اقوردادا سەربيا پرەزيدەنتى الەكساندر ءۆۋچيچتى سالتاناتتى قارسى الۋ ءراسىمى ءوتتى. قازاقستان مەن سەربيا پرەزيدەنتتەرى شاعىن قۇرامدا كەلىسسوز وتكىزدى.

قاسىم-جومارت توقاەۆ:

– ءبىز سەربيانى ەۋروپاداعى ماڭىزدى ستراتەگيالىق سەرىكتەسىمىز سانايمىز. بىرقاتار باعىتتا، اسىرەسە، ەكونوميكالىق، مادەني-گۋمانيتارلىق سالالارداعى ىقپالداستىعىمىزدى نىعايتۋ ءۇشىن كوپ جۇمىس اتقاردىق. استانا مەن بەلگراد اراسىندا تىكەلەي اۋە رەيسى اشىلدى. ساۋدا قاتىناستارىمىز تابىستى دامىپ كەلەدى. قازاقستاندا 60-تان اسا سەربيالىق كومپانيا جەمىستى ەڭبەك ەتىپ جاتىر. نەگىزگى حالىقارالىق ماسەلەلەر بويىنشا ۇستانىمدارىمىز ورتاق. سوندىقتان ەكى ەل اراسىنداعى ىنتىماقتاستىقتىڭ بەرىك ءارى ءتيىمدى ىرگەتاسى قالاندى دەپ ويلايمىن. ءسىزدىڭ ساپارىڭىز دوستىق قارىم-قاتىناسىمىزعا تىڭ سەرپىن بەرۋ تۇرعىسىنان وتە ماڭىزدى ەكەنىنە سەنىمدىمىن، - دەدى.

الەكساندر ۆۋچيچ:

– قازاقستانعا رەسمي ساپارمەن كەلگەنىمە قۋانىشتىمىن. قوناقجايلىق تانىتقانىڭىز ءۇشىن ريزاشىلىعىمدى بىلدىرەمىن. ءسىزدىڭ پىكىرىڭىزبەن تولىق كەلىسەمىن، ەلدەرىمىز اراسىندا شىنايى ستراتەگيالىق قارىم-قاتىناس ورناعان. ءسىزدىڭ قولداۋىڭىزدىڭ ارقاسىندا ساۋدا-ەكونوميكالىق بايلانىستارىمىز جوعارى قارقىنمەن دامىپ كەلەدى. الداعى ۋاقىتتا جاساندى ينتەللەكت، اقپاراتتىق تەحنولوگيالار مەن ەنەرگەتيكا سالالارىندا ىقپالداستىق ورناتۋ ارقىلى دوستىعىمىز جاڭا دەڭگەيگە كوتەرىلەدى دەپ ويلايمىن. ءسىزدى جاقىن ارادا ەلىمىزدە قارسى الۋعا دايىنبىز، - دەدى.

Abai.kz