جيىندا مەملەكەتتىك كەڭەسشى ەرلان قارين جىلدىڭ نەگىزگى قورىتىندىلارىنا توقتالدى. ول ەكونوميكا تۇراقتى ءوسىم كورسەتكەنىن، جاڭا كاسىپورىندار ىسكە قوسىلىپ، تۇراقتى جۇمىس ورىندارى قۇرىلعانىن، الەۋمەتتىك نىساندار قۇرىلىسى قارقىن الىپ، كولىك ينفراقۇرىلىمىن جاڭعىرتۋ ءىسى جالعاسىپ جاتقانىن اتاپ ءوتتى.

سونداي-اق مەملەكەتتىك كەڭەسشى پرەزيدەنت باستاماشىلىق ەتكەن پارلامەنتتىك رەفورما «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» مەملەكەتتىك قۇرىلىستىڭ بازالىق فورمۋلاسى اياسىنداعى اۋقىمدى ساياسي جاڭعىرۋدىڭ لوگيكالىق جالعاسى ەكەنىن ايتتى.

«ۇسىنىلىپ وتىرعان رەفورما زاڭ شىعارۋشى بيلىكتى قايتا جاڭعىرتۋعا ءارى ونىڭ تيىمدىلىگىن ارتتىرۋعا باعىتتالعان. بۇل رەتتە ساياسي باستاما پارلامەنت قىزمەتىن وزگەرتۋمەن عانا شەكتەلمەيدى، ەلدىڭ كونستيتۋتسيالىق قۇرىلىمىنىڭ ىرگەلى نەگىزدەرىن دە قامتيدى. نەگىزگى زاڭنىڭ كەمىندە 40 بابىنا وزگەرىستەر ەنگىزىلەدى دەپ كۇتىلىپ وتىر. اتالعان رەفورما 2022 جىلعى كونستيتۋتسيالىق وزگەرىستەرمەن كەشەندى تۇردە بىرگە جۇزەگە اسىرىلادى جانە مۇلدە جاڭا ساياسي مودەلگە كوشۋگە جول اشادى»، – دەدى مەملەكەتتىك كەڭەسشى.

ەرلان قارين مەملەكەت باسشىسىنىڭ تاپسىرمالارى مەن بۋرابايدا وتكەن IV وتىرىستا ۇلتتىق قۇرىلتاي مۇشەلەرى تاراپىنان ايتىلعان باستامالارعا توقتالدى.

ولاردى جۇيەلى تۇردە ىسكە اسىرۋ ءۇشىن 53 تارماقتان تۇراتىن ارنايى جوسپار قابىلداندى. وندا ءتۇرلى باعىت بويىنشا 10 زاڭ جوباسىن ازىرلەۋ كوزدەلگەن.

ۇلتتىق قۇرىلتاي باستامالارى اياسىندا بىرقاتار ماڭىزدى تۇجىرىمدامالىق قۇجات ازىرلەندى. ماسەلەن، ىشكى ساياساتتىڭ نەگىزگى قاعيداتتارى مەن باعىتتارىن ايقىندايتىن تۇجىرىمدامالىق قۇجات دايىندالدى. 2026-2028 جىلدارعا ارنالعان ناشاقورلىققا جانە ەسىرتكى بيزنەسىنە قارسى كۇرەس جونىندەگى كەشەندى جوسپار بەكىتىلدى. 2025-2030 جىلدارعا ارنالعان قازاقستان رەسپۋبليكاسىنىڭ وڭىرلىك دامۋ تۇجىرىمداماسى قابىلداندى.

«100 كىتاپ» جالپىۇلتتىق ساۋالناماسى، «اسىل مۇرا» اۋديو جيناعى سەكىلدى ماڭىزدى مادەني-گۋمانيتارلىق جوبالار جۇزەگە اسىرىلدى. سونداي-اق «حاندار شەجىرەسى» قولجازباسى يۋنەسكو-نىڭ «الەم جادى» حالىقارالىق تىزىلىمىنە ەنگىزىلدى.

مەملەكەتتىك كەڭەسشى ۇلتتىق قۇرىلتاي باستامالارىن ىسكە اسىرۋ جۇمىسى جالعاسىپ جاتقانىن اتاپ ءوتتى. دالىرەك ايتقاندا، بالالاردىڭ قۇقىقتارىن قورعاۋعا باعىتتالعان شارالاردىڭ بارلىعىن بىرىكتىرەتىن «قازاقستان بالالارى» ءبىرتۇتاس باعدارلاماسى ازىرلەنۋدە، عىلىمي قالاشىقتار قۇرۋ، ۇكىمەتتىك ەمەس ۇيىمداردىڭ قىزمەتىن رەتتەۋ، ەرەكشە قاجەتتىلىكتەرى بار بالالاردى كەشەندى قولداۋ جانە باسقا دا باعىتتار بويىنشا زاڭنامالىق نورمالار دايىندالۋدا.

باستامالار مەن ۇسىنىستاردى ىسكە اسىرۋ ماسەلەلەرى ۇلتتىق قۇرىلتايدىڭ «ازاماتتىق قوعام»، «الەۋمەتتىك-ەكونوميكالىق جانە مادەني دامۋ»، «ءبىلىم جانە عىلىم» اتتى جۇمىس سەكتسيالارىندا تالقىلاندى.

سەكتسيالارعا پرەزيدەنت كومەكشىسى ارمان قىرىقباەۆ، پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا، عىلىم جانە جوعارى ءبىلىم ءمينيسترى ساياسات نۇربەك، وقۋ-اعارتۋ ءمينيسترى جۇلدىز سۇلەيمەنوۆا مودەراتورلىق ەتتى.

سەكتسيالار اياسىندا ۇلتتىق قۇرىلتاي مۇشەلەرى پرەزيدەنت باستامالارىنىڭ جۇزەگە اسىرىلۋىن قولداپ، جەكەلەگەن باعىتتارعا قاتىستى ۇسىنىستارىمەن ءبولىستى.

ۇلتتىق قۇرىلتاي مۇشەلەرى تاراپىنان ايتىلعان ۇسىنىستار حاتشىلىقتا جيناقتالىپ، ۇلتتىق قۇرىلتايدىڭ كەلەسى وتىرىسىندا قاراستىرۋ ءۇشىن مۇددەلى مەملەكەتتىك ورگاندارمەن تالقىلاناتىن بولادى.

ۇلتتىق قۇرىلتايدىڭ V وتىرىسىن كەلەسى جىلى قىزىلوردا قالاسىندا وتكىزۋ جوسپارلانىپ وتىر.

Abai.kz