ازاماتتىق قوعام مىقتى بولماي، مەملەكەت تە مىقتى بولمايدى. كونستيتۋتسيالىق كوميسسيانىڭ كەزەكتى وتىرىسىندا ءماجىلىس دەپۋتاتى ماقسات تولىقباي وسىلاي دەپ مالىمدەدى.

«وسى تۇرعىدان العاندا، اتا زاڭدا تۇڭعىش رەت «حالىق كەڭەسى» تۋرالى جەكە باپ، دەربەس ءبولىم پايدا بولدى. اتالعان قۇرىلىم جاي عانا كونسۋلتاتيۆتىك، فورمالدى ورگانعا اينالماس ءۇشىن، 70-2-باپتىڭ رەداكتسيالىق نۇسقاسىندا «قازاقستان حالىق كەڭەسى» قۇرىلتايعا زاڭ جوبالارىن ەنگىزە الادى دەپ ناقتى كورسەتىلدى. بۇل – حالىقتىڭ پىكىرىن مەملەكەتتىك شەشىم قابىلداۋ ۇدەرىسىنە جۇيەلى ەنگىزۋگە ارنالعان ساياسي ينستيتۋت. ياعني، جوعارى كونسۋلتاتيۆتىك ورگاننىڭ مۇشەسى بولىپ تابىلاتىن كەز كەلگەن قازاقستان ازاماتى زاڭ شىعارۋ باستاماسىن كوتەرە الادى. بۇل — ازاماتتارعا بەرىلگەن ناقتى كونستيتۋتسيالىق مۇمكىندىك»، – دەپ اتاپ ءوتتى ول. 

دەپۋتاتتىڭ ايتۋىنشا، حالىق كەڭەسىنىڭ ماڭىزى ارتا تۇسەدى. ول جاڭا ساياسي الاڭعا، مەملەكەتتىك شەشىمدەرگە ىقپال ەتەتىن ورتالىققا اينالادى. ەڭ باستىسى – حالىق كەڭەسى تولىقتاي اشىق قۇرىلىم بولادى جانە وعان كەز كەلگەن ازاماتتىڭ، بارلىق ەتنوستاردىڭ، كاسىپكەرلەردىڭ قاتىسۋىنا مۇمكىندىك بەرىلەدى. ۇسىنىلىپ وتىرعان وزگەرىستەردىڭ تۇپكى ماقساتى – مىقتى ينستيتۋتتارعا سۇيەنەتىن مەملەكەت قالىپتاستىرۋ.

Abai.kz