كەيىنگى كەزدە وزبەكستان ءوزىن جاڭا ەكونوميكالىق مودەل ۇسىنۋشى ەل رەتىندە كورسەتۋدە. حالىقارالىق فورۋمداردا سەرپىندى دامۋ، اشىقتىق، تسيفرلاندىرۋ تۋرالى ءجيى ايتادى.

بىراق ماسەلەنىڭ تۇبىنە ۇڭىلسەڭىز، ءبىر زاڭدىلىقتى بايقاۋعا بولادى. وزبەكستان قازاقستان الدەقاشان ءجۇرىپ وتكەن جولدى قايتالاپ كەلەدى. ونىسى وتە دۇرىس. سەبەبى قازاقستان قازىر ۇلتتىق مۇددەلەرىنە تولىق ساي كەلەتىن، تەڭگەرىمدى سىرتقى ساياسات ۇستاناتىن جاعدايعا جەتتى. سونداي-اق ادىلەتتى الەمدىك ءتارتىپ قالىپتاستىرۋعا ۇلەس قوسىپ كەلەدى.

ەكونوميكالىق كورسەتكىشتەردە وزبەكستانداعى ىشكى جالپى ءونىم كولەمىنىڭ ءوسۋ قارقىنى پايىزدىق تۇرعىدا جوعارى سەكىلدى كورىنەدى. رەسمي ستاتيستيكانى تەرەڭىرەك زەرتتەسەڭىز، ماسەلە مۇلدەم بولەك. بىلتىر وزبەكستان ءىجو-ءسى 7,7 پايىزعا ۇلعايىپ، 147 ميلليارد دوللاردى قۇرادى. ال قازاقستاندا بۇل كورسەتكىش 6,5 پايىزعا تەڭەستى. بىراق ىشكى جالپى ءونىم كولەمى 300 ميلليارد دوللاردان استى. بۇدان بولەك، جان باسىنا شاققانداعى تابىس، ەڭبەك ونىمدىلىگى، ۋربانيزاتسيا دەڭگەيى، قارجى نارىعى بويىنشا قازاقستان ازىرگە سەنىمدى تۇردە الدا.

تسيفرلاندىرۋ ماسەلەسىندە دە جاعداي ۇقساس. E-gov, تسيفرلى قىزمەتتەر تۋرالى كوپ ايتىلادى. الايدا جۇيەلىك تۇرعىدان العاندا، وزبەكستانداعى تسيفرلاندىرۋ اكىمشىلىك باقىلاۋدان تولىق ارىلعان جوق. قازاقستاندا بۇل پروتسەسس قوعام مەن بيزنەسكە الدەقايدا تەرەڭ ءسىڭىپ، ەكوجۇيەلىك دەڭگەيگە شىققان. ءتىپتى، ەۋروپالىقتاردىڭ ءوزى ونلاين، qr ارقىلى تولەمگە تاڭعالىپ جاتادى.

بۇل جەردە نەگىزگى ماسەلە وزبەكستاندا ەمەس. كورشى ەلدىڭ رەفورمالار جۇرگىزۋگە تالپىنىسى تۇسىنىكتى ءارى دۇرىس قادام. قازاقستان بۇل جولدى الدەقاشان ءجۇرىپ ءوتتى. سىرتقى يميدجگە، ءتۇرلى رەيتينگتەرگە سەندى. دەگەنمەن قازىر باسقارۋ ساپاسى، ۇزاق مەرزىمدى دامۋعا باسىمدىق بەرەدى. سوندىقتان قازاقستان ايماقتاعى كۇن ءتارتىبىن قالىپتاستىرىپ وتىرعان ەل. ال وزبەكستان سوعان بەيىمدەلىپ، ءبىزدىڭ ءجۇرىپ وتكەنىمىزدى سارالاپ، بارىنشا دامىپ كەلە جاتقان مەملەكەت.

ايبار ولجاەۆ

Abai.kz