رەسەيدىڭ بۇعاتتالعان اكتيۆتەرى قولدانىلمايدى.

ەۋرووداق كوشباسشىلارى كيەۆكە 90 ميلليارد ەۋرو قارجىلاي كومەك بەرۋگە ۋاعدالاستى. بۇل قاراجات ەو بيۋدجەتىمەن قامتاماسىز ەتىلگەن قارىز رەتىندە بەرىلەدى. بۇل تۋرالى BBC اگەنتتىگى جازدى.

"ۋكرايناعا 2026-2027 جىلدارعا ارنالعان 90 ميلليارد ەۋرو كولەمىندەگى قولداۋ كورسەتۋ تۋرالى شەشىم ماقۇلداندى", – دەپ جازدى ەۋرووداق ءسامميتىنىڭ توراعاسى انتونيۋ كوشتا.

دەسەك تە، ول بۇل قاراجاتتىڭ ناقتى قايدان الىناتىنىن ناقتىلامادى. Reuters اگەنتتىگىنىڭ جازۋىنشا، قارجى ەو بيۋدجەتىنىڭ كەپىلدىگىمەن تارتىلماق.

باستاپقىدا ۋكراينانى قارجىلاندىرۋ رەسەيدىڭ رەزەرۆتەرى ەسەبىنەن جۇرگىزىلۋى ءتيىس بولعان. جوسپار بويىنشا ۋكراينا بۇل قاراجاتتىڭ ءبىر بولىگىن نەسيە رەتىندە الادى دەپ كوزدەلگەن. سوعىس سالدارىنان 500 ميلليارد دوللاردان استام شىعىن كەلدى دەپ باعالانىپ وتىر.

بۇعاتتالعان رەسەيلىك اكتيۆتەردى پايدالانۋعا ەۋرووداققا مۇشە چەحيا، ۆەنگريا جانە سلوۆاكيا باسشىلارىنان بولەك، يتاليا دا كۇمان كەلتىرگەن. سونداي-اق، بەلگيا دا قولداۋ بىلدىرمەدى. بۇل ەلدە Euroclear دەپوزيتاريى ورنالاسقان. وندا ەۋروپادا بۇعاتتالعان كرەملدىڭ 193 ميلليارد ەۋروسى ساقتاۋلى تۇر.

Financial Times باسىلىمىنىڭ جازۋىنشا، بەلگيا نەسيەگە بايلانىستى كەز كەلگەن قارجىلىق تاۋەكەلدى جابۋ ءۇشىن كەپىلدىكتەردى تالاپ ەتكەن. وسىلايشا بۇل باسقا ەۋروپالىق كوشباسشىلاردىڭ ءتيىستى شارتتاردى قابىلداۋدان باس تارتۋىنا ىقپال ەتكەن.

Abai.kz