قازاقستاندا ەڭ ءجيى كەزدەسەتىن كاسىبي اۋرۋلارعا ومىرتقا پاتولوگيالارى، وكپە اۋرۋلارى، ۆيبراتسيالىق اۋرۋ جانە ەستۋ قابىلەتىنىڭ تومەندەۋى جاتادى. وسى جانە وندىرىستىك قاۋىپسىزدىك سالاسىنداعى باسقا دا وزەكتى ماسەلەلەر قاراعاندىدا وتكەن «جۇمىس ىستەيتىن حالىقتىڭ دەنساۋلىعىن باسقارۋدىڭ يننوۆاتسيالىق تەحنولوگيالارى: مۋلتيديستسيپلينارلىق تاسىلدەر» اتتى حالىقارالىق عىلىمي-تاجىريبەلىك كونفەرەنتسيادا قارالدى.

قاراعاندى ەڭبەككەرلەردىڭ دەنساۋلىعىن قورعاۋ سالاسىندا ەڭبەك ەتەتىن مامانداردىڭ كاسىبي كەزدەسۋلەرىنە ارنالعان ءىرى الاڭعا اينالدى. ەڭبەك گيگيەناسى جانە كاسىبي اۋرۋلار ۇلتتىق ورتالىعىنىڭ بازاسىندا قازاقستاننان، رەسەيدەن، وزبەكستاننان، قىرعىزستاننان جانە ازەربايجاننان كەلگەن جەتەكشى ساراپشىلار باس قوستى.

كونفەرەنتسيانى اشقان ورتالىق ديرەكتورى، پروفەسسور ەرتاي وتاروۆ بۇل جيىننىڭ مەكەمەگە رەسپۋبليكالىق مارتەبە قايتا بەرىلگەننەن كەيىنگى العاشقى حالىقارالىق شارا ەكەنىن ايتتى. ونىڭ ايتۋىنشا، ورتالىقتىڭ جاڭعىرۋى ەلىمىزدەگى ەڭبەك قاۋىپسىزدىگى جۇيەسىن كۇشەيتىپ، كاسىبي تاۋەكەلدەرمەن كۇرەستەگى تەتىكتەردى جەتىلدىرۋگە مۇمكىندىك بەرەدى.

كونفەرەنتسيانى اشقان ورتالىق ديرەكتورى، پروفەسسور ەرتاي وتاروۆ بۇل جيىننىڭ مەكەمەگە رەسپۋبليكالىق مارتەبە قايتا بەرىلگەننەن كەيىنگى العاشقى حالىقارالىق شارا ەكەنىن ايتتى. ونىڭ ايتۋىنشا، ورتالىقتىڭ جاڭعىرۋى ەلىمىزدەگى ەڭبەك قاۋىپسىزدىگى جۇيەسىن كۇشەيتىپ، كاسىبي تاۋەكەلدەرمەن كۇرەستەگى تەتىكتەردى جەتىلدىرۋگە مۇمكىندىك بەرەدى.

(سۋرەت:https://www.gov.kz/)

ەڭبەك جانە الەۋمەتتىك قورعاۋ ۆيتسە-ءمينيسترى ۆيكتوريا شەگاي قازاقستاندا 740 مىڭنان استام مۇگەدەكتىگى بار ادام بار ەكەنىن، ونىڭ ىشىندە 15 مىڭداي ازاماتتىڭ مۇگەدەكتىگى كاسىبي اۋرۋلار مەن وندىرىستىك جاراقاتتار سالدارىنان قالىپتاسقانىن جەتكىزدى. ەڭ كەڭ تارالعان كاسىبي پاتولوگيالار – ومىرتقا مەن وكپەنىڭ سوزىلمالى اۋرۋلارى، ۆيبراتسيالىق سيندروم جانە ەستۋ قابىلەتىنىڭ جوعالۋى.

ۆيتسە-مينيستر ەڭبەك ورتاسىنىڭ وزگەرىپ كەلە جاتقانىن اتاپ ءوتتى: كەڭسە فورماتىنداعى، ۇزاق وتىرۋدى تالاپ ەتەتىن جۇمىس كولەمى ارتۋدا، تسيفرلىق كوممۋنيكاتسيالاردىڭ اسەرى كۇشەيىپ، سترەسس دەڭگەيى جوعارىلاپ وتىر. وسىعان بايلانىستى پروفيلاكتيكا تاسىلدەرى جەكەلەندىرىلگەن، ۇزدىكسىز جانە تسيفرلىق تەحنولوگيالارعا نەگىزدەلگەن بولۋى قاجەت.

كاسىپوداقتار فەدەراتسياسىنىڭ ءبىرىنشى توراعا ورىنباسارى مۇحتار تىنىكەەۆ ۇيىمنىڭ 1,7 ميلليونعا جۋىق جۇمىسكەردى بىرىكتىرەتىنىن ايتا كەلە، ەڭبەك قاۋىپسىزدىگى زاڭناماسىن كەشەندى جاڭارتۋ قاجەتتىگىن العا تارتتى. ول كاسىپوداقتاردىڭ بىرقاتار ۇسىنىستارىن ورتاعا سالدى:

• «جۇمىسشىنىڭ كىنا دارەجەسى» ۇعىمىن زاڭنامادان الىپ تاستاۋ;
• تەحنيكالىق ينسپەكتورلاردىڭ وكىلەتتىكتەرىن كەڭەيتۋ;
• زياندى وندىرىستەردە جۇمىس ىستەيتىندەر ءۇشىن زەينەت جاسىن تومەندەتۋ;
• ورتا جانە ءىرى كاسىپورىنداردا وندىرىستىك كەڭەستەر قۇرۋدى مىندەتتەۋ.

تىنىكەەۆتىڭ ايتۋىنشا، رەسمي ستاتيستيكا كاسىبي اۋرۋلاردىڭ ناقتى كولەمىن تولىق كورسەتە بەرمەيدى، سوندىقتان ەڭبەك قابىلەتىن جوعالتقان جۇمىسشىلارعا كەشەندى وڭالتۋ جۇيەسىن دامىتۋ اسا ماڭىزدى.

شاراعا دەنساۋلىق ساقتاۋ مينيسترلىگىنىڭ، پارلامەنتتىڭ جانە وڭىرلىك اتقارۋشى ورگانداردىڭ وكىلدەرى قاتىستى. شەتەلدىك ساراپشىلار رەتتەۋشى-قۇقىقتىق بازانى جەتىلدىرۋ، سانيتاريالىق قىزمەتتى جاڭعىرتۋ جانە مەديتسينالىق مونيتورينگتى دامىتۋدىڭ تاجىريبەسىن ءبولىستى.

(سۋرەت:https://www.gov.kz/)

پلەنارلىق وتىرىستان كەيىن قوناقتار ورتالىقتىڭ كلينيكالىق بولىمشەلەرىن، زەرتحانالارىن ارالاپ، زاماناۋي دياگنوستيكالىق ادىستەرمەن جانە جۇمىسشىلار دەنساۋلىعىن تسيفرلىق مونيتورينگىلەۋ جۇيەلەرىمەن تانىستى.

پانەلدىك سەسسيالار جۇمىس ىستەيتىن حالىقتىڭ دەنساۋلىعىن ساقتاۋ جانە كاسىبي اۋرۋلاردى ەمدەۋ، ەڭبەك گيگيەناسىنىڭ جاڭا قاعيداتتارى، ونىڭ ىشىندە جاساندى ينتەللەكتتى قولدانۋ جانە شاڭنان تۋىندايتىن وكپە اۋرۋلارىنىڭ الدىن الۋ تاقىرىپتارىنا ارنالدى. سونداي-اق تسيفرلاندىرۋ مەن وندىرىستىك مودەرنيزاتسيا جاعدايىندا ماماندار دايارلاۋ ماسەلەلەرى تالقىلاندى.

كونفەرەنتسيا اياسىندا مەديتسينالىق تەكسەرۋلەر جۇرگىزۋ ادىستەمەسى، كاسىبي اۋرۋشاڭدىقتى تالداۋ جانە وندىرىستىك فاكتورلارمەن بايلانىسىن انىقتاۋ بويىنشا سەمينارلار ءوتتى. دوڭگەلەك ۇستەلدە وندىرىستەردىڭ دامۋىنا بايلانىستى پايدا بولعان جاڭا سىن-تەگەۋرىندەر، سونداي-اق زەرتحانالىق بازانى نىعايتۋ قاجەتتىلىگى ءسوز بولدى.

ساراپشىلار كاسىبي پاتولوگيا قىزمەتىن جاڭعىرتۋ، زەرتحانالىق زەرتتەۋلەردىڭ تيىمدىلىگىن ارتتىرۋ جانە ەڭبەك مەديتسيناسىن دامىتۋ – ەڭبەك قاۋىپسىزدىگى سالاسىنداعى جۇيەلى وزگەرىستەردىڭ باستى باعىتى ەكەنىن اتاپ ءوتتى. ەڭبەك گيگيەناسى جانە كاسىبي اۋرۋلار ۇلتتىق ورتالىعى مەديتسينالىق ەكولوگيا، كاسىبي تاۋەكەلدەردى باعالاۋ جانە جۇمىسشىلارعا ارنايى مەديتسينالىق كومەك كورسەتۋ سالاسىنداعى جەتەكشى مەكەمە مارتەبەسىن ساقتاپ وتىر.

Abai,kz