رەسەي قازاقستاننىڭ تاراز، قىزىلوردا جانە تۇركىستان قالالارىندا جاڭا مەكتەپتەر سالۋدى جوسپارلاپ وتىر. بۇل تۋرالى رەسەي فەدەراتسياسىنىڭ قازاقستانداعى ەلشىسى الەكسەي بوروداۆكين «روسسيا 24» تەلەارناسىنا بەرگەن سۇحباتىندا مالىمدەدى، دەپ حابارلايدى Todayinfo اقپارات اگەنتتىگى.

ديپلوماتتىڭ ايتۋىنشا، بۇل ەكى ەل اراسىنداعى گۋمانيتارلىق ىنتىماقتاستىقتى دامىتۋ اياسىنداعى ماڭىزدى قادامداردىڭ ءبىرى. سونىمەن قاتار، رەسەيدىڭ ومبى، استراحان جانە ورىنبور قالالارىندا قازاقستاندىق مەكتەپتەردىڭ قۇرىلىسى باستالادى. بۇل – ەكىجاقتى كەلىسىم نەگىزىندە ىسكە اساتىن جوبا.

«ءبىز گۋمانيتارلىق سالاداعى ءبىلىم بەرۋ باستامالارىن جوعارى قارقىنمەن ىسكە اسىرىپ جاتىرمىز. تاراز، قىزىلوردا جانە تۇركىستان قالالارىندا رەسەيلىك مەكتەپتەردىڭ قۇرىلىسى جوسپارلانۋدا»، — دەدى ەلشى.

سونداي-اق، الماتى ماڭىندا دارىندى بالالاردى انىقتاپ، دامىتۋعا باعىتتالعان رەسەيلىك «سيريۋس» ءبىلىم بەرۋ ورتالىعىنىڭ فيليالى اشىلماق.

الەكسەي بوروداۆكين ءوز سوزىندە پرەزيدەنت قاسىم-جومارت توقاەۆتىڭ ماسكەۋگە جاساعان ساپارىن جوعارى باعالاپ، ونى ەكى ەل باسشىلارى اراسىنداعى «ەرەكشە وداقتاستىق پەن تەرەڭ جەكە سەنىمنىڭ كورىنىسى» دەپ اتادى. ول ەكىجاقتى قارىم-قاتىناستى تەرەڭدەتەتىن ستراتەگيالىق سەرىكتەستىك تۋرالى دەكلاراتسيانىڭ جاي عانا قۇجات ەمەس، ناقتى ءىس-قيمىل جوسپارى ەكەنىن جەتكىزدى.

سۇحبات بارىسىندا اەس سالۋ ماسەلەسى دە قوزعالدى. ەلشىنىڭ ايتۋىنشا، جاقىن ارادا ستانتسيا قۇرىلىسى بويىنشا قۇجاتتارعا قول قويىلىپ، رەسەيدىڭ مەملەكەتتىك نەسيە بەرۋ راسىمدەرى اياقتالادى.

سوڭىندا ديپلومات پرەزيدەنت توقاەۆتىڭ حالىقارالىق ورىس ءتىلى ۇيىمىن قۇرۋ تۋرالى باستاماسىنىڭ ىسكە اسىرىلا باستاعانىن اتاپ ءوتىپ، قازاقستانداعى رەسەيلىك وتانداستار ۇيىمدارى مەن ورىس پراۆوسلاۆيە شىركەۋىن ەكى ەل اراسىنداعى «گۋمانيتارلىق اۆانگارد» جانە ەتنوسارالىق تاتۋلىقتىڭ نەگىزى دەپ باعالادى.

Abai.kz