سوڭعى ۋاقىتتا قوعامدا ۇلتتىق قاۋىپسىزدىك ماسەلەلەرى تەك قۇقىق قورعاۋ نەمەسە اقپاراتتىق كەڭىستىكپەن عانا شەكتەلمەيتىنى ءجيى ايتىلىپ ءجۇر. اسىرەسە، ءدىني ەكسترەميزمنىڭ الدىن الۋ تاقىرىبى كۇن تارتىبىنەن تۇسپەي كەلەدى. وسى تۇرعىدا زاڭنامالىق وزگەرىستەر ماجىلىستە تالقىلانىپ، ەكسترەميستىك مازمۇنداعى ادەبيەتتەردىڭ تارالۋىنا توسقاۋىل قويۋ ءۇشىن قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى قۇزىرەتىن كەڭەيتۋ ماسەلەسى كوتەرىلدى. بۇل باستامانى ءماجىلىس دەپۋتاتى ابزال قۇسپان كوتەردى.

بۇل باستامانى دەپۋتاتتار دا قولداپ وتىر. ويتكەنى راديكالدى يدەيالاردىڭ تارالۋىنا جول بەرمەۋ – بۇگىنگى كۇننىڭ باستى مىندەتتەرىنىڭ ءبىرى. الايدا ماسەلە تەك كىتاپتار مەن اقپارات قۇرالدارىندا عانا ەمەس ەكەنى انىق. قاۋىپتى يدەولوگيا كوبىنە ءبىلىم مەن تاربيە ارقىلى دا تارالۋى مۇمكىن.

قازاقستاندا سوڭعى جىلدارى جەكە بالاباقشالاردىڭ سانى ايتارلىقتاي ارتتى. بۇل – مەملەكەتتىك بالاباقشالاردىڭ جەتىسپەۋشىلىگىنەن تۋىنداعان زاڭدى ءۇردىس. دەگەنمەن، مۇنداي مەكەمەلەردىڭ بارلىعى بىردەي ساپالى ءارى قاۋىپسىز تاربيە بەرىپ وتىر ما دەگەن سۇراق تۋىندايدى. اسىرەسە، ەلدىڭ باتىس وڭىرلەرىندە كەيبىر ءدىني توپ وكىلدەرىنىڭ جەكە بالاباقشالار اشىپ، بالالارعا قانداي باعىتتا تاربيە بەرىپ جاتقانى قوعامدى الاڭداتادى.

بۇل ماسەلە بۇرىن دا كوتەرىلگەن. اتىراۋ قالاسىنداعى كەيبىر بالاباقشالارعا قاتىستى مىسالدار ايتىلىپ، ولاردىڭ قىزمەتى قوعامدا پىكىرتالاس تۋدىرعان بولاتىن. وسىعان بايلانىستى ساراپشىلار مەن دەپۋتاتتار ۇلتتىق قاۋىپسىزدىك ورگاندارىنىڭ وكىلەتتىگىن تەك اقپاراتتىق كەڭىستىكپەن شەكتەمەي، ءبىلىم جانە تاربيە سالاسىنا دا بەلگىلى ءبىر دەڭگەيدە كەڭەيتۋ قاجەت دەگەن پىكىر بىلدىرۋدە.

ءوز كەزەگىندە قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى وكىلدەرى ۇلتتىق قاۋىپسىزدىك ۇعىمىنىڭ اۋقىمى كەڭ ەكەنىن اتاپ وتەدى. ولاردىڭ ايتۋىنشا، ۇلتتىق قاۋىپسىزدىك تەك اسكەري نەمەسە ساياسي باعىتپەن عانا ەمەس، قوعامدىق، ەكونوميكالىق، اقپاراتتىق جانە ەكولوگيالىق سالالاردى دا قامتيدى. ال قوعامدىق قاۋىپسىزدىك ۇعىمىنا قۇقىقتىق ءتارتىپ پەن الدىن الۋ شارالارى كىرەدى.

الدىن الۋ جۇمىستارىنىڭ ءوزى وتباسىنان، بالاباقشادان جانە مەكتەپتەن باستالاتىنى بەلگىلى. وسى تۇرعىدان العاندا، بالالار تاربيەسى مەن ءبىلىم بەرۋ جۇيەسى دە ۇلتتىق قاۋىپسىزدىكپەن تىكەلەي بايلانىستى. بۇل باعىتتاعى جۇمىستار ءتۇرلى مەملەكەتتىك ورگانداردىڭ قاتىسۋىمەن ۇيلەستىرىلىپ، ارنايى كەڭەستەر مەن شتابتار ارقىلى جۇزەگە اسىرىلادى.

دەگەنمەن، ساراپشىلاردىڭ پىكىرىنشە، قازىرگى جاعدايدا تەك ۇيلەستىرۋ جەتكىلىكسىز بولۋى مۇمكىن. ويتكەنى يدەولوگيالىق قاۋىپتەر جاسىرىن ءارى ۇزاق مەرزىمدى اسەرگە يە. سوندىقتان تاربيە بەرۋ مەكەمەلەرىنىڭ قىزمەتىن باقىلاۋ، ولاردىڭ باعدارلامالارى مەن قۇندىلىقتىق باعىتتارىن ساراپتاۋ – ۋاقىت تالابى.

ۇلتتىق قاۋىپسىزدىك بۇگىندە تەك شەكارا مەن اقپاراتتى قورعاۋمەن شەكتەلمەيدى. ول – سانا، تاربيە جانە قۇندىلىقتار قاۋىپسىزدىگى. ەگەر قوعام ءوز بولاشاعىن قورعاۋدى كوزدەسە، بۇل ماسەلەنى بالاباقشادان باستاپ قاراستىرۋى ءتيىس.

Abai.kz