ەرتەڭنەن باستاپ ەشقانداي تاريفتەر كوتەرىلمەيدى. الدىمەن ءتيىستى ءوتىنىش بەرىلۋگە ءتيىس.

ۇكىمەت وتىرىسىنان سوڭ وتكەن بريفينگتە ەنەرگەتيكا ۆيتسە-ءمينيسترى سۇڭعات ەسىمحانوۆ كوممۋنالدىق تاريفتەردىڭ وسۋىنە قاتىستى پىكىر ءبىلدىردى. 

ونىڭ ايتۋىنشا، كوممۋنالدىق تاريفتەر بىردەن كوتەرىلمەيدى جانە بۇل ءۇشىن ءتيىستى راسىمدەر ساقتالۋى قاجەت.

– ەرتەڭنەن باستاپ ەشقانداي تاريفتەر كوتەرىلمەيدى. الدىمەن ءتيىستى ءوتىنىش بەرىلۋگە ءتيىس. الدىن الا بەرىلسە، قاراستىرىلۋى مۇمكىن. بۇگىندە ءتيىستى وزگەرىستەر كەلىپ جاتىر، ولار قاراستىرادى، – دەدى ول.

ۆيتسە-مينيستر كوممۋنالدىق تاريفتەردى بەكىتۋ بىرنەشە كەزەڭنەن وتەتىنىن اتاپ ءوتتى.

– تابيعي مونوپوليا اگەنتتىگى سۋبەكتىلەردى قارايدى، ال ەنەرگەتيكا مينيسترلىگى گەنەراتسيا ستانتسيالاردىڭ ءتاريفىن زەرتتەپ، سوسىن عانا شەشىم قابىلدايدى، – دەدى سۇڭعات ەسىمحانوۆ.

سونداي-اق ءار وڭىردەگى كوممۋنالدىق تاريفتەردىڭ وزگەرۋى جەرگىلىكتى دەڭگەيدە قارالاتىنى ايتىلدى.

– ءار ءوڭىردىڭ اۋماقتىق دەپارتامەنتى بار. ولاردىڭ ارقايسىنىڭ مەرزىمى ءارتۇرلى بولادى. ءار ءوڭىردىڭ كوممۋنالدىق ءتاريفىنىڭ وزگەرۋى تىڭداۋلار مەن وتىنىشتەر بەرىلمەي بولمايدى دەپ ويلايمىن، – دەدى ول.

ۆيتسە-مينيستر كوممۋنالدىق تاريفتەردىڭ وسۋىنە اسەر ەتەتىن فاكتورلارعا دا توقتالدى.

– مۇنى اشىق ايتىپ جاتىرمىز. ينفلياتسيا بار، ءتيىستى قۇرالدار قىمباتتايدى. ەكىنشىدەن، ول جەردە جۇمىسشىلار جۇمىس ىستەيدى. سوندىقتان ول ماسەلەلەر وبەكتيۆتى تۇردە قارالىپ، ءتيىستى سەبەپ بولسا، ءوسىرۋى مۇمكىن، – دەدى سۇڭعات ەسىمحانوۆ.

Abai.kz