ءسوز بوستاندىعى – تەك جەكە ادامنىڭ قۇقىعى ەمەس، مەملەكەتتىڭ ينتەللەكتۋالدىق الەۋەتىن ارتتىراتىن ستراتەگيالىق رەسۋرس
قوعامدى كەمەل ويمەن، جۇيەلى سوزبەن، ەركىن پىكىرمەن دامىتۋدىڭ ماڭىزى زور. ەلدىڭ عىلىمى مەن مادەنيەتى، يننوۆاتسياسى مەن رۋحاني قۋاتى – وي ەركىندىگى بار ورتادا عانا قالىپتاسادى. كونستيتۋتسيالىق رەفورما جونىندەگى كوميسسيانىڭ العاشقى وتىرىسىندا ءماجىلىس دەپۋتاتى مۇرات ابەنوۆ وسىنداي ۇسىنىسىن جەتكىزدى.
ونىڭ ايتۋىنشا، شىعارماشىلىق، عىلىمي جانە يننوۆاتسيالىق جوبالارعا قولداۋ ناقتى قۇقىقتىق جانە ينستيتۋتسيونالدىق تەتىكتەر ارقىلى جۇزەگە اسۋى ءتيىس.
«بۇگىنگى تاڭدا ءبىز ءبىر ماڭىزدى ماسەلەگە بەتپە-بەت كەلىپ وتىرمىز. قوعامعا پايدالى، سالماقتى، جاۋاپتى پىكىر ايتاتىن ازاماتتاردىڭ ويى كەيدە تاسادا قالىپ، ال جەڭىل-جەلپى سوزدەر مەن جالعان اقپارات تەز تارالىپ كەتەتىن جاعدايلار بار. بۇل – قوعامنىڭ ينتەللەكتۋالدىق دامۋىنا كەرى اسەر ەتەتىن قۇبىلىس. سوندىقتان كونستيتۋتسيالىق رەفورما اياسىندا شىعارماشىلىق ەركىندىكتى تەك جاريالاپ قانا قويماي، ونى ناقتى قورعايتىن جانە قولدايتىن نورمالاردى بەكىتۋ قاجەت دەپ ەسەپتەيمىن»، – دەپ اتاپ وتكەن مۇرات ابەنوۆ بىرقاتار ۇسىنىستارىن ورتاعا سالدى.
ەڭ الدىمەن، كونستيتۋتسيادا ءسوز بوستاندىعى مەن شىعارماشىلىق ەركىندىكتىڭ مازمۇنىن ناقتىلاپ كورسەتۋ قاجەت ەكەنىن. ابەنوۆتىڭ پىكىرىنشە، ول سىن-پىكىر ايتۋعا، جاڭا يدەيا ۇسىنۋعا، قوعامدىق پىكىر بىلدىرۋگە قۇقىقتىق نەگىز بولادى.
«كونستيتۋتسيا دەڭگەيىندە زياتكەرلىك مەنشىك قۇقىعىن قورعاۋدى كۇشەيتۋ قاجەت. شىعارماشىلىق ەڭبەك – ناقتى ەكونوميكالىق جانە قوعامدىق قۇندىلىق ەكەنى كونستيتۋتسيالىق دەڭگەيدە تانىلۋى ءتيىس. سونىمەن قاتار، مەملەكەت شىعارماشىلىق جانە عىلىمي قىزمەتكە جاعداي جاساۋعا مىندەتتى دەگەن قاعيداتتى بەكىتۋ ماڭىزدى. وعان قوسا، قوعامدىق ماڭىزى بار وي-پىكىرلەردى قولدايتىن، ساپالى كونتەنتتى ىنتالاندىراتىن جۇيەنى قالىپتاستىرۋ قاجەت. بۇل – جالعان اقپاراتقا قارسى كۇرەستىڭ دە ەڭ ءتيىمدى جولى»، – دەدى ول.
شىعارماشىلىق ەركىندىككە ناقتى كەپىلدىك بەرىلگەن ەلدەردە عىلىم مەن مادەنيەت، سونىمەن قاتار، ەكونوميكا دا قارقىندى دامىپ جاتقانىن مىسالعا كەلتىرگەن مۇرات ابەنوۆ جاستاردىڭ يدەيالارى ەل دامۋىنا ناقتى ۇلەس قوسۋى قاجەت ەكەنىنە توقتالدى.
«شىعارماشىلىق ەركىندىك پەن زياتكەرلىك مەنشىكتى قورعاۋ كونستيتۋتسيالىق رەفورمانىڭ ماڭىزدى وزەگىنە اينالۋى ءتيىس. سوندىقتان بۇل ماسەلە – تەك قۇقىقتىق ەمەس، ەلدىڭ ينتەللەكتۋالدىق قاۋىپسىزدىگى مەن بولاشاعىنا تىكەلەي قاتىستى»، – دەپ اتاپ ءوتتى دەپۋتات.
Abai.kz
