماندى كۇندەرى نەمەسە قاراڭعى تۇسكەن مەزگىلدە بالالاردى الىستان بايقاۋىنا مۇمكىندىك بەرەدى. سوندىقتان پوليتسيا قىزمەتكەرلەرى بۇل جوبانى قولداۋ تۋرالى ۇسىنىسىن مەكتەپ وقۋشىلارىنىڭ اتا-انالارىنا جەتكىزگەن بولاتىن.

وبلىستىق ءبىلىم باسقارماسىنىڭ اقپاراتىنا سايكەس، جىل باسىنان بەرى ءوڭىر مەكتەپتەرىندە 1900-دەي ءىس-شارا وتكىزىلىپ، توتەنشە جاعدايلاردىڭ الدىن الۋ، جولداعى قاۋىپسىزدىك، العاشقى كومەك كورسەتۋ شارالارى بويىنشا جادىنامالار، تاقىرىپتىق كىتاپشالار، كومەك كورسەتەتىن مەكەمەلەردىڭ بايلانىس دەرەكتەرى بار اقپاراتتىق پاراقشالار تاراتىلعان.

- وبلىستاعى ءبىلىم بەرۋ ۇيىمدارىندا وقۋ جىلى بارىسىندا بالالاردى جولدا ءجۇرۋ ەرەجەلەرىمەن تانىستىرۋ، جول ەرەجەسىنىڭ بەلگىلەرىن ۇيرەتۋ، قاۋىپسىزدىك شارالارىن نىعايتۋ ماقساتىندا «ابايلاڭىز، بالالار!» اتتى اپتالىقتار وتكىزىلدى. بالاباقشا بۇلدىرشىندەرى مەن مەكتەپتىڭ باستاۋىش سىنىپ وقۋشىلارىنا «جول ءتارتىبىن بىلەيىك، امان ەسەن جۇرەيىك» اتتى تاقىرىپتا مۋلتفيلمەر كورسەتىلىپ، تالداۋ جاسالدى. سونىمەن قاتار پوليتسيا قىزمەتكەرلەرى تاراپىنان جول قيىلىستارىنداعى جول ەرەجەلەرى بويىنشا ەكسكۋرسيالار وتكىزىلدى. سونداي-اق اتالعان تاقىرىپتارعا 5-11 سىنىپتاردا سىنىپ ساعاتتارى وتكىزىلىپ، اتا-انالارمەن كەزدەسۋلەر ۇيىمداستىرىلدى، - دەدى وبلىستىق ءبىلىم باسقارماسىنىڭ باسشىسى داۋرەن ءجۇنىسوۆ.

Abai.kz