قازاقستاندا «تازا قازاقستان» رەسپۋبليكالىق اكتسياسى اياسىندا @TazaQazBot Telegram چات-بوتى ءوز جۇمىسىن جالعاستىرۋدا. بۇل — تۇرعىندارعا ەكولوگيا جانە اباتتاندىرۋ سالاسىنداعى ماسەلەلەر تۋرالى تىكەلەي حابارلاۋعا مۇمكىندىك بەرەتىن ىڭعايلى تسيفرلىق سەرۆيس.

اتالعان سەرۆيس 2024 جىلدىڭ ماۋسىم ايىندا ىسكە قوسىلىپ، بۇگىندە مەملەكەتتىك ورگاندارمەن بايلانىس ورناتۋدىڭ ءتيىمدى ءارى كەڭىنەن قولدانىلاتىن ارناسىنا اينالدى. ءوتىنىم جولداۋ ءۇشىن Telegram قوسىمشاسىندا چات-بوتقا كىرىپ، اۆتوريزاتسيادان ءوتىپ، ماسەلەنىڭ فوتوسىن تىركەپ، ناقتى مەكەنجايىن كورسەتىپ، قىسقاشا سيپاتتاما قالدىرۋ جەتكىلىكتى. ءوتىنىم اۆتوماتتى تۇردە ءتيىستى ورگاندارعا جولدانىپ، ارتىق قوڭىراۋلار مەن قوسىمشا جۇگىنۋلەردى قاجەت ەتپەيدى.

پلاتفورمانىڭ باستى ارتىقشىلىقتارىنىڭ ءبىرى — اشىقتىق. پايدالانۋشى ءاربىر ءوتىنىمنىڭ ورىندالۋ مارتەبەسىن باقىلاپ وتىرا الادى. جۇمىس اياقتالعاننان كەيىن فوتوەسەپ ۇسىنىلىپ، كورسەتىلگەن قىزمەتتىڭ ساپاسىن باعالاۋ مۇمكىندىگى بەرىلەدى.

بارلىق وتىنىمدەر 21 سانات بويىنشا جىكتەلەدى. ولاردىڭ قاتارىندا اۋماقتاردى تازالاۋ، قوقىس شىعارۋ، جولداردى جوندەۋ، جارىقتاندىرۋ، كوگالداندىرۋ جانە سۋ ايدىندارىن تازارتۋ سياقتى باعىتتار بار. بۇل ءوز كەزەگىندە وتىنىمدەردى جەدەل وڭدەۋگە جانە ءتيىستى قىزمەتتەرگە ناقتى باعىتتاۋعا مۇمكىندىك بەرەدى.

2025 جىلدىڭ قورىتىندىسى بويىنشا چات-بوت ارقىلى 26 مىڭنان استام ءوتىنىم ءتۇسىپ، ونىڭ 24 مىڭنان استامى ءساتتى ورىندالعان. ەڭ كوپ سۇرانىسقا يە باعىت — اۋماقتاردى تازالاۋ.

2026 جىلدىڭ ءبىرىنشى توقسانىندا 4 مىڭنان استام ءوتىنىم كەلىپ ءتۇستى، ولاردىڭ باسىم بولىگى بۇگىندە ورىندالدى.

@TazaQazBot تسيفرلىق سەرۆيستەردىڭ تۇرعىندار مەن مەملەكەت اراسىنداعى ءوزارا بايلانىستى جاقسارتۋداعى، ماسەلەلەرگە جەدەل ارەكەت ەتۋدەگى جانە جەرگىلىكتى اتقارۋشى ورگاندار جۇمىسىنىڭ تيىمدىلىگىن ارتتىرۋداعى ماڭىزىن ايقىن كورسەتەدى.

@TazaQazBot — جايلى ءارى تازا ورتا قالىپتاستىرۋداعى ءسىزدىڭ سەنىمدى قۇرالىڭىز.

Abai.kz