رەسەي اقش-تىڭ بۇرىنعى اكىمشىلىگى كەزىنەن ساقتالعان اكتيۆتەردەن 1 ملرد دوللاردى «بەيبىتشىلىك كەڭەسىنە» اۋدارۋعا دايىن. بۇل تۋرالى ەل پرەزيدەنتى ۆلاديمير پۋتين 21 قاڭتاردا وتكەن قاۋىپسىزدىك كەڭەسىنىڭ وتىرىسىندا مالىمدەدى.

ونىڭ ايتۋىنشا، قالعان قارجى ۋكراينالىق قاقتىعىستان كەيىنگى ايماقتاردى قالپىنا كەلتىرۋگە جۇمسالۋى مۇمكىن.

Bloomberg اگەنتتىگىنىڭ حابارلاۋىنشا، اقش بيلىگى گازا سەكتورى بويىنشا حالىقارالىق «بەيبىتشىلىك كەڭەسىندە» تۇراقتى ورىن العىسى كەلەتىن ەلدەردەن كەمىندە $1 ملرد تولەۋدى تالاپ ەتىپ وتىر. بەلارۋس پرەزيدەنتى الەكساندر لۋكاشەنكو العاشقى ءۇش جىل ۇيىمعا قۇرىلتايشى رەتىندە تەگىن قاتىسۋعا بولاتىنىن جەتكىزگەن.

بۇعان دەيىن پۋتين ترامپتان جەكە شاقىرۋ كەلگەنىن راستاعان ەدى. ول سىرتقى ىستەر مينيسترلىگىن قۇجاتتاردى زەرتتەپ، ستراتەگيالىق سەرىكتەستەرمەن كەڭەسۋدى تاپسىرعان.

«تەك سودان كەيىن عانا شاقىرۋعا جاۋاپ بەرۋگە بولادى»، — دەدى پرەزيدەنت.

ايتا كەتەيىك، «بەيبىتشىلىك كەڭەسى» — ترامپتىڭ ۇسىنىسىمەن گازا جاعدايىن رەتتەۋ ءۇشىن قۇرىلعان ۇيىم. ازىرگە كەڭەسكە شاقىرىلعان ەلدەر ءتىزىمى بەلگىسىز، بىراق Axios اگەنتتىگىنىڭ مالىمەتىنشە، وندا 58 ەلدىڭ كوشباسشىسى بار. شاقىرىلعان ەلدەردىڭ قاتارىندا رەسەي، ۋكراينا بار. قۇرىلتايشىلار رەتىندە پرەزيدەنت قاسىم-جومارت توقاەۆ، ارمەنيا پرەمەر-ءمينيسترى نيكول پاشينيان مەن بەلارۋسسيا پرەزيدەنتى الەكساندر لۋكاشەنكوعا شاقىرتۋ جىبەرىلگەن.

فرانتسيا پرەزيدەنتى ەممانيۋەل ماكرون كەڭەسكە قاتىسۋدان باس تارتقان، ال گەرمانيا تەك ۇيىمنىڭ قىزمەتى حالىقارالىق قۇقىق نورمالارىنا تولىق سايكەس بولعان جاعدايدا قوسىلاتىنىن حابارلاعان.

Abai.kz