قازاقستان رەسەيدىڭ جوعارى وقۋ ورىندارىندا ءبىلىم الىپ جاتقان ستۋدەنتتەر سانى بويىنشا كوش باستاپ تۇر، دەپ حابارلايدى Ulysmedia.kz.

رەسەيدىڭ عىلىم جانە جوعارى ءبىلىم مينيسترلىگىنىڭ مالىمەتىنشە، 2025 جىلى رەسەي جوو-لارىندا وقيتىن شەتەلدىك ستۋدەنتتەر سانى 400 مىڭنان اسقان. بۇل – بارلىق ستۋدەنتتەردىڭ 8,5 پايىزى. جالپى رەسەيدە 179 ەلدەن كەلگەن جاستار ءبىلىم الىپ جاتىر.

سولاردىڭ ىشىندە ەڭ كوبى – قازاقستان ازاماتتارى. قازاقستاندىق ستۋدەنتتەر شەتەلدىك ستۋدەنتتەردىڭ 15,1 پايىزىن قۇرايدى نەمەسە 60 مىڭنان استام ادام.

كوشباسشىلار قاتارىندا سونداي-اق تۇرىكمەنستان (14,2%), قىتاي (14,1%), وزبەكستان (11,6%) جانە ءۇندىستان (9,7%) بار. بۇدان بولەك، تاجىكستان (6,1%), بەلارۋس (4%), قىرعىزستان (2,4%), ازەربايجان (2,4%), يران (2,4%) جانە وزگە ەلدەر (18%) كورسەتىلگەن. شەتەلدىك ستۋدەنتتەر اراسىندا مەديتسينا ماماندىقتارى ەرەكشە سۇرانىسقا يە.

ءبىلىم ينستيتۋتىنداعى «ۋنيۆەرسيتەتتەردى دامىتۋ» زەرتحاناسىنىڭ جەتەكشىسى نياز گابدراحمانوۆتىڭ ايتۋىنشا، ءابسوليۋتتى كورسەتكىش بويىنشا رەسەي الەمدەگى جوعارى ءبىلىم ەكسپورتتاۋشى ەلدەردىڭ الدىڭعى قاتارىندا ەمەس.

ماسەلەن، اقش-تا شامامەن 1,1 ملن شەتەلدىك ستۋدەنت وقيدى. كانادادا – 843 مىڭ، ۇلىبريتانيادا – 759 مىڭ، ال اۋستراليادا – 619 مىڭ ستۋدەنت بار.

Abai.kz