بيىلعى الەمدىك فۋتبول چەمپيوناتىندا 1/16 فينال ويىندارى اياقتالدى. توپتىق كەزەڭنەن سوڭ جارىستى جالعاستىرعانداردىڭ تەڭ جارتىسى پلەي-وففتىڭ العاشقى سۇرىپتاۋىندا-اق ءسۇرىندى. كەي كوماندالار ءتاۋىر ويىنىمەن جانكۇيەر قاۋىمعا ءۇمىت سىيلاسا، كەيبىرى جىگەرسىز قيمىلىمەن كوڭىل قالدىرىپ، وكىندىردى. ءبىز سول 1/16 فينال كەزەڭىنەن وتە الماعان كوماندالارعا شولۋ جاساماقپىز.

سۋرەت: sports.ru سايتىنان الىندى.

32-ورىن. كابو-ۆەردە (3 ۇپاي، دوپ ايىرماسى 4:5)

جاسىل ءمۇيىس ارالدارىنان كەلگەن جىگىتتەر وسى چەمپيوناتتىڭ ناعىز اقجولتاي جاڭالىعىنىڭ ءبىرى بولدى. اۋەلى ولار ەۋروپانىڭ قازىرگى چەمپيونى – يسپانيادان ۇپاي جىرىپ العاندا، جۇرتشىلىق «ءبىر ويىندا نە بولىپ، نە قويمايدى؟» دەسىپ، ۋاقىتشا سەنساتسياعا بالاعان ەدى. كابو-ۆەردە قۇراماسى توپتاعى باسقا ەكى قارسىلاسىمەن دە تەڭ ويناپ، كەلەسى كەزەڭگە شىققاندا تاڭدانباعان جان قالمادى. ال 1/16 فينالدا الەم چەمپيونى – ارگەنتينامەن سوڭعى ساتكە دەيىن ۇستاسىپ، ويىن 120 مينۋتقا سوزىلعاندا، دۋارتە مەن كابرال بىرىنەن-ءبىرى وتكەن كەرەمەت گولدار سوققاندا، 40 جاستاعى قاقپاشى ۆوزينيا مەسسيدىڭ بەس سوققىسىن قايتارعاندا، كۇللى الەم جانكۇيەرلەرىنىڭ كوزى جىپىلىقتاپ، سەنەر-سەنبەسىن بىلمەي داعداردى. جاسىل الاڭدا ەلدىڭ اتاۋى، كوماندانىڭ اتاعى، جۇلدىزداردىڭ داڭقى وينامايدى، باپكەردىڭ بىلىكتىلىگى، فۋتبولشىلاردىڭ شەبەرلىگى، كوماندالىق مەحانيزم، ۇجىمدىق قيمىل، مۇقالماس مىنەز وينايدى. كابو-ۆەردەنىڭ جەتىستىگى – وسىنىڭ دالەلى.

31-ورىن. سەنەگال (3 ۇپاي، 10:9)

وتە قيىن توپقا ءتۇستى، دەگەنمەن ءۇشىنشى ورىنمەن بولسا دا، 1/16 فينالعا شىعۋعا لايىقتى ويىن كورسەتتى. سەنەگالدىقتاردىڭ بەلگيانى ۇتىپ كەتۋگە دە مۇمكىندىگى بولدى، اتتەڭ، سوڭعى ساتتەردە ءسال بوساڭسىپ، كەشىرىلمەس قاتەلىكتەر جىبەرىپ الدى.

30-ورىن. الجير (4 ۇپاي، 5:9)

ءبىرى – داڭقتى زيداننىڭ ۇلى بولسا دا ايتايىق: كوماندانىڭ قاقپاسىن قورعاعان جىگىتتەر وسالدىق تانىتتى. الجير قاقپاسىنا ەنگەن گولداردىڭ ءبىرازىن جىبەرمەۋگە دە بولار ەدى. شابۋىلدا دا باپكەر سەنىم ارتقان ويىنشىلار كۇتكەن ۇدەدەن شىعا العان جوق.

29-ورىن. بوسنيا جانە گەرتسەگوۆينا (4 ۇپاي، 5:8)

ىرىكتەۋ سىنىندا يتاليانىڭ ءوزىن جولدا قالدىرعان كوماندا امەريكا جاسىل الاڭدارىندا جارقىلداپ كوزگە ءتۇستى دەي المايمىز. قاتاردى ۇتۋعا شاماسى كەلدى، بىراق باسقالارمەن يىق تەڭەستىرە كۇرەسۋگە قاۋقارى جەتپەدى.

28-ورىن. اۆستريا (4 ۇپاي، 6:9)

توپتاعى باستى فاۆوريتتەن جەڭىلدى، وزىمەن دەڭگەيلەس كوماندامەن تەڭ ءتۇستى، دەبيۋتانتتى ۇتتى. ويىن جاعىنان «وي، شىركىن» دەگىزەرلىكتەي ەشتەڭە كورسەتە العان جوق. كەلگەنىنە قۋانعان، كەتكەنىنە وكىنگەن دە ەشكىم بولمادى (ارينە، اۆستريالىق جانكۇيەرلەردەن باسقا).

27-ورىن. شۆەتسيا (4 ۇپاي، 7:10)

ۇلتتار ليگاسىنداعى ءتاۋىر ناتيجەسى ارقىلى عانا فينالدىق تۋرنيرگە شىعۋعا مۇمكىندىك الىپ، ۋكراينا مەن پولشانى جەڭىپ، الامان بايگەگە تۇسكەنىمەن، ءبارىبىر تۋنيستەن باسقاعا باسىمدىق كورسەتە الماي، ەلىنە ەرتە قايتتى.

25-26-ورىندار. ەكۆادور جانە وڭت.افريكا (4 ۇپايدان، دوپ ايىرماسى دا بىردەي – 2:4)

ىرىكتەۋ تۋرنيرىندە اسا مىعىم قورعانىسىمەن كوزگە تۇسكەن ەكۆادور شابۋىلىنىڭ ازۋسىزدىعىنان وپىق جەدى. باسقاسى باسقا، كيۋراساونى ۇتا الماعان سوڭ نە ءۇمىت، نە قايىر؟ كۇتپەگەن جەردەن نەمىستەردى جەڭىپ كەتۋى – سونەر الدىندا اياق استىنان جىلت ەتە قالاتىن جالعان ءۇمىت ەكەن. ونىڭ تۋننەل تۇنەگىندەگى جارىق ساۋلە ەمەس، مەكسيكا اتتى جۇردەك پويىز ەكەنىن اڭعارعاندا ءبارى كەش ەدى.

ءتۋرنيردىڭ بەتاشار ماتچىندا وتە ناشار ويناعان وڭتۇستىك افريكا قۇراماسى كەيىنگى ەكى كەزدەسۋدى وتە جيناقى وتكىزىپ، 1/16 فينالعا شىعا الدى. السىزدەۋ توپقا ءتۇسۋىنىڭ پايداسىن كوردى. دەڭگەيى دە سول ەدى.

24-ورىن. گانا (4 ۇپاي، 2:3)

بۇرىن بار باقىتىن شابۋىلدان ىزدەۋگە تىرىساتىن گانا كومانداسى بۇ جولى تاسقامال قورعانىسىمەن تاڭ قالدىردى. ءتىپتى ولارعا اعىلشىن ارىستانىنىڭ دا «ءتىسى وتپەدى». بىراق قۇر قورعانىسپەن الىسقا بارا المايسىڭ عوي.

سۋرەت: sportbox.ru سايتىنان الىندى.

23-ورىن. حورۆاتيا (4 ۇپاي، 6:7)

كەيىنگى جىلدارى ءار تۋرنير سايىن جۇرتشىلىق «شاۋ تارتقان «شالدارىنا» سەنگەن حورۆاتيا وسى جولى توپتان شىعا الماس» دەپ بولجام جاسايدى. بىراق حورۆاتتار ۇنەمى پلەي-وفف كەزەڭىنە شىعۋدان تانعان ەمەس. بيىل پورتۋگاليامەن تەرەزەسى تەڭ ونەر كورسەتە وتىرىپ، جەڭىلۋگە ءماجبۇر بولدى. مودريچ پەن پەريشيچ قۇرامادان كەتەتىن شىعار، دەگەنمەن حورۆات ەلى جاس تالانتتاردان كەندە ەمەس.

22-ورىن. كونگو در (4 ۇپاي، 5:5)

ىرىكتەۋ سىنىندا افريكانىڭ قوس ءدۇلدۇلىن – كامەرۋن مەن نيگەريانى ۇتىپ، الا دوپتىڭ الامانىنا قيقۋلاپ كىرگەن «دەموكرات-كونگولىقتار» وزدەرىنە سەنىمدى، تاكتيكالىق تۇرعىدان ساۋاتتى، جىگەرلى ويىن كورسەتىپ، ءتاۋىر ناتيجەگە قول جەتكىزدى. اعىلشىن جانكۇيەرلەرى كەينگە العىس ايتۋدان شارشاماۋى كەرەك. ماڭدايدان ءوشۋى نەعايبىل ءبىر ماسقارادان قۇتقارعانى ءۇشىن...

21-ورىن. اۆستراليا (5 ۇپاي، 3:3)

كەرەمەت ويىنىمەن كوزگە تۇسكەن جوق، بىراق جاقسى قاقپاشى، مىعىم قورعانىس، ۇيىمشىل قيمىل، ولىسپەي-بەرىسپەس مىنەز، ەرەكشە ەرىك-جىگەرىمەن شاما-شارقىنشا كەز كەلگەن كومانداعا قارسىلىق كورسەتە الاتىنىن بايقاتتى.

20-ورىن. جاپونيا (5 ۇپاي، 8:5)

كەيىنگى ءۇش الەم چەمپيوناتىندا دا توپ جاردى. بىراق ۇنەمى پلەي-وففتىڭ ءبىرىنشى كەزەڭىندە-اق سۇرىنەدى: بىرەسە بەلگيادان (2018 جىلى), بىرەسە حورۆاتيادان (2022), ەندى، مىنە، برازيليادان. وسى ءۇش ويىندا دا جاپوندار قارسىلاسىنان ارتىق بولماسا، ءبىر مىسقال دا كەم ويناعان جوق. الايدا ايتەۋىر بىردەڭە جەتپەي قالادى (شەبەرلىك پە، ءتوزىم بە، مىنەز بە؟). باس باپكەر حادزيمە مورياسۋ – مايتالمان مامان ەكەن. ورنىندا قالسا، كەلەسى دوداعا بۇدان دا كۇشەيىپ كەلەر؟

19-ورىن. كوت-د'يۆۋار (6 ۇپاي، 5:4)

كۇش-قۋات دايىندىعى مىعىم، تەحنيكالىق جاراعى مىقتى، اناۋ-مىناۋ فاۆوريتتەردەن ىعا قويمايتىن مىنەزدى كوماندا. نەمىستەردى ۇتىپ كەتە جازدادى. نورۆەگتەردى دە جەڭۋى مۇمكىن ەدى، بىراق «گول-ماشينا» حولاندقا داۋا بەر ما؟..

سۋرەت: championat.com سايتىنان الىندى.

18-ورىن. گەرمانيا (7 ۇپاي، 11:5)

كيۋراساونى ويسىراتا ۇتىپ، سوڭعى مينۋتتا كوت-د'يۆۋاردان ايلا اسىرىپ، توپتان وڭاي شىققانىمەن، پاراگۆايدىڭ نىعىز قورعانىسىن بۇزا المادى. پەنالتيلەردى وتە ناشار ورىندادى. باياعى تەۆتوندىق تەگەۋرىن، اقىرعى سەكۋندقا دەيىن ايقاسار ادۋىن مىنەز، باسا-كوكتەي وينايتىن وكتەم فۋتبول جوق. نەمىس ماشيناسىنا ءتان رۋحتان جۇرناق قالماعانداي.

سۋرەت: deutschland.de سايتىنان الىندى.

17-ورىن. نيدەرلاند (8 ۇپاي، 11:5)

«ۇلت فۋتبولىنا ءتان شابۋىلقۇمار تاسىلگە ادالدىق تانىتپادى» دەپ ايىپتايدى رونالد كۋماندى نيدەرلاندتىق ماماندار دا، جانكۇيەرلەر دە. شۆەدتەر مەن تۋنيستىكتەردى ۇتۋ ءۇشىن عالامات شەبەرلىك كورسەتۋ شارت ەمەس. ال ۇجىمدىق ويىننىڭ ۇلگىسىن كورسەتكەن جاپونداردى جەڭە الماۋ ء(بىر گول سوعىپ، ەسەپتە العا شىققان سوڭ سول ناتيجەنى ساقتاپ قالۋ ءۇشىن جانتالاسۋ – باسقا-باسقا، گۋلليت پەن بەرگكامپ ءىزباسارلارىنا لايىق تىرلىك پە؟), ماروككوعا قارسى بەس قورعاۋشىمەن شىعۋ – قورقاقتىق ەمەي، السىزدىك ەمەي نەمەنە؟ ۇلت فۋتبولىنىڭ مانەرىنەن اداسقان سوڭ، ناتيجە بەلگىلى عوي...

ساكەن سىبانباي

Abai.kz