بۇل تۋرالى مينيسترلىكتىڭ الەۋمەتتىك جەلىدەگى پاراقشاسى جاريالادى.

وزگەرىستەر نەگىزىنەن جالداۋ اقىسىن شەكتەۋ، جەڭىلدەتىلگەن ساۋدا سورەلەرى جانە قازاقستاندىق وندىرۋشىلەردەن ساتىپ الۋعا قاتىستى بولماق. 

وسىلايشا، قر ساۋدا جانە ينتەگراتسيا مينيسترلىگى ىشكى ساۋدا سۋبەكتتەرىنە جەكە كاسىپكەرلىكتى مەملەكەتتىك قولداۋ شارالارىن كورسەتۋ قاعيدالارىنا وزگەرىستەر ەنگىزۋ جونىندەگى جوبانى قوعامدىق تالقىلاۋعا شىعارىپ وتىر. قۇجات "اشىق نقا" پورتالىندا جاريالانعان جانە 20 اقپانعا دەيىن تالقىلانباق.

– جوبا شاعىن بيزنەستى پراكتيكالىق تۇرعىدا قولداۋدى كۇشەيتۋگە جانە قازاقستاندىق ءوندىرىستىڭ دامۋىن ىنتالاندىرۋعا باعىتتالعان. ۇسىنىلىپ وتىرعان وزگەرىستەر مەملەكەتتىك باعدارلاما شارتتارىنا اسەر ەتىپ، مەملەكەتتىك قولداۋ شارالارىن الۋشىلار ءۇشىن كاسىپكەرلەردىڭ مۇددەلەرىن قورعاۋعا باسىمدىق بەرە وتىرىپ، قارسى مىندەتتەمەلەردى كۇشەيتۋدى كوزدەيدى.

نەگىزگى ۇسىنىستاردىڭ ءبىرى – ساۋدا نىسانى ءۇشىن مەملەكەتتىك قولداۋ العان، ياعني نەسيەنىڭ سىياقى مولشەرلەمەسىنىڭ ءبىر بولىگىن سۋبسيديالاۋ جانە نەسيەلەر بويىنشا كەپىلدىك العان كاسىپكەرگە ءبىر جىل ىشىندە جالداۋ قۇنىن وسىرۋگە شەكتەۋ قويىلادى. بۇل شارا جالعا الىنعان الاڭداردا جۇمىس ىستەيتىن شاعىن جانە ورتا بيزنەس، سونداي-اق جەكە كاسىپكەرلەر ءۇشىن ەرەكشە ماڭىزدى. ول شىعىنداردىڭ بولجامدىلىعىن قامتاماسىز ەتىپ، قىزمەتتى جوسپارلاۋعا مۇمكىندىك بەرەدى جانە جالداۋ اقىسىنىڭ كەنەتتەن ءارى نەگىزسىز ءوسۋ قاۋپىن تومەندەتەدى، – دەلىنگەن رەسمي حابارلامادا. 

سونىمەن قاتار، جوبا اياسىندا قازاقستاندىق تاۋار وندىرۋشىلەردىڭ تىزىلىمىنە ەنگىزىلگەن جاڭا برەندتەردىڭ تاۋارلارىن ساۋدا الاڭدارىندا جانە سورەگە جەڭىلدەتىلگەن شارتتارمەن ورنالاستىرۋ كوزدەلگەن. بۇل ءوندىرۋشىنىڭ جازباشا ءوتىنىشى نەگىزىندە 3 ايدان ودان دا ۇزاق مەرزىمگە جۇزەگە اسىرىلادى. ۇسىنىلىپ وتىرعان وزگەرىستەر جاڭا وتاندىق برەندتەر ءۇشىن نارىقتا ءوزىن تانىتۋعا جانە دامۋعا قاجەتتى باستاپقى مۇمكىندىك بەرەدى.

– بۇدان بولەك، اينالىم قاراجاتىن تولىقتىرۋ كەزىندە قاعيدالاردا تاۋارلاردى، شيكىزات پەن ماتەريالداردى قازاقستاندىق تاۋار وندىرۋشىلەر تىزىلىمىنە ەنگىزىلگەن كاسىپكەرلەردەن ساتىپ الۋ تالابى بەكىتىلەدى. بۇل شەشىم ىشكى كووپەراتسيانى دامىتۋعا، جەرگىلىكتى جەتكىزۋ تىزبەكتەرىن قولداۋعا جانە يمپورتقا تاۋەلدىلىكتى ازايتۋعا باعىتتالعان.

جالپى العاندا، ۇسىنىلىپ وتىرعان نورمالاردى ىسكە اسىرۋ شاعىن بيزنەس ماسەلەلەرىن شەشۋگە جۇيەلى كوزقاراستى كورسەتىپ، ۇزاق مەرزىمدى ەكونوميكالىق اسەر قالىپتاستىرۋعا مۇمكىندىك بەرەدى. ناتيجەسىندە شاعىن وندىرۋشىلەر سانىنىڭ ارتۋى، وتاندىق تاۋارلار اسسورتيمەنتىنىڭ كەڭەيۋى جانە جاڭا جۇمىس ورىندارىنىڭ قۇرىلادى دەپ جوسپارلانعان، – دەپ حابارلايدى قر ساۋدا جانە ينتەگراتسيا مينيسترلىگى. 

جوبانى تالقىلاۋ 20 اقپانعا دەيىن جالعاسپاق. قر ساۋدا جانە ينتەگراتسيا مينيسترلىگى بارلىق مۇددەلى تۇلعالاردى "اشىق نقا" پورتالىندا قوعامدىق تالقىلاۋعا قاتىسۋعا شاقىرىپ وتىر.

Abai.kz