2025 جىلعى 1–15 جەلتوقسان ارالىعىندا «زاڭ جانە ءتارتىپ» جالپىۇلتتىق ءنارراتيۆى اياسىندا الماتى قالاسىنىڭ مەكتەپتەرى مەن كوللەدجدەرىندە جاسوسپىرىمدەردى قارجىلىق قاۋىپسىزدىككە وقىتۋعا جانە زاماناۋي تسيفرلىق قاتەرلەردەن قورعاۋعا باعىتتالعان رەسپۋبليكالىق «Qarzhy Saqshysy» كومپيۋتەرلىك ويىنى وتكىزىلۋدە.

جوبا الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى مەن الماتى قالاسى ءبىلىم باسقارماسىنىڭ بىرلەسىپ جۇزەگە اسىرۋىمەن ىسكە اسۋدا. ويىن AML Academy تاراپىنان قارجىلىق مونيتورينگ اگەنتتىگىمەن بىرلەسىپ، قازاقستان رەسپۋبليكاسى وقۋ-اعارتۋ مينيسترلىگىنىڭ قولداۋىمەن ازىرلەنگەن.

جوبانىڭ ماقساتى — جاسوسپىرىمدەردىڭ قارجىلىق ساۋاتتىلىعىن ارتتىرۋ جانە تسيفرلىق ورتادا جاۋاپتى مىنەز-قۇلىق قالىپتاستىرۋ.

«Qarzhy Saqshysy» - ويىنى جاسوسپىرىمدەردى جاستار اراسىندا ءجيى كەزدەسەتىن قارجىلىق الاياقتىقتىڭ ءتۇرلى سحەمالارىمەن تانىستىرادى:
• قارجىلىق پيراميدالار;
• دروپپەرلىك ارەكەتتەر;
• فيشينگتىك شابۋىلدار;
• الەۋمەتتىك جەلىلەر مەن مەسسەندجەرلەردەگى الاياقتىق تۇرلەرى;
• تسيفرلىق گيگيەنانىڭ نەگىزگى قاعيدالارى.

ويىننىڭ ينتەراكتيۆتى فورماتى 10–11-سىنىپ وقۋشىلارى مەن كوللەدج ستۋدەنتتەرىنە بەيىمدەلگەن پراكتيكالىق تاپسىرمالاردى، شاعىن جاعدايلاردى جانە سۇراقتاردى قامتيدى. مۇنداي ءتاسىل جاسوسپىرىمدەرگە تەوريالىق ءبىلىمدى مەڭگەرۋمەن قاتار، ناقتى تسيفرلىق جاعدايلاردا قاۋىپسىز مىنەز-قۇلىق داعدىلارىن قولدانۋعا مۇمكىندىك بەرەدى.

ويىن قورىتىندىسى بويىنشا ۇزدىك قاتىسۋشىلار باعالى سىيلىقتار مەن ديپلومدارمەن ماراپاتتالادى. ۇيىمداستىرۋشىلاردىڭ پىكىرىنشە، بۇل جوبا پروفيلاكتيكانىڭ ءتيىمدى قۇرالىنا اينالىپ، مەگاپوليس مەكتەپتەرى مەن كوللەدج ستۋدەنتتەرىنىڭ قارجىلىق قاۋىپسىزدىك دەڭگەيىن ارتتىرۋعا ىقپال ەتەدى.

Abai.kz