2025 جىلى قازاقستاندا قىلمىستىق-اتقارۋ جۇيەسى مەكەمەلەرىندەگى سوتتالعاندار اراسىنداعى ءولىم-ءجىتىم 5%-عا تومەندەدى. بۇل تۋرالى دەنساۋلىق ساقتاۋ مينيسترلىگى حابارلاپ، كورسەتكىشتىڭ جاقسارۋىن مەديتسينالىق كومەككە قولجەتىمدىلىكتىڭ ارتۋىمەن بايلانىستىردى.

ۆەدومستۆونىڭ مالىمەتىنشە، پروفيلاكتيكالىق تەكسەرۋلەر مەن سكرينينگتەرمەن قامتۋ دەڭگەيى ارتقان. سونىڭ ناتيجەسىندە اۋرۋلاردى انىقتاۋ كورسەتكىشى 28%-عا ءوستى. اسىرەسە قان اينالىمى جۇيەسى اۋرۋلارى مەن قانت ديابەتىن قوسا العاندا، سوزىلمالى جۇقپالى ەمەس دەرتتەردى انىقتاۋ ايتارلىقتاي كوبەيگەن.

قىلمىستىق-اتقارۋ جۇيەسىنىڭ 17 مەكەمەسىندە تەلەمەديتسينا جابدىقتارى ەنگىزىلدى. بۇل قاشىقتان جۇرگىزىلەتىن كونسۋلتاتسيالار سانىن 5 ەسەگە ارتتىرۋعا مۇمكىندىك بەردى. سونىمەن قاتار ستاتسيونارلىق مەديتسينالىق كومەكتىڭ قولجەتىمدىلىگى دە كەڭەيدى – تاۋلىك بويى جۇمىس ىستەيتىن جانە كۇندىزگى ستاتسيونارلارعا جاتقىزۋ سانى كوبەيگەن.

سوتتالعانداردى مەديتسينالىق قامتاماسىز ەتۋ فۋنكتسيالارى ىشكى ىستەر مينيسترلىگىنەن دەنساۋلىق ساقتاۋ مينيسترلىگىنە بەرىلگەننەن كەيىن ينفراقۇرىلىمدى جاڭعىرتۋ باستالدى.

قازىرگى تاڭدا قىلمىستىق-اتقارۋ جۇيەسىنىڭ 78 مەكەمەسىندە مەديتسينالىق قىزمەت كورسەتۋ جاعدايى جاقسارعان. ونىڭ ىشىندە 62 دارىگەرلىك امبۋلاتوريا مەن 16 مەديتسينالىق پۋنكت بار.

ال 55 نىساندا، ياعني جالپى ساننىڭ 70%-ىندا اعىمداعى جانە كۇردەلى جوندەۋ جۇمىستارى جۇرگىزىلگەن.

Abai.kz