قىرعىزستاندا كونستيتۋتسيالىق سوت ءولىم جازاسىن قايتارۋدى جول بەرىلمەيتىن دەپ تاپتى، دەپ حابارلايدى Ulysmedia.kz 24.kg سايتىنا سىلتەمە جاساپ. 

قىرعىز رەسپۋبليكاسى كونستيتۋتسيالىق سوتى 2025 جىلعى 10 جەلتوقساندا پرەزيدەنتتىڭ بالالارعا جاسالعان زورلاۋ، زورلاۋمەن ۇشتاسقان ادام ءولتىرۋ ءۇشىن ءولىم جازاسىن قولدانۋ مۇمكىندىگىن قاراستىرعان «قىرعىز رەسپۋبليكاسىنىڭ كونستيتۋتسياسىنا وزگەرىس ەنگىزۋ تۋرالى» زاڭ جوباسىنا قورىتىندى بەرۋ تۋرالى ۇسىنىسىن قارادى.

مالىمەتكە سايكەس، كونستيتۋتسيالىق سوت ۇسىنىلعان وزگەرىستەردىڭ كونستيتۋتسيامەن — ءبىرتۇتاس جۇيە رەتىندە — ۇيلەسىمدىلىگىن، كونستيتۋتسيالىق قۇرىلىستىڭ نەگىزدەرىنە اسەرىن، ونىڭ ورتالىعىندا تۇرعان ادام قۇقىقتارى مەن بوستاندىقتارىنىڭ ىرگەلىلىگىن، سونداي-اق قىرعىز رەسپۋبليكاسىنىڭ راتيفيكاتسيالانعان حالىقارالىق شارتتارىنان تۋىندايتىن حالىقارالىق مىندەتتەمەلەرمەن سايكەستىگىن باعالاعان.

- كونستيتۋتسيا ادام قۇقىقتارى مەن بوستاندىقتارىن ەڭ جوعارعى قۇندىلىق رەتىندە بەكىتەدى، ال ولاردى قامتاماسىز ەتۋ كەپىلدىكتەرىنىڭ جۇيەسى كونستيتۋتسيالىق قۇرىلىستىڭ نەگىزىن قۇرايدى جانە نەگىزگى زاڭعا ەنگىزىلەتىن وزگەرىستەردىڭ شەگىن ايقىندايدى. وسىعان بايلانىستى كونستيتۋتسيالىق سوت ىرگەلى قۇقىقتار مەن بوستاندىقتار سالاسىنداعى كەز كەلگەن وزگەرىستەر ولاردىڭ جۇيەلىك سيپاتىن جانە تۇلعانى كونستيتۋتسيالىق قورعاۋ مودەلىنىڭ بۇكىل جۇمىس ىستەۋىنە اسەرىن ەسكەرۋى قاجەت ەكەنىن اتاپ ءوتتى. قۇقىقتار مەن بوستاندىقتارعا بەرىلەتىن كەپىلدىكتەردىڭ دەڭگەيىنىڭ كەرى كەتۋىنە (non-regress) جول بەرمەۋ اسا ماڭىزدى، سەبەبى ولاردىڭ تۇراقتىلىعى مەن ساباقتاستىعى ادامنىڭ جانە ونىڭ قادىر-قاسيەتىنىڭ كونستيتۋتسيالىق باسىمدىعىنىڭ مازمۇنىن قۇرايدى، — دەلىنگەن حابارلامادا.

وسى كونتەكستە كونستيتۋتسيالىق باقىلاۋ ورگانى ءولىم جازاسىنا تىيىم سالۋ جانە ءومىر قۇقىعىنىڭ باسىم ءمانىن تانۋ تەك نورماتيۆتىك ەمەس، قۇندىلىقتىق ماعىناعا دا يە ەكەنىن اتاپ وتكەن.

كونستيتۋتسيالىق جانە حالىقارالىق-قۇقىقتىق ۋاجدەردىڭ جيىنتىعىنا سۇيەنە وتىرىپ، كونستيتۋتسيالىق سوت ءولىم جازاسىن كونستيتۋتسيالىق تۇزەتۋ ارقىلى قايتا ەنگىزۋ نەگىزگى زاڭعا سايكەس كەلمەيتىنىن، جول بەرىلمەيتىنىن جانە قۇقىقتىق تۇرعىدان مۇمكىن ەمەس ەكەنىن قورىتىندىلادى.

سايكەسىنشە، «قىرعىز رەسپۋبليكاسىنىڭ كونستيتۋتسياسىنا وزگەرىس ەنگىزۋ تۋرالى» زاڭ جوباسى رەفەرەندۋمعا شىعارىلمايدى جانە ونى قابىلداۋعا باعىتتالعان بارلىق راسىمدەر كونستيتۋتسيالىق سوت قورىتىندىسى كۇشىنە ەنگەن ساتتەن باستاپ توقتاتىلۋى ءتيىس.

ەسكە سالايىق، بۇعان دەيىن قىرعىزستان پرەزيدەنتى سادىر جاپاروۆ ەلدە ولىم جازاسىن قايتادان ەنگىزۋدى ۇسىنعان بولاتىن.

Abai.kz