ءماجىلىس دەپۋتاتى اسحات راحيمجانوۆ باس پروكۋرور مەن ۇقك توراعاسىنىڭ اتىنا دەپۋتاتتىق ساۋال جولداپ، قازاقستاندىق جوعارى لاۋازىمدى تۇلعالاردىڭ دجەففري ەپشتەينمەن ىقتيمال بايلانىستارى تۋرالى اقپاراتتى تەكسەرۋدى تالاپ ەتتى.

الەمدىك ساياسي ورتانى «ەپشتەين فايلدارى» دەپ اتالاتىن ماتەريالداردىڭ جاريالانۋى دۇرلىكتىرۋدە. وسىعان بايلانىستى ءار ەلدەردە جانجالدار تۋىپ جاتىر.  ول تۋرالى جسدپ پارتياسىنىڭ توراعاسى، ءماجىلىس دەپۋتاتى ا.راحيمجانوۆ «جەتەكشى دەموكراتيالىق دەرجاۆالار بۇل جانجالعا قاتىسى بار تۇلعالارعا قاتىستى پارلامەنتتىك تەرگەۋلەر مەن قىلمىستىق قۋدالاۋلاردى باستاپ كەتتى»، — دەدى.

دەپۋتات قازاقستان ازاماتتارى «ەل تاعدىرى كىمدەردىڭ قولىندا بولعانىن جانە مەملەكەت تاعدىرىنىڭ كۇماندى جابىق كلۋبتاردا ساۋداعا سالىنباعانىن بىلۋگە قۇقىلى»، دەدى..

دەپۋتاتتىڭ ساۋالىندا جاريالانعان ماتەريالداردا «ەسكى قازاقستان» دەپ اتالاتىن ساياسي ەليتانىڭ وكىلدەرى اتالعانى كورسەتىلگەن. ەپشتەين تىزىمىندە قازاقستاننان ماسيموۆ پەن كەلىمبەتوۆ بار دەگەن دەرەكتەر پايدا بولدى.

اتاپ ايتقاندا، ول قازىرگى ۋاقىتتا مەملەكەتكە وپاسىزدىق جاساۋ جانە بيلىكتى باسىپ الۋعا ارەكەت ەتۋ ءىسى بويىنشا جازاسىن وتەپ جاتقان بۇرىنعى پرەمەر-مينيستر ءارى ۇقك-ءنىڭ ەكس-توراعاسى كارىم ءماسىموۆتى اتادى.

«كارىم ءماسىموۆ جازبالاردا كەمىندە 8 رەت اتالادى. جازبالاردان ەپشتەين مەن ءماسىموۆتىڭ جەكە تانىس بولعانى تىكەلەي كورىنەدى»، — دەدى اسحات راحيمجانوۆ.

دەپۋتات مىناداي سۇراقتاردى كوتەردى: قازاقستاندىق جوعارى لاۋازىمدى شەنەۋنىككە ەپشتەينمەن كەزدەسۋلەردى باستاۋ نە ءۇشىن قاجەت بولدى جانە بۇل كەزدەسۋلەر قاي جەردە ءوتتى؟

وسىعان بايلانىستى قازاقستاندا ارنايى تەرگەۋ نە سوت شارالارى وتە مە، ول جاعى بەلگىسىز.

Abai.kz