رەسەيدەگى جاپپاي توبەلەستەن كەيىن قازاقستاننىڭ ءۇش ازاماتىنا قاتىستى تەرگەۋ امالدارى جالعاسۋدا. بۇل تۋرالى ءماجىلىس كۋلۋارىندا سىرتقى ىستەر ءمينيسترىنىڭ ءبىرىنشى ورىنباسارى ەرجان اشىقباەۆ مالىمدەدى.

ۆيتسە-مينيستر بۇل ماسەلە ۆەدومستۆونىڭ باقىلاۋىندا ەكەنىن اتاپ ءوتتى.

«وزدەرىڭىز بىلەتىندەي، جاپپاي تارتىپسىزدىك ورىن الدى. سىزدەر مۇنى جەلىدە تاراعان بەينەماتەريالداردان كوردىڭىزدەر. ءبىزدىڭ مالىمەتىمىز بويىنشا، كونسۋلدارىمىز قازاقستان ازاماتتارىنا بارلىق قاجەتتى كونسۋلدىق-قۇقىقتىق كومەكتى كورسەتىپ جاتىر. بىرنەشە ونداعان ادام ۇستالدى. ولاردىڭ كوبى بوساتىلدى. بىرقاتار ازامات اكىمشىلىك قاماۋدا وتىر. ال قازاقستاننىڭ ءۇش ازاماتىنا قاتىستى تەرگەۋ امالدارى جۇرگىزىلۋدە»، — دەدى ەرجان اشىقباەۆ.

ۆيتسە-مينيستر قاقتىعىستىڭ تەك تۇرمىستىق نەگىزدە تۋىنداعانىن ايتتى. سونداي-اق ول وتانداستارىمىزدىڭ ناقتى تۇرمە جازاسىنا كەسىلۋ-كەسىلمەۋىن تەرگەۋ قورىتىندىسى بويىنشا قۇزىرلى ورگاندار انىقتايتىنىن جەتكىزدى.

زارداپ شەككەندەر بار ما؟

ەرجان اشىقباەۆ قر ءسىم اقپاراتى بويىنشا، زارداپ شەككەن قازاقستان ازاماتتارى جوق ەكەنىن ايتتى. دەگەنمەن، جۋرناليستەر ەكى ادامنىڭ جارالانعانى تۋرالى اقپارات بەرگەن تۇرعىندارمەن سويلەسكەندەرىن العا تارتتى.

«مەن قولىمىزدا بار رەسمي اقپاراتتى ايتىپ وتىرمىن. ءبىزدىڭ دەرەكتەر بويىنشا، قازاقستان ازاماتتارىنىڭ اراسىندا زارداپ شەككەندەر جوق... بالكىم، ولار ءتيىستى مەديتسينالىق مەكەمەلەرگە جۇگىنبەگەن بولار»، — دەپ ءتۇسىندىردى ۆيتسە-مينيستر.

قازاقستان ازاماتتارى شەتەلدە قاقتىعىستارعا تارتىلعان كەزدە، ولار بەيتانىس قۇقىقتىق جۇيەگە، تىلدىك كەدەرگىلەرگە جانە ءوز قۇقىقتارىن قورعاۋدىڭ شەكتەۋلى مۇمكىندىكتەرىنە تاپ بولۋى مۇمكىن. مۇنداي جاعدايلاردا ءسىم ارقىلى مەملەكەت تاراپىنان كورسەتىلەتىن قولداۋ شەشۋشى ءرول اتقارادى. بۇل ءادىل تەرگەۋدى، ادۆوكاتتاردىڭ كومەگىن جانە بازالىق قاۋىپسىزدىكتى قامتاماسىز ەتۋگە كومەكتەسەدى.

26 ناۋرىزدا لەنينگراد وبلىسىنىڭ ۋست-لۋگا ۆاحتالىق كەنتىندە «گازپرومنىڭ» مەردىگەرىنە تيەسىلى قۇرىلىس نىسانىندا جۇمىسشىلار مەن كۇزەتشىلەر اراسىندا جاپپاي قاقتىعىس بولدى. وعان قازاقستان ازاماتتارى دا قاتىسقان. قازاقستاننىڭ سانكت-پەتەربۋرگتەگى باس كونسۋلدىعى جاپپاي توبەلەستەن كەيىن ەل ازاماتتارىنىڭ 10 تاۋلىككە قاماۋعا الىنعانىن حابارلادى. باستاپقىدا تارتىپسىزدىككە بىرنەشە ءجۇز ادام قاتىسقان. وقيعادان كەيىن بىردەن ءارتۇرلى ەلدىڭ 30-دان استام ازاماتى ۇستالدى. قازىرگى ۋاقىتتا ءۇش قازاقستاندىق تەرگەۋ استىندا قالىپ وتىر.

Abai.kz