ەنەرگەتيكا مينيسترلىگى 2027 جىلدان باستاپ ەاەو اياسىندا ورتاق مۇناي ونىمدەرى نارىعى قالىپتاسۋىنا بايلانىستى ەلدەگى بەنزين باعاسى رەسەيمەن تەڭەسەدى دەگەن اقپاراتقا قاتىستى پىكىر ءبىلدىردى، دەپ حابارلايدى Ulysmedia.kz.

ۆەدومستۆو وكىلدەرى قازىر قازاقستاندا اي-92 بەنزينىنىڭ باعاسىن كوتەرۋگە موراتوري بار ەكەنىن ەسكە سالدى. بۇل شارا ينفلياتسيانى تەجەۋ ءۇشىن ەنگىزىلگەن. مينيسترلىك جانارماي باعاسىندا كۇرت ءوسىم بولمايدى دەپ سەندىردى.

— 2027 جىلدان باستاپ ەاەو اياسىندا مۇناي مەن مۇناي ونىمدەرىنىڭ ورتاق نارىعىن قۇرۋ كەزەڭ-كەزەڭىمەن جۇزەگە اسادى. بۇل – زاڭنامالاردى ۇيلەستىرۋ ۇدەرىسى، باسقا ەلدەرمەن باعانى بىردەن ءارى اۆتوماتتى تۇردە تەڭەستىرۋ دەگەن ءسوز ەمەس. كەز كەلگەن ينتەگراتسيالىق پروتسەستە باستى باسىمدىق – قازاقستاننىڭ ۇلتتىق مۇددەسى مەن ازاماتتاردىڭ الەۋمەتتىك جاعدايى، — دەپ ءتۇسىندىردى ەنەرگەتيكا ءمينيسترىنىڭ كەڭەسشىسى ءارى رەسمي وكىلى اسەل سەرىكپاەۆا.

سونىمەن قاتار، مينيسترلىك نارىقتىق فاكتورلاردى ەسكەرمەۋگە بولمايتىنىن دا اتاپ ءوتتى. قازاقستانداعى جانارماي باعاسىنىڭ تومەن بولۋى «سۇر» ەكسپورتقا جول اشادى – بەنزين كورشى ەلدەرگە زاڭسىز تاسىمالدانىپ، ىشكى نارىقتا تاپشىلىق قاۋپىن تۋدىرادى. سوندىقتان باعانى كوتەرۋ قاجەت، بىراق بۇل بىردەن ەمەس، بىرتىندەپ جۇزەگە اسادى.

— قازىرگى تومەن باعالار ينۆەستيتسيا تارتۋعا كەدەرگى كەلتىرەدى. ال سالاعا شىمكەنت، اتىراۋ جانە پاۆلودار زاۋىتتارىن كەڭەيتۋگە، سونداي-اق ءتورتىنشى مۇناي وڭدەۋ زاۋىتىن سالۋعا قاراجات قاجەت. موراتوري اياقتالعاننان كەيىن نارىقتىق باعاعا كوشۋ بىرتىندەپ جۇرگىزىلەدى. بارلىق شەشىمدەر ەكونوميكالىق جاعداي مەن حالىقتىڭ تابىسىنا قاراي قابىلدانادى، تۇتىنۋشىلار ءۇشىن «شوك» بولاتىنداي ستسەناري بولمايدى، — دەپ سەندىردى مينيسترلىك.

Abai.kz