مەملەكەت باسشىسىنىڭ تاپسىرمالارىن ورىنداۋ اياسىندا 2025 جىلى قر عىلىم جانە جوعارى ءبىلىم مينيسترلىگى جەتەكشى شەتەلدىك ۋنيۆەرسيتەتتەرمەن ستراتەگيالىق سەرىكتەستىكتەردى جۇيەلى تۇردە دامىتىپ، قازاقستاندى وڭىرلىك ءبىلىم بەرۋ ورتالىعى رەتىندە قالىپتاستىرۋعا جانە ازاماتتاردىڭ ساپالى حالىقارالىق بىلىمگە قولجەتىمدىلىگىن كەڭەيتۋگە باعىتتالعان جۇمىستى جالعاستىردى.

قازاقستان الەمنىڭ جەتەكشى ۋنيۆەرسيتەتتەرىنىڭ ەسىگىن اشادى

قازاقستاندا 40 جەتەكشى شەتەلدىك ۋنيۆەرسيتەتپەن ستراتەگيالىق سەرىكتەستىك ورناتىلعان، ونىڭ ىشىندە 33 فيليالى قازىرگى ۋاقىتتا جۇمىس ىستەپ تۇر. بۇل قادامدار باسەكەگە قابىلەتتى كادرلاردى دايارلاۋ، عىلىمدى دامىتۋ جانە ەلدىڭ الەمدىك اكادەميالىق قاۋىمداستىققا ينتەگراتسيالانۋى ءۇشىن مىقتى نەگىز قالىپتاستىرادى.

شەتەلدىك ۋنيۆەرسيتەتتەردىڭ فيليالدارى وزىق ءبىلىم بەرۋ باعدارلامالارى مەن زاماناۋي عىلىمي تاجىريبەلەرگە جول اشادى، تەحنولوگيالار مەن يننوۆاتسيالار ترانسفەرتىنە ىقپال ەتەدى، سونداي-اق وقىتۋ مەن زەرتتەۋلەر ساپاسىنىڭ جاڭا ستاندارتتارىن قالىپتاستىرادى. ولار وتاندىق جوعارى وقۋ ورىندارىنىڭ باسەكەگە قابىلەتتىلىگىن ارتتىرىپ، ستۋدەنتتەرگە قازاقستاننان شىقپاي-اق حالىقارالىق ديپلوم الۋعا مۇمكىندىك بەرەدى جانە رەسپۋبليكانىڭ جاھاندىق اكادەميالىق ءارى زەرتتەۋ كەڭىستىگىنە قاتىسۋىن كەڭەيتەدى.

قازاقستاننىڭ شەتەلدىك ۋنيۆەرسيتەتتەرمەن ارىپتەستىگى رف، اقش، ۇلىبريتانيا، قحر، كورەيا رەسپۋبليكاسى، فرانتسيا، گەرمانيا، يتاليا، پولشا، تۇركيا جانە وزبەكستان ۋنيۆەرسيتەتتەرىن قامتيدى. فيليالداردا وقىتۋ ەكونوميكانىڭ باسىم جانە كادر تاپشىلىعى بار باعىتتارعا ماماندار دايارلاۋعا باعىتتالعان 162 ءبىلىم بەرۋ باعدارلاماسى بويىنشا جۇرگىزىلەدى.

حالىقارالىق ءبىلىم – ەلىمىزدە: ورتالىق ازياداعى العاشقى Russell Group كامپۋسى

2025 جىلعى قىركۇيەكتەن باستاپ Cardiff University, Woosong University, ممحقي, ماركە پوليتەحنيكالىق ۋنيۆەرسيتەتى جانە انحالت قولدانبالى ۋنيۆەرسيتەتى فيليالدارىندا وقىتۋ باستالدى.

سونداي-اق بيىل Coventry University Kazakhstan (2024 جىلى اشىلعان) جاڭا باعدارلامالارعا قابىلداۋ وتكىزدى. Coventry University Kazakhstan – بىرىككەن كورولدىكتىڭ Coventry University ليتسەنزيالانعان كامپۋسى جانە بەلگىلەنگەن ۇلگىدەگى بريتاندىق ديپلوم الۋعا مۇمكىندىك بەرەتىن استاناداعى العاشقى بريتاندىق ۋنيۆەرسيتەت.

استانادا Cardiff University Kazakhstan سالتاناتتى تۇردە اشىلدى. بۇل – Cardiff University-ءدىڭ العاشقى شەتەلدىك كامپۋسى ءارى ورتالىق ازياداعى Russell Group ۋنيۆەرسيتەتتەرى توبىنا كىرەتىن جالعىز كامپۋس. اتالعان وقيعا حالىقارالىق ءبىلىم بەرۋدى دامىتۋ مەن قازاقستان مەن ۇلىبريتانيا اراسىنداعى ستراتەگيالىق سەرىكتەستىكتى نىعايتۋ جولىنداعى ماڭىزدى قادام بولدى. سونداي-اق ەلوردادا Coventry University Kazakhstan ءوز جۇمىسىن باستادى – بۇل استانادا اشىلعان العاشقى بريتاندىق ۋنيۆەرسيتەت. ول – ۇلىبريتانيانىڭ Coventry University ۋنيۆەرسيتەتىنىڭ ليتسەنزيالانعان كامپۋسى جانە بەلگىلەنگەن ۇلگىدەگى بريتاندىق ديپلوم الۋعا مۇمكىندىك بەرەدى.

Woosong University جانە New York Film Academy: وڭىرلەردەگى حالىقارالىق ءبىلىم بەرۋ

تۇركىستان قالاسىندا اقپاراتتىق تەحنولوگيالار سالاسى بويىنشا ورتالىق ازيا ءۇشىن بىلىكتى ماماندار دايارلاۋعا باعىتتالعان Woosong University (وڭتۇستىك كورەيا، WSUK) فيليالى اشىلدى. ۋنيۆەرسيتەت قازاقستاننىڭ ستۋدەنتتەرى مەن جاس ماماندارىنا جاساندى ينتەللەكت پەن دەرەكتەر عىلىمىنا (Data Science) باسىمدىق بەرەتىن جوعارى ساپالى IT-ءبىلىم الۋعا مۇمكىندىك بەرەدى. سونىمەن قاتار قاسكەلەڭ قالاسىندا New York Film Academy فيليالى ءوز جۇمىسىن باستادى – بۇل قازاقستانداعى الەمدىك دەڭگەيدەگى العاشقى شىعارماشىلىق ۋنيۆەرسيتەت جانە ورتالىق ازياداعى امەريكالىق كينو مەكتەبىنىڭ جالعىز كامپۋسى.

ساپا ستاندارتتارى: الەمدىك توپ-رەيتينگتەرگە باعدار الۋ

حالىقارالىق سەرىكتەستىكتەردىڭ ساپاسىن قامتاماسىز ەتۋدەگى ماڭىزدى قۇرالداردىڭ ءبىرى – شەتەلدىك ۋنيۆەرسيتەتتەردىڭ QS, ARWU, THE حالىقارالىق اكادەميالىق رەيتينگتەرىنىڭ توپ-250 قاتارىنا ەنۋى جونىندەگى تالاپ بولدى. بۇل جوعارى اكادەميالىق جانە عىلىمي بەدەلگە يە ۋنيۆەرسيتەتتەرمەن ىنتىماقتاستىققا باسىمدىق بەرۋگە مۇمكىندىك بەردى.

شەتەلدىك ۋنيۆەرسيتەتتەردىڭ فيليالدارىن اشۋ ۇلتتىق جوعارى ءبىلىم بەرۋ جۇيەسىنىڭ دامۋىنا جۇيەلى تۇردە ىقپال ەتەدى. اتاپ ايتقاندا، كادر دايارلاۋدىڭ حالىقارالىق ستاندارتتارى ەنگىزىلىپ جاتىر، پراكتيكالىق باعىتتاعى وقۋ جوسپارلارى ىسكە اسىرىلىپ، اعىلشىن تىلىندە وقىتۋ كەڭەيۋدە، باس ۋنيۆەرسيتەتتەردىڭ تسيفرلىق پلاتفورمالارى مەن كىتاپحانالىق رەسۋرستارىنا قولجەتىمدىلىك قامتاماسىز ەتىلەدى، سونداي-اق قازاقستاندىق جوعارى وقۋ ورىندارىنىڭ ينفراقۇرىلىمى جاڭارتىلىپ جاتىر.

بىرلەسكەن جوبالاردى جۇزەگە اسىرۋ ناتيجەسىندە وڭىرلەردە جاڭا وقۋ-زەرتحانالىق كورپۋستار مەن جاتاقحانالار پايدالانۋعا بەرىلدى، شەتەلدىك ۋنيۆەرسيتەتتەر فيليالدارى ءۇشىن جەكە كامپۋستار ۇسىنىلدى. بۇل قاتاردا اريزونا ۋنيۆەرسيتەتى، Heriot-Watt University, رحتۋ، SeoulTech, بەيجىڭ تىلدەر جانە مادەنيەت ۋنيۆەرسيتەتى، ماركە پوليتەحنيكالىق ۋنيۆەرسيتەتىمەن سەرىكتەستىك جوبالار بار. سونىمەن قاتار Cardiff University, Coventry University, ميفي جانە ممحقي ۇشىن جەكە كامپۋستار سالۋ جۇمىستارى جۇرگىزىلەدى.

ينۆەستيتسيالار جانە ناقتى ەكونوميكالىق سەكتورمەن ءوزارا ءىس-قيمىل

ستراتەگيالىق سەرىكتەستىكتەردى دامىتۋدا يندۋستريالىق سەرىكتەستەردىڭ دە ۇلەسى زور. ماسەلەن، «قازفوسفات» جشس رحتۋ فيليالىن قولداۋعا قارجى ءبولدى. سونىمەن قاتار كوپتەگەن شەتەلدىك جوعارى وقۋ ورىندارى زەرتحانالىق جانە وقۋ جابدىقتارىن ساتىپ الۋ ارقىلى ينۆەستيتسيا تارتۋ تاجىريبەسىن جۇزەگە اسىرىپ كەلەدى. ماسەلەن، قىتاي تاراپى د.سەرىكباەۆ اتىنداعى شقتۋ لۋ بان شەبەرحاناسى ءۇشىن جابدىقتار ساتىپ الۋعا جانە وقىتۋشىلاردى دايارلاۋعا قارجى ءبولىپ، سونداي-اق «SMART Driving Technology» ينجينيرينگتىك ورتالىعىن قۇرۋدى قولدادى. ال سەۋلتەحتىڭ «LUPIC» جوباسى اياسىندا كورەي تاراپى قورقىت اتا ۋنيۆەرسيتەتى بازاسىندا جاساندى ينتەللەكت ينستيتۋتىن دامىتۋعا قارجىلاي قولداۋ كورسەتتى.

فيليالداردى اشۋداعى نەگىزگى باسىمدىق وڭىرلىك جوعارى وقۋ ورىندارىنىڭ اكادەميالىق جانە عىلىمي الەۋەتىن ارتتىرۋ، ولاردى اكادەميالىق ارتىقشىلىق ورتالىقتارىنا اينالدىرۋ، سونداي-اق اتوم سالاسى، «جاسىل» تەحنولوگيالار، سۋ قاۋىپسىزدىگى جانە باسقا دا ستراتەگيالىق ماڭىزى بار، كادر تاپشىلىعى بايقالاتىن باعىتتار بويىنشا ماماندار دايارلاۋعا بەرىلگەن.

حالىقارالىق باسەكەگە قابىلەتتىلىكتىڭ ارتۋى: قازاقستان QS Asia 2026 رەيتينگىندە

جۇيەلى جۇمىستىڭ ناتيجەلەرى QS Asia 2026 رەيتينگىندە كورىنىس تاپتى. اتالعان رەيتينگكە 44 قازاقستاندىق جوعارى وقۋ ورنى ەندى، ونىڭ ىشىندە 10 جاڭا ۋنيۆەرسيتەت العاش رەت قامتىلدى. بۇل ۇلتتىق جوعارى ءبىلىم بەرۋ جۇيەسىنىڭ باسەكەگە قابىلەتتىلىگىنىڭ ارتقانىن كورسەتەدى.

مەملەكەت باسشىسىنىڭ تاپسىرمالارىن جۇزەگە اسىرۋ اياسىندا قازاقستاندا ەلدى وڭىرلىك اكادەميالىق ورتالىققا اينالدىرۋعا باعىتتالعان اۋقىمدى جۇمىستار جۇرگىزىلىپ جاتىر. نەگىزگى ماقسات – ءبىلىم بەرۋ جۇيەسىن حالىقارالىق وزىق تاجىريبەلەر مەن ءبىلىم ترانسفەرى ارقىلى نىعايتۋ، سونداي-اق شەتەلدىك ستۋدەنتتەردى تارتۋ.

35 مىڭ شەتەلدىك ستۋدەنت: قازاقستان – تالانتتاردى تارتۋ ورتالىعى

اكادەميالىق ورتالىقتى دامىتۋ جاڭا ستراتەگيالىق باعىت – اكادەميالىق ءتۋريزمدى دە قامتيدى. وسى ماقساتتا وتاندىق جوعارى ءبىلىمنىڭ حالىقارالىق ارەناداعى تارتىمدىلىعىن ارتتىرۋعا ارنالعان «Study in Kazakhstan» جوباسى ىسكە قوسىلدى. جوبانىڭ امبيتسيالى مەجەسى – 2029 جىلعا قاراي شەتەلدىك ستۋدەنتتەر سانىن 100 مىڭعا جەتكىزۋ.

بيىلعى وقۋ جىلىندا قازاقستاننىڭ جوعارى وقۋ ورىندارىندا 35 مىڭنان استام شەتەلدىك ستۋدەنت ءبىلىم الىپ جاتىر، بۇل رەكوردتىق كورسەتكىش بولىپ وتىر.

قازاقستان – وڭىرلىك اكادەميالىق ورتالىق: ستراتەگيادان تۇراقتى ناتيجەگە دەيىن

جەتەكشى شەتەلدىك ۋنيۆەرسيتەتتەرمەن ستراتەگيالىق سەرىكتەستىكتەردى دامىتۋ قازاقستاندى جاھاندىق ءبىلىم بەرۋ كەڭىستىگىنە ينتەگراتسيالاۋدىڭ جانە جوعارى ءبىلىمنىڭ ورنىقتى دامۋىن قامتاماسىز ەتۋدىڭ نەگىزگى قۇرالدارىنىڭ ءبىرى بولىپ وتىر.

سونىمەن قاتار جەتەكشى شەتەلدىك ۋنيۆەرسيتەتتەردى تارتۋ ساياساتىن ىسكە اسىرۋ قازاقستان ءۇشىن ۇزاقمەرزىمدى ەكونوميكالىق، كادرلىق جانە گەوساياسي تيىمدىلىك قالىپتاستىرادى. ءبىلىم بەرۋ سەكتورى شيكىزاتتىق ەمەس تابىس كوزىنە، ال اكادەميالىق تۋريزم ەكونوميكا ءوسۋىنىڭ دەربەس باعىتىنا اينالىپ كەلەدى. ەلىمىزدە حالىقارالىق ديپلومداردى الۋ ءبىلىم بەرۋ ميگراتسياسىن تومەندەتەدى، تالانتتى جاستار مەن قارجى رەسۋرستارىن ەلدە ساقتاپ قالادى، سونىمەن بىرگە وقىتۋ مەن عىلىمنىڭ حالىقارالىق ستاندارتتارىن ەنگىزۋ ەسەبىنەن كادرلار دايارلاۋ ساپاسىن ارتتىرادى.

وسىلايشا، شەتەلدىك جوعارى وقۋ ورىندارىنىڭ فيليالدارى تەحنولوگيالار ترانسفەرتىن، قولدانبالى زەرتتەۋلەردىڭ دامۋىن جانە ەكونوميكانىڭ باسىم سالالارى ءۇشىن ماماندار دايارلاۋدى جەدەلدەتەدى، سونداي-اق وڭىرلەردە جاڭا ءوسۋ نۇكتەلەرىن قالىپتاستىرادى. جيىنتىعىندا بۇل شارالار قازاقستاننىڭ حالىقارالىق ۇستانىمىن نىعايتىپ، ءبىلىم بەرۋ ديپلوماتياسىنىڭ قۇرالدارىن كەڭەيتەدى جانە ەلدىڭ وڭىرلىك اكادەميالىق ورتالىق رەتىندەگى مارتەبەسىن بەكىتەدى.

Abai.kz