كونستيتۋتسيالىق رەفورما جونىندەگى كوميسسيانىڭ بەسىنشى وتىرىسىندا كوميسسيا مۇشەسى، ۇلتتىق عىلىم اكادەمياسىنىڭ مۇشەسى دۋرۆۋدحان سۇراعان عىلىمي شىعارماشىلىق ەركىندىگىن كونستيتۋتسيا دەڭگەيىندە بەكىتۋ مەملەكەتتىڭ ستراتەگيالىق دامۋىنا تىكەلەي اسەر ەتەتىنىن، عىلىمي ەركىندىكسىز تۇراقتى دامۋ مەن دەموكراتيالىق قوعام قۇرۋ مۇمكىن ەمەستىگىن ايتتى.

«عىلىمي شىعارماشىلىق ەركىندىگىن كونستيتۋتسيا دەڭگەيىندە بەكىتۋ – عىلىمدى قوسالقى قۇرام ەمەس، جەكە-دارا قۇندىلىق رەتىندە مويىنداۋدى بىلدىرەدى. بارشامىزعا ءمالىم، عىلىمسىز – تۇراقتى دامۋ دا، شىنايى دەموكراتيا دا، ءتيىمدى مەملەكەتتىك باسقارۋ دا مۇمكىن ەمەس. كونستيتۋتسيالىق نورما، ەڭ الدىمەن – عىلىمي شىعارماشىلىق ەركىندىگى مارتەبەسىن ايقىندايدى. ياعني، مەملەكەت ونىڭ ەركىن جۇمىس جاساۋى ءۇشىن جاعداي جاساۋى ءتيىس»، – دەدى ول.

ونىڭ ايتۋىنشا، عىلىمي شىعارماشىلىق ەركىندىگى ۋنيۆەرسيتەتتەر مەن عىلىمي ورتالىقتاردىڭ دەربەستىگىمەن، وقىتۋشىلار مەن عالىمداردىڭ اكادەميالىق ەركىندىگىمەن تىعىز بايلانىستى. بۇل نورمانى كونستيتۋتسيادا ناقتى بەكىتپەيىنشە، عىلىمي مەكەمەلەردىڭ ادىستەمە تاڭداۋ، زەرتتەۋ جانە ءتۇسىندىرۋ تاقىرىپتارى بويىنشا ەركىندىگىن تولىق قامتاماسىز ەتۋ مۇمكىن ەمەس. كوميسسيا وتىرىسىندا جاھاندىق باسەكەلەستىك پەن تەحنولوگيالىق ترانسفورماتسيا جاعدايىندا عىلىمي ەركىندىكتىڭ ستراتەگيالىق ماڭىزىنا دا نازار اۋدارىلدى.

ءسوز سوڭىندا ول پرەامبۋلادا جانە قوسىمشا باپتاردا ادامي كاپيتال، ءبىلىم مەن عىلىم، مادەنيەت پەن يننوۆاتسيانى قازاقستان رەسپۋبليكاسىنىڭ مەملەكەتتىك قىزمەتىنىڭ ستراتەگيالىق باعىتتارى رەتىندە بەكىتۋدى قولداۋعا شاقىردى.

Abai.kz